Во надлежни институции постои документација од која јасно може да се констатира дека не станува збор за било каква злоупотреба од страна на Агенцијата, се наведива во реакцијата од понеделникот на Агенцијата за вработување на Република Македонија (АВРМ), во врска со текстовите што изминативе денови беа објавени во медиумите, а каде беше спомената Агенцијата за вработување на Република Македонија, и по денешната прес-конференција на техничкиот министер за труд и социјална политика – Фросина Ташевска Ременски.

„Во октомври 2015 година меѓу Mинистерството за труд и социјална политика и Агенцијата за вработување е склучен Договор, со кој Агенцијата за вработување на Република Македонија на Министерството за труд и социјална политика му отстапува расположливи технички средства, меѓу кои и расположливи службени моторни возила, освен оние возила кои се донација од ЕУ. За користење и управување со овие возила на Агенцијата, Директорот издал и соодветни Овластувања“, се наведува во реакцијата на АВРМ.

Тврдат, исто така, дека сите преземени дејствија од страна на Агенцијата за вработување се поткрепени со соодветни докази и документација и не постои никаква злоупотреба на нејзиниот имот и средства.

Претходно во понеделникот „итна оставка“ од дополнителниот заменик-министер за труд и социјална политика Диме Спасов, по саботниот инцидент во кој тој со возило на Агенцијата за вработување предизвика две сообраќајни несреќи, побара техничката министерка за труд и социјална политика Фросина Ташевска-Ременски.

Според Ременски, „Туарегот“ со кој заменик-министерот направил сообраќајни прекршоци е во сопственост на Агенцијата за вработување и не е единственото возило кој тој го користел надвор од работното време. Како што вели таа, Спасов противзаконски, освен со Туарегот, располагал и со уште други три возила кои од страна на Владата на Република Македонија, на 12 август 2015 година се дадени на трајно користење на Агенцијата за вработување./крај/мф

Извор: Макфакс