Скопското обвинителство и увидни екипи на МВР денеска извршија увид на лице место по настанатиот пожар во Трубарево.

Увидните дејствија, како што информират од Обвинителството, се преземаа како во однос на настанувањето на пожарот, така и во однос на складирањето на отпадот на предметната локација. Извршено било фотографирање и дронско снимање на локацијата.

„Со оглед на затрупувањето на локацијата од безбедносни причини, увидните дејствија на терен се отежнати. По наредба на јавен обвинител, локацијата ќе остане обезбедена и во наредниот период за потребите на постапката. Таму ќе продолжат да се вршат дополнителни мерења на загадувањето од Министерството за животна средина, а на терен ќе излезе и вешто лице од областа на екологијата“, велат од Обвинителството.

Исто така, се уште на лице место е стационирана и противпожарна екипа, бидејќи на дел од локацијата и понатаму се јавуваат повремени чадења и постои опасност од ново разгорување. Обвинителството и истражните органи продолжуваат да преземаат и други дејствија за целосно испитување на настанот.

Министерот за земјоделство, шумарство и водостопанство, Цветан Трипуновски, денеска беше на теренска посета во Тиквешкиот регион, каде посети неколку откупни пунктови со цел следење на процесот на откуп на винско грозје.

„Можам да ве информирам дека според податоците од претходниот ден, досега се откупени нешто над 78 милиони килограми винско грозје”, истакна Трипуновски.

Од откупените количини, над 35 милиони килограми се црвено грозје, околу 40 милиони килограми бело грозје, плус дополнителни количини наменети за извоз. Целиот процес се следи од страна на Државниот инспекторат за земјоделство.

Министерот додаде дека се следи состојбата со откупот на винско грозје и дека оваа година има зголемена количина, што радува бидејќи Министерството вложи напори да донесе вода до секој лозов насад.

„Она што сакам да го упатам е дека не треба лозарите да бидат загрижени. Интензивно изминатите денови го следиме откупот и динамиката. Определената количина која меѓу лозарите наводно нема да се откупи не е точно – од утре веќе во откупот влегува уште една винарска визба, тоа е „Вардар винарија“, која ќе ги отвори своите порти и ќе ја собере дополнително онаа количина што ќе се појави за откуп”, појасни министерот Трипуновски.

Министерот истакна дека останатите винарски визби согласно динамиката продолжуваат со откуп на винско грозје.

„Секое едно зрно, секој еден грозд ќе биде собран – лозарите да не бидат загрижени. Нашата заложба беше да има зголемена количина на винско грозје. Наредниот период продолжуваме да бидеме тука секојдневно на терен за да елиминираме било каква манипулација”, заклучи министерот.

Членот на Централниот комитет на ВМРО-ДПМНЕ, Валентин Манасиевски, денеска на прес-конференција изјави дека лидерот на Левица, Димитар Апасиев, и неговата партија се демаскирани и дека од „наводно неподмитливи“ станале „профитери“.

„Апасиев и Левица, кои се претставуваа како скромни, неподмитливи и народни, денес се демаскирани. Од левичарска и работничка партија, Левица стана елитистичка партија со која Апасиев гази врз сопствените членови“, рече Манасиевски.

Тој го посочи купувањето на конфискуван недвижен имот во центарот на градот како доказ за, како што рече, вистинското лице на Левица. Според него, имотот бил купен за 250 илјади евра – сума многу пониска од реалната пазарна цена.

„Јавноста беше замајувана дека тоа не е вистина, но сепак вистината излезе на површина – просторот навистина е купен преку директен договор со извршител и банка, против кои Левица со години водеше битка“, нагласи Манасиевски.

Тој додаде дека со тоа Апасиев и Левица, кои до вчера ги обвинуваа другите за корупција и привилегии, сега стануваат дел од истите практики.

„Од граѓаните бараат донации, а парите завршуваат во џебот на партискиот врв. Од другите пратеници бараат отчет за патни трошоци, додека самите го прават истото. Апасиев и Левица се сè, само не неподмитливи и скромни. Нивната вистинска агенда е јасна – од наводно неподмитливи до профитери“, изјави Манасиевски.