Почетокот на судењето за случајот „Јустиција“ во кој обвинети се судии и стручни соработници од Одделот за прекршоци при Основниот суд Скопје 1 повторно се одложи бидејќи две од обвинетите биле тешко болни и не беа присутни во судницата.

Едната од обвинетите имала инфекција на жолчката и се наоѓа на Клиниката за токсикологија, додека другата обвинета била на Клиниката за радиологија, бидејќи имала тумор на мозокот.„Овие луѓе доживеаја стресови од апсењето“, рече адвокатот на дел од обвинетите, Ефто Спировски кој на претходното одложување изјави дека целиот случај е фарса за понижување на големи професионалци со над 30-годишно судиско искуство.Во обвинението се вели дека обвинетите воделе постапка без да се појават странките, а судските казнени пресуди биле внесувани како извршени, но биле чувани во фиоки сè до нивно застарување, а се ставал и противзаконски изготвен штембил дека постапката се запира.Во акцијата „Јустиција“, која се случи лани во октомври, беа уапсени дваесет и пет лица од Одделот за прекршоци при Основниот суд Скопје 1 под сомнение за кривичното дело несовесно работење во службата. Јавно обвинителство – Скопје, во меѓу време, склучи седум спогодби со судии и судски службеници кои ја признаа вината и тие беа осудени на условна казна. Против петмина, пак, кривичната постапка беше запрена бидејќи се утврдило дека нема кривично дело кај нив.Со обвинението се опфатени 13 лица. Меѓу нив има и пензионирани судии, додека останатите, кое се во работен однос, се суспендирани од работа. Сите обвинети се бранат од слобода. /крај/мф/ффс