Европската федерација на новинари (EFJ), која претставува над 300 илјади новинари од цела Европа, меѓу кои и членки во Македонија, Здружението на новинарите на Македонија (ЗНМ) и Синдикатот на македонските новинари и медиумски работници (ССНМ), е во сериозна постојана загриженост за состојбата со слободата на медиумите во Македонија, се вели во писмото на ЕФЈ, адресирано во еврокомесарот за соседска политика и пристапни преговори Јоханес Хан.

„Како што знаете, од 2015 година, Македонија се наоѓа во длабока политичка криза откако опозицијата го бојкотираше Парламентот и го објави скандалот со прислушувањето. Опозицијата во следните месеци обелодини серија телефонски разговори главно меѓу високи претставници на Владата, кои индицираат сериозни незаконски активности, злоупотреба на службената должност и корупција. Како дел од овој скандал како што тврдеше опозицијата е и тоа дека повеќе од 100 новинари биле нелегално прислушувани од државната тајна служба“, велат од ЕФЈ.

„Во јуни 2015 година, главните политички партии кои ја претставуваат владејачката коалиција и опозицијата под силно посредување од Вас (ЕУ), Европскиот парламент и САД, потпишаа договор за надминување на политичката криза во земјата. Главниот заклучок на овој договор беше дека треба да се организираат слободни предвремени парламентарни избори и да се преземат итни реформски мерки за што сите страни се согласија. Еден од итните приоритети од Договорот е реформата на медиумите и слободата на изразување во Македонија со цел да има слободни и кредибилни избори, како апсолутен предуслов за демократски избор“, се вели во писмото на Европската федерација на новинари.

„Заедно со нашите локални членки, ние сме сериозно загрижени дека ЕУ не е целосно конзистентна во своите изјави за реформите на медиумите. Од оваа недела, ЕУ престана да инсистира дека е потребно да се случат реформи за медиумите пред изборите кои се презакажани на 5-ти јуни. Ние сме убедени дека ако не го искористиме овој момент за спроведување на медиумските реформи, кога сите потписници се на преговарачка маса, ќе пропуштиме одлична можност да имаме сериозни промени кои сите ние ги чекаме толку долго, а се од клучно значење за Македонија и во регионот. Тешко е да се има фер избори кога главните медиумите се под директно влијание на владата“, потенцираат од ЕФЈ.

„Ве повикуваме вас, драг комесаре, да извршите притисок врз владата дека реформите во медиумите во Македонија треба да се случат пред изборите, како што е наведено во „Договорот на Пржино”. Ова е единствениот начин да се ослободат медиумите од политичкото влијание на владата како предуслов за професионално известување за претстојните избори“, заклучуваат од ЕФЈ./крај/мф/бс