Претседателот на Државната изборна комисија, Никола Рилкоски, да си поднесе оставка побара независната пратеничка Солза Грчева, поради тоа што трипати потпишал дека Избирачкиот список е прочистен, а подоцна признава дека не е.

„Да размисли за оставка, со цел еден ден да дојде претседател кој јавно на прес-конференција ќе каже дека нема услови да работи, дека не е прочистен Избирачкиот список и ќе го искине јавно пред сите“, рече Грчева на седницата посветена на пратенички прашања.

Таа смета дека неговата изјава дека „И да сакаме не можеме да ги провериме списоците“, е скандалозна, затоа што тој, како претседател на ДИК, има и право и обврска да спроведе проверка на податоците за Избирачкиот список, во соработка со МВР.

„Ако, сепак, е спречен тоа да го направи, тогаш требаше да иницира теренска проверка, па од врата на врата да провери“, рече Грчева. „Тој вели дека немал доверба во институциите, но изгледа е еден од ретките што има, па го зеде списокот здраво за готово од МВР и не го провери теренски“.

Бидејќи Рилкоски не присуствуваше на денешната седница на Собранието, прашањата на Грчева ќе му бидат доставени писмено, а тоа се: Зошто го легитимираше референдумот за ГТЦ со потпишување на Избирачкиот список, кога знаеме, дека сé уште постојат станови со 50 жители, а при тоа не покрена теренска проверка? Можат ли во оваа ситуација граѓаните, особено опозицијата да има доверба во ДИК? и Да размисли за оставка?

Според Грчева, референдумот за ГТЦ покажал дека цензусот е превисок, но дека од 40,7 отсто колку што излегоа на гласање, 95 отсто биле за да се сочува неговиот автентичен изглед, или 39 отсто од вкупниот број гласачи во Општина Центар.

„Само за споредба, ВМРО-ДПМНЕ владее со земјава со доверба од 27 отсто од граѓаните“, заклучи Грчева.

Таа смета дека  Македонија по оваа политичка криза, по секојдневните протести, по аферите што ја тресат,  никогаш нема да биде иста. На граѓаните ќе мора да им се одговорат прашањата.

„Во нашава држава ненормалните работи станаа нормални… Си ги прифативме притисоците во администрацијата, набилданите избирачки списоци …“, додаде таа./крај/мф/бб