Владата работи на квалитетни решенија и истовремено е отворена за разгледување на сите предлози кои се однесуваат на уставните измени, вклучително и на Венецијанската комисија, која е исклучително важна, изјави во неделата премиерот Никола Груевски.
 

„Отворени сме за разгледување на сите предлози, вклучително и на Венециската комисија. Секако. таа е исклучително важна. Ги разгледуваме сите предлози и сите идеи, ги анализираме во контекст на Венецијанската комисија. Имавме и посериозни контакти и комуникации. Во фаза на анализа сме за сите предлози и наскоро ќе излеземе со наш став и со конечен предлог“, рече Груевски.

Македонија бележи „сериозни успеси и континуиран напредок во реформите“ и оти Владата во тој правец прави силни напори за приближување до европските стандарди на состојбите на секое поле, рече Груевски одговарајќи на новинарски прашања по пуштањето во употреба на новиот спортски полигон во скопската општина Ѓорче Петров.

„Не би ја коментирал изјавата на Али Ахмети, ќе го коментирам тоа што во минатото сум го правел. Ние правиме огромни напори да ги приближиме работите на секое поле и имаме сериозни успеси во тоа. Се разбира, секогаш имаме слабости, ние никогаш не сме кажале дека е идеална ситуацијата во која и да е сфера, но имаме континуиран напредок. Освен што имаме континуиран напредок, постои простор за уште повеќе. Ќе продолжиме да работиме со сите сили за напредок во сите области, вклучувајќи ги и овие што беа спомнати“, порача Груевски запрашан да ги коментира забелешките на лидерот на коалицискиот партнер ДУИ, Али Ахмети во врска за Извештајот од Европската комисија./крај/мф/сн

Извор: Макфакс