Македонија
Груевски во Василево презентираше нови проекти за земјоделството

Лидерот на ВМРО-ДПМНЕ и носител во 4. Изборна единица, Никола Груевски денеска пред жителите на општина Василево ја презентираше Изборната програма за следниот четиригодишен период во која, како што рече, голем дел е посветен на развојот на земјоделството.
Тој нагласи дека станува збор за крупни проекти со кои имаат сериозна намера да го зајакнат македонското земјоделство како во поглед на квалитетот, така и во поглед на извозот и македонскиот земјоделец да стане конкурентен на пазарот.
Груевски посочи дека во Програмата се предвидува поддршка за отворање органски продавници со тоа што 50 проценти ќе бидат финансирани трошоците за опрема до максимални 60.000 денари, а исто така се предвидува и 50 проценти поддршка за производство и употреба на зелена енергија и за заштита на квалитетот на земјоделските производи.
Како дел од Програмата, тој ги презентираше и проектите со кои се предвидува 60 процентно финансирање за набавка на нова земјоделска механизација, како и 60 процентна поддршка за осигурување на земјоделските посеви, притоа апелирајќи до земјоделците да ја искористат оваа можност и да ги осигуруваат своите посеви во услови кога се повеќе се очекуваат поплави и суши.
Ова не се само предизборни ветувања, туку ова е долгорочна стратегија каде ќе се движи нашето земјоделско производство. Верувам дека тоа е правецот по кој треба да се движи македонското земјоделство во наредните години. Чекор по чекор луѓето ќе ги користат мерките и ќе се менува структурата на македонското земјоделство, истакна Груевски.
Пред жителите на Василево беа презентирани и придобивките од проектот „Рурални развојни зони“, 80 процентната финансиска поддршка од државата за инсталирање на системот „капка по капка“ и исто толкава финансиска поддршка за набавка на високоприносен добиток.
За подобро искористување на ИПАРД средствата се планира формирање на фонд кој ќе обезбеди гаранцијаза хипотеката на земјоделските кредити во висина од 50 проценти од износот, а со 50 проценти ќе се субвенционираат каматните стапки за ИПАРД инвестициите.
Како дел од Програмата, преку проектот „Агро-тирз“ се предвидуваат и голем број поволности за отворање центри за откуп и дистрибуција на свеж зеленчук и овошје.
Осврнувајќи се на проектите што се планираат во општина Василево, Груевски ги спомена реконструкцијата на браната „Турија“ со што ќе се овозможи наводнување на поголеми површини, потоа реконструкција на патишта, изградба на нова детска градинка и две кошаркарски игралишта./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЦУК: Пожарот во Самоков веднаш изгаснат, објектите на фабриката не беа во опасност

Пожарот во Самоков е локализиран и веднаш изгаснат. Во ниту еден момент немаше опасност од негово ширење кон објектите на фабриката Самоков, соопшти Центарот за управување со кризи.
Од РЦУК Македонски Брод претходно стигна информација дека е настанат пожар во населбата Самоков, во фабриката „Сувенир“, а опожарен е магацин со хемикалии. Во информацијата беше наведено дека електричната енергија во фабриката е исклучена.
Македонија
„Седи Боби, кец!“, му рече Арсовска на Стефковски за проблемот со водата, па доби одговор

Градоначалничката на Град Скопје, Данела Арсовска, преку објава на својот официјален профил на Фејсбук, му возврати на градоначалникот на општина Гази Баба, Бобан Стефковски, кој претходно ги прозва Градот и ЈП „Водовод и канализација“ – Скопје, за прекините во водоснабдувањето во неколку скопски населби. Тој побара итна интервенција од Градот, предупредувајќи на можни протести ако состојбата не се реши веднаш.
Арсовска му одговори на Стефковски дека и по три години на функција сè уште не прави разлика што е во надлежност на Градот, а што на Општина Гази Баба. Таа појасни дека жителите на Црешево и Смилковци не се корисници на ЈП „Водовод и канализација“, туку на ЈКП „Гази Баба“ – претпријатие под општинска надлежност.
„Ова по три години ќе го знаеше ако паузираше еден ден од сликање по фолклорни манифестации за да сработиш нешто“, напиша Арсовска, посочувајќи дека со средствата добиени од владите на Ковачевски и Мицкоски, Стефковски можел да изгради нова водоводна мрежа за тие населби.
Во продолжение, Арсовска рече дека Град Скопје во изминатите три години не добил ниту еден денар од централната власт, а дека Владата ѝ должи на ЈСП Скопје осум милиони евра.
Градоначалничката ја заврши објавата со саркастичен тон: „Седи Боби, кец!“
Ситуацијата дополнително ја заостри реториката меѓу градоначалниците на Скопје и Гази Баба, отворајќи нова рунда меѓусебни обвинувања. По објавата на Арсовска, повторно се огласи Стефковски кој и’ одговори дека надлежноста за Смилковци и Црешево ја знае многу добро, па ја повика да каже зошто жителите од Автокоманда, Железара, Триангла, Маџари и Ченто немаат вода? За крај по однос на делењето оценки, Стефковски на социјалните мрежи напиша дека граѓаните и’ дале оценка на парламентарните избори на Арсовска. Тогаш таа освои вкупно 3.438 гласови.
Македонија
Гори кај Прилеп, Македонски Брод, Чашка и Велес – пресек на состојбата со пожарите

На територијата на државата се евидентирани вкупно осум пожари на отворен простор, од кои активни се четири, соопшти Центарот за управување со кризи.
Во Општина Прилеп, гори кај селото Бешиште. Се работи за приземен пожар во квалитетна мешана шума. Активен е пожарот и кај Општина Македонски Брод, с. Црешнево, м.в. Церо Поле – пожар во деградирана дабова шума и грмушки. Во Општина Чашка беснее шумски пожар под Солунска Глава, помеѓу местата викани Изворите на Бабуна и Бабина Дупка (моментално нема активен пламен, само чад на карпест дел). Во Општина Велес пожарот избувна во ниска вегетација.
Изгаснати се 4 пожари: Општина Врапчиште, с. Врањовци – ниска вегетација, ѓубриште; Општина Липково, с. Лојане – ниска вегетација и стрниште; Општина Карбинци, с. Радање – блок (површина) посеана со жито и ниска вегетација и ОпштинаАрачиново, с. Орланци – ниска вегетација и отпаден материјал.