Македонија
Иванов: Со аболицијата беа растурени планови за предизвикување конфликт
Мојата одлука за аболиција ги изненади сите и предизвика нервоза кај одредени центри на моќ, а гневот се насочи кон мене, но со тоа плановите за предизвикување конфликт беа растурени, со тоа беше превенирано загрозувањето на јавната безбедност, истакна Претседателот Ѓорге Иванов во средата попладнето во своето обраќање до јавноста, ден откако Собранието не го усвои предлогот за негов импичмент.
Со 35 гласови „за“ и 47 против, без ниту еден воздржан, пратениците во Собранието во вторникот попладнето по петдневна расправа не го усвоија предлогот од опозицијата за покренување постапка за утврдување на одговорноста на Претседателот Ѓорге Иванов, поради неговата одлука за аболиција на лицата во процесите кои произлегуваат од нелегално прислушуваните телефонски разговори, која подоцна под притисок на јавноста и партиите беше повлечена.
„Сето она што беше кажано од собраниската говорница ќе остане запишано како сведоштво за односот на пратениците кон сопствената држава и кон сопствените институции. Врз основа на тоа сведоштво идните поколенија ќе знаат низ што се минувала демократијата во Македонија и како оваа генерација политичари ја разбирале и практикувале политиката“, рече Иванов.
Тој потсети дека дел од тие сведоштва се помилувањата од претходни претседатели за кои воопшто не беше покренато прашање за нивна одговорност.
Иванов притоа ги спомена и наметнувањето на привременото име за прием во ОН под притисокот на Грција, што сé уште ги кочи евроантлантските интеграции на земјата, како и промената на државното знаме, Уставот и територијалната поделба на државата.
„Никој не одговараше за атентатот на еден претходен претседател и за неразјаснетите околности што доведоа до смртта на друг претседател. Наредните генерации ќе знаат дека во тоа време, на власт биле истите оние кои денес го покренаа прашањето за моја одговорност и кои го оспоруваат мојот легитимитет. Гласањето во Собранието заврши. Неоснованата иницијатива на опозицијата беше отфрлена. Затоа, денеска им се обраќам на граѓаните. Граѓаните кои двапати ми ја дале довербата да бидам претседател на Република Македонија“, порача Иванов.
Шефот на државата потсети дека подолг период предупредувал и за причините и на последиците од кризата во која се наоѓа земјата при што потенцираше дека по вторпат во последните 15 години активна е паралелна агентурна мрежа и безбедносните пропусти во системот за следење на комуникации по вторпат во споменатиот период предизвикаа политичката криза, а првата таква криза, во 2001 година, резултираше со конфликтот меѓу македонските безбедносни сили и ткн Ослободителна армија на Албанците (ОНА).
Ризиците и безбедносните закани
„Под покровителство на меѓународниот фактор, беше постигнат договорот од Пржино. Беше формирана техничка влада со претставници од власта и опозицијата. Беше формирано Специјално јавно обвинителство. Но, наместо да се разреши, кризата се продлабочи. Изборите на 24-ти април беа одложени на барање на опозицијата. Изборите закажани за 5-ти јуни беа минирани, бидејќи опозицијата се закани дека ќе ги спречи, а олеснувачите извршија притисок кај дел од партиите да се откажат од учество“, рече.
Опишувајќи го овој период Иванов посочи дека партиите и нивните поддржувачи ги користеле институциите како средство за меѓусебна пресметка, а во недостиг од време за водење квалитетни истраги. Специјалното јавно обвинителство потфрлило
„Постоеше висок ризик од поттикнување насилни акти и предизвикување меѓу-македонски судир. Се активираа криминални мрежи, антивладини активисти и олеснувачи на движењето на мигрантите. Од ден во ден, состојбата се усложнуваше. Договорот од Пржино беше de facto мртов“,додаде претседателот.
Оцени дека во тој период поради нарушениот систем на команда, безбедносните институции биле блокирани и воспоставени паралелни структури.
Поради тоа, постоел, истакна Иванов, висок ризик безбедносните структури да не можат да одговорат на заканите со кои се соочуваме како држава. „А закани имаше многу, и однадвор, и од внатре“, потенцираше македонскиот претседател.
Прецизираше дека во тој период на македонската јужна граница илјадници мигранти се обидуваа насилно да ја срушат заштитната ограда, да ја преплават територијата на државата, за да го отворат балканскиот мигрантски коридор кон Европа. Армијата и полицијата, рече Иванов, спречиле повеќе од 15.000 обиди за илегален премин на границата.
Покрај тоа, потсети Иванов, на северната граница имаше упад од четириесетчлена вооружена екстремна група.
„Оваа група имаше цел да изврши одмазднички терористички акти за полициската акција од 9-ти мај 2015 година во Куманово. Тогашниот министер за внатрешни работи од опозицијата е добро информиран за она за што зборувам. Тој можел на пратениците од опозицијата да им ги пренесе класифицираните информации за сите закани што ги имавме тие денови. Како членови на собраниските комисии за надзор и контрола тие имаат право да ја знаат вистината“, истакна Иванов.
Во изминатата година се случиле, како што посочи претседателот Иванов, десетина напади со оружје и експлозиви врз државни објекти и институции и една политичка партија.
Нагласи дека во споменатиот период постоел, и сé уште постои висок ризик и од заканата од странски терористички борци. Притоа прецизираше дека во земјата има 86 повратници од боиштата во Сирија и Ирак, каде дејствувале во екстремни групации.
Избегнат меѓумакедонски судир
Иванов ја повтори претходно веќе соопштената за јавноста информација од безбедносните служби дека двајца од лидерите на политичките партии, без да посочи за кои личности и политички станува збор, добивале закани за атентат.
„Заканите беа потврдени и од партнерските странски безбедносни служби“, нагласи претседателот .
Настаните на јужната и северната граница, заканите од странски терористички борци, мобилизацијата на криминалните структури и антивладините активисти со намера да предизвикуваат насилства и узурпирање на објекти ги зголемиле ризиците за загрозување на безбедноста во земјата, оцени.
„Во услови на прогласена кризна состојба и на длабока политичка криза, кога имавме распуштено Собрание и техничка Влада со мандат ограничен само за спроведување избори; кога имавме парализирани безбедносни институции со нарушен систем на команда, и постојани и директни закани по националната безбедност, Специјалното јавно обвинителство вршеше селективен прогон кон само една политичка структура“, рече Иванов кој оцени дека таквите активности и ситуацијата воделе неминовно кој предизвикување тензии во општеството со ризик за меѓуграѓански конфликт и насилства.
„Сé што се случуваше упатуваше на тоа дека се соочуваме со туѓа наметната игра што има за цел дестабилизација на Македонија“, заклучи Иванов изразувајќи очекување одговорот да го даде судската разрешница на предметот „Пуч“, во кој се обвинети неколку поранешни функционери и припадници на службата за државна безбедност, кои се товарат дека нелегално ја користеле инфраструктурата на тајната служба за следење на политичари и други јавно личности, кои му ги предале на челникот на најголемата опозицска партија, кој потоа познати како „бомби“ ги емитуваше во јавноста, а потоа ги предаде во СЈО.
„Сакам граѓаните да знаат дека бевме на чекор од отворен и насилен граѓански судир, најавено од обвинетите во случајот Пуч. Нешто мораше да се преземе за да се спечи најлошото“, нагласи Иванов.
Објасни дека во таквата сложена ситуација, како Претседател на државата на располагање му стојат два уставни и законски инструменти, како што рече, реактивен и превентивен.
„Првата опција беше да дејствувам реактивно. Тоа подразбираше да стојам настрана, и да чекам сé додека состојбата во Македонија не ескалира. Тогаш ќе морав да ја ангажирам Армијата за смирување на состојбата. Но, со тоа ќе ја оставев јужната граница незаштитена и отворена за илегална миграција. Тоа ќе беше сигнал за милиони потенцијални мигранти дека Балканскиот коридор е повторно отворен. Тогаш Македонија ќе беше преплавена со мигранти“, додаде.
Втората опција, којашто ја нарече превентива, пак, подразбирала како шеф на државата да наметне нови правила „на наметнатата игра“ со Македонија, односно да ја преземе контролата „врз играта и да обезбедам предност’ за земјата.
Иванов уверува дека потполно бил свесен за ризиците од носењето одлуки, влегол во наметнатата игра и ги употребил оние инструменти со кои располага според должноста.
Поради тоа превентивно ја донел одлуката за помилување на сите кои на еден или друг начин се вклучени во политичката криза. „Помилувањата беа инструмент со кој ги замрзнав сите непријателски намери меѓу спротивставените страни“, рече
Иванов одаде дека таквата ненадејна одлука предизвикала нервоза кај одредени „центри на моќ“.
„Гневот се насочи кон мене. Плановите за предизвикување конфликт беа растурени. Со тоа го превенирав загрозувањето на јавната безбедност. Но, некои погрешно ги толкуваа моите намери“, дополни.
„Во изминатите два месец многумина упатија прашање до мене: Што сум мислел кога сум ја донел одлуката за помилувањата? На ова прашање ќе одговорам со контра прашања: Зарем требаше да бидам пасивен набљудувач додека се закануваше отворен судир меѓу двете спротивставени страни? Зарем требаше да чекам да падне крв на улиците, за да ја употребам Армијата како втор инструмент во услови на веќе прогласена кризна состојба? Зарем требаше да дозволам Македонец на Македонец да дигне рака?“, запраша претседателот на државата.
Изрази согласување дека станува збор за непопуларна одлука, поради којашто трпи критики, како и дека неговиот личен углед беше доведен во прашање.
„Точно е дека во неколку наврати, протестите станаа и насилни. Но, подобро е да бидат горени моите фотографии, отколку институциите на државата“, порача Иванов посочувајќи дека за него е најважно да не се случи отворен меѓу-македонски судир кон кој туркаа некои вжештени глави.
„Затоа, сметам дека целта е постигната. Вжештените глави се оладени. Македонија сé уште е безбедна, стабилна и мирна држава. Со други зборови, наметнатата игра за дестабилизација на Македонија не успеа“, заклучи Иванов.
Правната држава ја нарушуваат оние кои трчаат во амбасадите
Во продолжени на обраќањето, шефот на државата се осврна и обвинувањата упатени кон него дека покажал неодговорност, но истакна дека, напротив, целосно ја преземал одговорноста за неговата одлука.
„Слушам обвинувања дека одлуката поттикнала на протести и ги зголемила безбедносните ризици. Напротив. Од разузнавачки извори навремено бев информиран дека овие протести биле однапред планирани и подготвувани. Мојата одлука само го забрза нивното дејствување“, нагласи Иванов,
Ги пофали и се заблагодари притоа на припадниците на полицијата за нивниот професионален однос, бидејќи не подлегнале на ниедна од мноштвото провокации на кои беа изложени.
Се заблагодари, исто така, на македонските граѓани кои совесно се однесувале и не го прифатиле насилството на кое се повикувани сиот овој период, како и на безбедносните служби кои навремено информираат за намерите за вршење на насилни акти.
„Ме обвинуваат дека во годината кога одбележуваме четврт век независност со одлуката за помилувања сум ја поништил правната држава. Правната држава ја нарушија оние кои поради недостиг од политичка култура и култура на дијалог и компромис немаа доблест своите недоразбирања да ги решаваат во институциите на државата. Правната држава ја нарушија лидерите на СДСМ и ДУИ, бидејќи уставниот поредок не им беше доволен за да се сретнеме, да седнеме и да се договориме, туку трчаа во амбасадите на странските држави“, рече Иванов.
Заоран Заев (лидер на опозициската СДСМ- з.р.) Али Ахмети (челник на ДУИ која е дел од владината коалиција –з.р.) „ја загрозија правната држава, сувереноста и независноста“, рече Иванов нарекувајќи ги „двајца неодговорни политички лидери кои придонесоа да го добиеме договорот од Прижино, и кои не се ни придржуваа кон тој договор“.
За селективноста на СЈО
„Ме обвинуваат дека сум го повредил Уставот и дека сум дал амнестија што е во надлежност на Собранието. Тие или не ја знаат разликата меѓу амнестијата што ја дава Собранието и помилувањето што го дава Претседателот, или ја знаат, но намерно шират конфузија меѓу граѓаните“, појасни Иванов.
Негираше дека одлуката ја донел за да го поништи Специјалното јавно обвинителство. Толкуваше дека тоа е институција формирана ад-хок, со точно определна наменска цел, согласно договорот на политичките партии, од која се очекува со својата работа да биде во функција на решавање на политичката криза, а не нејзино продлабочување.
„За жал, наместо инструмент за правда, СЈО се покажа како инструмент за уцена. Од сите милион фајлови кои кажуваат дека ги имаат, ги одбра само оние кои се однесуваат на претставниците на власта, односно на ВМРО-ДПМНЕ. Селективниот прогон на СЈО создаде мачна атмосфера во општеството. Јас и јавно прашав по која методологија се одбрани само тие случаи. Одговорот го даде лидерот на опозицијата Заев кој изјави дека Специјалното јавно обвинителство постапува исклучиво по пријави доставени од опозицијата. Значи, наместо специјално обвинителство добивме селективно обвинителство, кое е исклучиво во функција на опозицијата“, беше категоричен Иванов.
Иванов го повика Заев да не блефира
На обвинувањата дека со помилувањата сакал да заштити политичарите, и дека пратил порака дека политичарите се недопирливи, оценувајќи ги за неосновани одговори дека кога беа донесени измените на Законот за помилувања и кога беше создадена нова реалност, ги повлече сите помилувања за политичари.
„Денес, единствениот аболициран политичар во Република Македонија е господинот Зоран Заев. Доколку не блефира, го охрабрувам, врз основа на законските измени да го одржи дадениот збор и да поднесе формално барање за повлекување на неговото помилување“, му порача шефот на државата на челникот на опозицијата.
Иванов негира и дека со повлекувањето на помилувањата признал дека направил погрешна процена, дека го повредил Уставот и законите.
„Напротив. Одлуката за повлекување ја донесов затоа што, за разлика од 12 април, денеска имаме нова реалност во Македонија. Вратена е првобитната состојба. Имаме функционални институции, кои можат да се справат со сите предизвици и закани со кои се соочува државата. Наместо техничка имаме политичка влада што може да носи одлуки и да предлага закони. Собранието повторно работи и носи закони, дури и водеше расправа за предлогот за импичмент на Претседателот“, додаде.
За специјалната војна
Во Македонија се води специјална војна како дел од стратегиите за предизвикување тензии и воспоставување постојани политички кризи со технички влади за неможност во справување со закани и доведување во положба на потчинетост, оцени Иванов и предупреди дека договорот меѓу лидерите сé уште не е целосно исполнет и оти договорените парламентарни избори не се спроведени.
„Во недостиг од политичка програма и решенија за граѓаните, гледаме циркус во Собранието, театар на улиците од оние кои не ги признаваат и ги бојкотираат институциите, повикуваат на безредие и безвластие. Никому не му е забрането да протестира, да го искаже своето незадоволство од власта. Никому не му е оспорено правото јавно да го искаже своето мислење за кое било прашање во државата“, продолжи.
„Но институциите мора да воведат ред. Никаде не се толерира хулиганство, вандализам и уништување на туѓиот имот. Секаде тоа се санкционира. И кај нас таквото насилство мора да престане. Затоа, сакам да упатам порака до сите оние кои придонесоа кон оваа криза. Лидерите на партиите да внимаваат што договараат, олеснувачите да внимаваат какви пакети предлагаат, пратениците да внимаваат за какви закони гласаат“, рече Иванов.
Цивилниот сектор да се дистанцира од профитерите, да се деблокираат интеграциите
Неопходно во овој момент, смета Иванов, автентичниот невладин сектор кој со години конструктивно придонесува кон решавање на бројни проблеми во општеството да се дистанцира од поединци и групи кои протестираат само за да профитираат.
„Ги повикувам партнерите да не ја користат состојбата за остварување свои интереси. Блокирањето на европска и евроатлантска иднина придонесе кон блокирање на политичките процеси во Македонија. Затоа, ги повикувам Европската унија и НАТО да го деблокираат патот на Македонија. Процесот на преговори и затворање на поглавјата досега ќе ги научеше политичките елити на културата на дијалог и компромис“, порача македонскиот претседател.
Македонските политичари да не бидат зависни од надворешни фактори
Иванов им се обрати и на политичките лидери коишто не го признаваат неговиот избор за шеф на државата. Оцени дека тие иако на ја признаваат институцијата Претседател, должни се да не ја загрозуваат независноста и суверенитетот на земјата „со доведување во состојба на потчинетост и зависност „кон други држави, центри на моќ или недржавни актери“.
„Не смее да се дозволи целата држава и народот да биде заложник на карактерите, егото и личната омраза на овие неодговорни политичари. За такви не треба да има место на политичката сцена. Ако во остварување на која и да е цел се водите од омраза и деструкција, тогаш неуспехот е гарантиран“, смета претседателот
На крајот од обраќањето Иванов порача дела тој има одговорност кон граѓаните кои го избрале и му дале легитимитет и оти и во иднина натаму ќе постапува според Уставот и Законите во заштита на државните интереси и националната безбедност./крај/мф
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одземени лиценците за канабис на шест фирми: не им работеле камерите, немале обезбедување, едно имале на хартија друго во магацин
На шест од досега провери 13 компании им се одземени лицентие за одгледување канабис за медицински цели. Министерот за здравство, Азир Алииу, најави дека контролата продолжува во останатите комании кои одгледуваат канабис, а кога ќе заврши проверката кај сите 43 фирми, кои имаат лиценци, ќе се изготви нов, посторг закон.
„Компаниите на кои им е доземена лиценцата за одгледување канабис за медицински цели се ‘Алфа фарм’, ‘Грин лајф’, ‘ЦБД мед план’, ‘Лајф плант’, ‘Ата фарм’ и ‘Канаби доис’. Имаат недостатоци од различни аспекти од административна гледна точка, од инфраструктурна гледна точка, од технолошка гледна точка, од човечки капацитети и така натаму. Во некои од нив внатрешната структура за следење, значи камерите, не работат. Во дел од нив нема човечки капацитети, во дел од нив нема обезбедување, во дел од нив недостасува документација или не се вредностите кои се ставени во извештајот исти или слични со тие што ги имаат внатре. Во дел од нив не се известени институциите, значи Министерството, како надлежно Министерство, во рок од три дена за промените. Затоа комсијата цени дека тие компании не треба да се бават со производство“, рече денес министерот Алиу.
Досегашните контроли во фирмите покажале несоодветно складирање на сув цвет. Тој бил затекнат отврен, без соодветно запечатување и без складирање во пропишаните картонски кутии како што пропишува Законот. Утврдени се и недоставени известувања до комсијата за ивршено производство, берба и купопродажба на сув цвет, откриена е и недоставена целокупна документација и договори поврзани со продажба и трансфер на сувиот цвет како и несовпаѓање меѓу евидентираните и фактички затекнатите количини сув цвет во сеф-собите.
Во контролирањето на компаниите учествуваат МВР, МАЛМЕД, Инспекторатот за земјоделство и Државниот санитарен инспекторат, а откога ќе се исконтролираат сите компании и ќе бидат заведени сите регистрирани пропусти, министерот Алиу вели дека ќе почне подготовка на нов закон.
„Овој процес за контрола на производителите на канабис за медицински цели откри и низа системски слабости, но и назнаки за интернационални празнини во регулативата што може да се користат за злоупотреба. Дефинитвно детектирани се пропусти во Законот. Ќе чекаме до крајот, да се завршат контролите во сите 43 компании, досега се поминати 13, а потоа ќе имаме ново законско решение кое ќе има рамка која нема да може да се злоупотреби, нема да има реченици кои не се до крај доречени за да може да се злоупотребат. Тоа ќе го оставиме на стручните лица кои врз основа на крајниот извештај што ќе го добиеме ќе направат законско решение согласно ЕУ директивите и во согласност со она што недостасува на терен“, рече министерот Алиу.
Вонредни контроли во компаниите кои одгледуваат канабис Владата нареди да бидат направени откога во Србија беа откреини пет тони марихуана произведена кај нас. Во заеднички акции Обвинителството за гонење организиран криминал и полицијата изминатиов период од компаниите кои имаат лиценци за одгледување канабис за медицински цели запленија над 40 тони канабис, а меѓу комапниите на кои денес им е одземена лиценцата е и компанијата поврзана со петте тони марихуана откриена во Србија.
Македонија
(Видео) Тренчевска: Пратениците да гласаат за 600 евра минималец, трудот на работникот мора да се вреднува
Воведувањето и зголемувањето на минималната плата е една од клучните економско-социјални политики насочени кон заштита на животниот стандард на граѓаните и секоја влада која сака да го заштити стандардот на работниците треба да ја зголеми минималната плата согласно инфлацијата и куповната моќ на граѓаните, нагласи пратеничката на СДСМ, Јована Тренчевска на денешната собраниска Комисија за економски прашања, труд и енергетска политика, на која на дневен ред е Предлог на законoт за изменување и дополнување на Законот за минимална плата во Република Северна Македонија, поднесен од пратенчката група на СДСМ и коалицијата.
Во образложувањето на предлог-измените, Тренчевска ги повика сите пратеници да го поддржат зголемувањето на минималната плата на 600 евра, за да се почитува трудот на работниците и да се овозможи секое семејство кое живее со минимална плата да има достоинсвен живот.
Тренчевска посочи дека барањето за 600 евра минимална плата е оправдано. Инфлацијата и трошоците за живот континуирано растат, а мерките кои што владата ги презема не дадоа никаков ефект.
„Имаме годишна инфлација од 4,1%, а кај храната таа инфлација е многу повисока, односно над 5%. Оваа инфлација многу повеќе ја чувствуваат оние граѓани и работници кои имаат ниски примања. Сите оние мерки кои божем ги преземаше владата за да се органичи растот на цените не дадоа никаков ефект. Куповната моќ на граѓаните од месец во месец, од ден во ден, сè повеќе паѓа. Во февруари годинава, само за еден месец синдикалната кошничка се зголемила за околу илјада денари, а во однос на февруари 2025 година, таа се зголемила за 3.609 денари, а во споредба со 2022 година за повеќе од 30.000 денари. Денес ни требаат скоро три минимална плати за да може да се исполни она што е предвидено како основни производи за живот во синдикалната кошничка“, рече Тренчевска.
Во образложението таа нагласи дека улогата на владата во Економско-социјалниот совет како трипартитно тело не треба да се сведе на посредник.
„Таа секогаш треба да биде во заштита на работникот, а не да смета дека е само посредник или модератор на Економско-социјалниот совет. Напротив, Владата е дел од советот, партнер и учесник којшто директно преговара и соработува и со работниците и со работодавачите, а не ги остава работодавачите сами да одлучуваат дали им одговара да се покачи минималната плата на барање на работниците, затоа што тоа никогаш нема да го видиме“, рече Тренчевска.
Потсети дека во 2022 и 2023 година, кога се зголеми минималната плата, владата на СДСМ не ја префрли целата тежина врз работодавачите, ги субвенционираше придонесите, за компаниите да ги зголемат платите а истовремено да не им се наруши ликвидноста.
„Преку субвенционирање на придонесите се обезбеди поддршка за околу 130 илјади граѓани кои зимаа повисоки плати во компаниите. А за сите оние кои беа на минимална плата, Владата обезбеди поддршка на разликата помеѓу претходната минимална плата и онаам минимална плата што беше утврдена во 2022–2023 година. Тоа значи дека компаниите не беа оставени сами на себе, туку и тука се гледа улогата на Владата, да може да ги поддржи и барањата на работниците, но и барањата на работодавачите“, рече Тренчевска.
Македонија
Филков ги повика судскиот и обвинителскиот совет да утврдат дали има одговорност кај судијата и јавниот обвинител за одлуката за куќен притвор
Министерот за правда Игор Филков на прес-конференција упати пораки во врска со одлуката за замена на мерката притвор со куќен притвор во случај поврзан со истрага за проневера од над осум милиони евра.
Во своето обраќање, министерот потенцираше дека Министерството за правда нема да биде нем сведок кога довербата на граѓаните во правниот систем е разнишана, ниту ќе стои на страна кога јавноста со право бара одговори.
„Досега, почитувајќи го принципот на поделба на власта, не сум коментирал конкретни судски и обвинителски одлуки. Тоа е темел на правната држава. Но кога одлуките отвораат сериозни дилеми и ја доведуваат во прашање еднаквоста пред законот, должност ми е да побарам отчетност“, истакна Филков.
Тој нагласи дека станува збор за лице кое 14 месеци било во бегство, за кое бил утврден ризик од бегство – ризик што се остварил – и дека јавноста има право да знае врз основа на кои конкретни факти и правни аргументи е донесена одлуката за поблага мерка.
Министерот јавно ги повика сите инволвирани во постапката да дадат детално и транспарентно образложение за своите одлуки, потенцирајќи дека одговорноста мора да биде лоцирана со име и презиме.
,,Јавно ги повикувам сите актери во постапката да дадат објаснување:
Јавниот обвинител Даниел Коцев,
– да објасни, врз основа на кои конкретни факти и правни аргументи е дадено позитивно мислење за замена на притворот?
Раководителот на обвинителството Анел Фидоски, –дали стои зад оваа одлука и дали смета дека ова е порака за еднаква примена на законот?
Судијата на претходна постапка при Основниот кривичен суд Скопје, Марин Станевски,
– кои околности го надминале ризикот од бегство кај лице кое веќе 14 месеци беше недостапно?” изјави министерот за правда Игор Филков.
Тој информираше дека побарал објаснување и од надлежните институции во однос на условите во притворските установи и најави вонреден надзор во казнено-поправните установи со цел утврдување на безбедносната состојба.
„Залудно носиме закони ако не се спроведуваат. Залудно зборуваме за реформи ако практиката ја руши довербата. Ова не е прашање на политика, туку на принцип“, порача Филков.
Одземени лиценците за канабис на шест фирми: не им работеле камерите, немале обезбедување, едно имале на хартија друго во магацин
На шест од досега провери 13 компании им се одземени лицентие за одгледување канабис за медицински цели. Министерот за здравство,...
Филков ги повика судскиот и обвинителскиот совет да утврдат дали има одговорност кај судијата и јавниот обвинител за одлуката за куќен притвор
Министерот за правда Игор Филков на прес-конференција упати пораки во врска со одлуката за замена на мерката притвор со куќен...
Битолчанец пријавен за обид за убиство на своите деца и напад врз полицајци
СВР Битола поднесе кривична пријава против В.Ф. (42) од Битола поради постоење основи на сомнение за сторени кривични дела „убиство“...
Ми се гади од лицемерието, Артан Груби во куќен притвор, јас 28 месеци во притвор: Јане Ченто за правосудните аршини
По одлуката на надлежните институции, поранешниот прв вицепремиер Артан Груби да биде ставен во куќен притвор со 24-часовен надзор, по...
Беким Сали во работна посета на Украина: „Изразена солидарноста и поддршката кон украинскиот народ“
Првиот вицепремиер и министер за европски прашања, Беким Сали, денес престојува во официјална работна посета на Киев, Украина, каде ќе...
Обвинителството за куќниот притвор на Груби: Се водиме исклучиво од законските основи
Јавното обвинителство како единствен и самостоен орган, при одлучувањето и предлагањето на мерките за обезбедување во сите случаи се води...
(Видео) Зеленски го покажа својот бункер од почетокот на војната и им испрати порака на Украинците
Украинскиот претседател Володимир Зеленски објави видео порака по повод четвртата годишнина од почетокот на целосната инвазија на Русија врз Украина,...
Артан Груби ќе одговара за милионскиот криминал, следува одговорност, велат од ВМРО-ДПМНЕ
По повеќе од година дена поминати во бегство на граничниот премин Блаце е приведен поранешниот вицепремиер во коалицијата на СДС...
„Али Ахмети чека политичка егзекуција од поранешниот најблизок соработник, Артан Груби знае премногу“, велат од ВЛЕН
„Стариот лисец Али Ахмети од вчера, од мајстор на политичкиот занает, стана ранет играч кој чека политичка егзекуција од поранешниот...
Штедачите на Еуростандард банка: Пет и пол години од пропаѓањето на банката, случајот сè уште нема судска разрешница
Поминаа повеќе од пет и пол години од пропаѓањето на Еуростандард банка, а случајот сè уште нема судска разрешница. Голем...
Зеленски: Вашингтон треба да биде со демократска земја која се бори против еден човек
Соединетите Американски Држави „треба да застанат покрај демократска земја која се бори против еден човек“, рече украинскиот претседател Володимир Зеленски,...
Ник Рајнер негираше вина по обвинението за убиството на мајка си и татко си
Ник Рајнер (32), син на познатиот холивудски режисер Роб Рајнер и фотографката Мишел Сингер Рајнер, се изјасни за невин во...
(Видео) Бомбашки напад во Москва: Убиен полицаец, двајца повредени
Еден полицаец беше убиен, а двајца други беа ранети во експлозија рано утрово во центарот на Москва, откако вооружен човек...
Германија: Нема да го молиме Путин
Германскиот министер за надворешни работи Јохан Вадефул изјави дека е начелно отворен за разговори со Москва за одржлив мир во...
Манделсон е ослободен со кауција: Полицијата продолжува со истрагата
Поранешниот британски амбасадор во Соединетите Американски Држави, Питер Манделсон, е ослободен со кауција неколку часа откако беше уапсен во понеделник...
Обвинителството бара замена од затворски во куќен притвор за Артан Груби
Основното јавно обвинителство Скопје побара мерката притвор за поранешниот вицепремиер Артан Груби да биде заменета со куќен притвор. Ваквата одлука,...
Од полноќ нови цени на горивата
Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука...
МНР со апел: македонските државјани кои се наоѓаат на територијата на Мексико да го напуштат во првата безбедна прилика
Поради влошената безбедносна состојба во Мексико, Министерството за надворешни работи и надворешна трговија апелира до македонските државјани кои се наоѓаат...
(Видео) Кузеска за Груби: ДУИ го спасува Мицкоски
Секој што го прекршил законот мора да одговара. ДУИ го спасува Мицкоски. Му фрлија гума за спасување. После денешниот театар...
СДСМ e нервозeн поради апсењето на Груби, стравува од откривање афери, велат од ВМРО-ДПМНЕ
ВМРО-ДПМНЕ верува дека во СДСМ владее нервоза и фрустрација поради апсењето на поранешниот вицепремиер, Артан Груби и дека постои страв...
