Министерот за транспорт и врски, Миле Јанакиески, на меѓународната конференција „Патишта на свилата: инспирации и можности“, што се одржува во петок, 12ти декември, во Истанбул, Турција, побара еден крак од новиот „Пат на свилата“ да поминува низ Македонија. 

„Македонија длабоко ја цени добрата регионална поврзаност и решенијата за добра регионална мрежа. Како крстопат на Балканот, повикувам еден крак од новиот „Пат на свилата“ да поминува низ Македонија, потпирајќи се на новата и подобрена инфраструктура. Ги повикувам сите држави чии претставници се денес овде, особено оние во регионот на југоисточна Европа да соработуваат на сите нивоа, имплементирајќи проекти кои се од корист за нашите граѓани и кои ќе овозможат подобар економски развој и подобра поврзаност“, рече Јанакиески. 

Во своето обраќање, тој ги претстави актуелните инфраструктурни и транспортни проекти кои се реализираат во Република Македонија во патниот сообраќај и железницата. Јанакиески ја поздрави иницијативата за воспоставување на новиот „Пат на свилата“, како сет од транспортни коридори кои целат кон обединување на евроазиската инфраструктура и олеснување на пристапот и транспортот. 

„Патот на свилата“ е историска мрежа на меѓусебно поврзани рути во Евроазаија, преку кои се одвивал транспортот на стока од работ на Азија до центарот на Европа во период од речиси 3.000 години. 

На меѓународната конференција „Патишта на свилата: инспирации и можности“ се предвидени обраќања и на претставници од повеќе држави, меѓу кои Турција, Србија, Црна Гора, Албанија, Хрватска, Азербејџан, Кина, Шпанија и Пакистан, како и претставници на различни меѓународни научни, политички и економски институции, меѓу кои и Советот за развој и истражувања на Кина, Центарот за стратешки студии, Фондацијата за политички, економски и социјални истражувања и Универзитетот Кембриџ.крај/мф