Мојата изјава беше во насока на укажување на важноста на нашите истраги и улогата на фер и демократските избори во градењето на институциите и нивниот легитимитет, и истата не беше во насока на деградирање на државните институции, се вели во писмената изјава на Специјалната јавна обвинителка, Катица Јанева по реакциите во јавноста за нејзината изјава со која ги доведе во прашање изборите, а претседателот, уставните судии и пратениците рече дека се нелегитимни.

„Како што и во самата изјава наведов, имајќи ги предвид досега собраните материјални докази кои што укажуваат на бројни нерегуларности кои се случиле во изборниот процес, имаме основано сомневања по односна резултатот од тој изборен процес. Целта на нашите истраги и евентуални обвиненија останува санкционирање на оние за кои што ќе биде докажано дека учествувале во изборни измами и генерална превенција на слични однесувања во правец на обезбедување услови за избори лишени од изборни нерегуларности, со цел изборниот резултат вистински да ја отслика волјата на граѓаните и полна доверба во институциите“, се вели во писмената изјава на Јанева. Јанева останува на ставот дека нема законска обврска да го презентира извештајот пред Советот на јавните обвинители и пред Собранието и изразува подготвеност да им ги појасни сите нејаснотии на членовите на Советот на јавни обвинители. „Барањето на Советот на јавни обвинители јас да присуствувам на Седница на Советот го пренебрегнува  начелото на автономност на ова Јавно обвинителство, согласно кое ниту еден јавен обвинител во Република Македонија, вклучително и Јавниот обвинител во Република Македонија не може да бара извештаи поврзани со предмети од надлежност на ова Јавно обвинителство. Доколку Советот на Јавни обвинители смета дека му се потребни одредени појаснувања по однос на некои други аспекти од мојот извештај, подготвена сум за истите да дадам такво појаснување во рамките на можностите“, се вели во писмената изјава на Јанева.Во нејзината изјава на прес – конференцијата во вторникот што предизвика реакции во јавноста Јанева рече дека доказите кои ги имаат докажуваат дека изборите се доведени во прашање.„Се работи за осомничени лица за изборни нерегуларности и тоа за 2011, 2012, 2013 година. Со самите истраги за овие лице кои биле и се на високи позиции во Владата на Македонија и со 80 отсто од доказите кои располагаме го докажуваат обвинението со кое имаме намера во иднина да настапиме. Јас лично, а и членовите од мојот тим, сметаме дека самиот избор и на Претседателот и на Уставни судии и на пратениците е доведено во прашање. Мислам дека сите овие се нелегитимни институции и треба да го почитуваат Специјалното обвинителство и нивните истраги за да ја утврдиме вистината“, изјави Јанева./крај/мф/ффс