Македонија
Kамчев ја повлече тужбата против Зоран Милески-Кичеец

Орце Камчев ја повлече тужбата против Зоран Милески-Кичеец, третоосуден во случајот „Рекет“. Ова го констатира судијата Андреј Димовски на денешното рочиште во Граѓанскиот суд, каде што Орце Камчев бараше еден милион да му исплатат Бојан Јовановски-Боки 13, Катица Јанева и Кичеец, како и државата. Судијата Димовски констатира дека тужбата против Кичеец е повлечена за надоместок на над 92 милиона.
„Ценејќи дека во текот на постапката поднесе поднесок за повлекување на тужбата против Зоран Милески од Скопје, судот донесе решение: се констатира повлекување на тужбата на тужителот Јордан Камчев против третотужениот“, посочи судијата.
Адвокатот Медарски се согласи со повлекувањето на тужбата. Ова следува кога на првото рочиште Камчев преку адвокат рече дека нема да бара враќање на дел од милионот.
„Согласни сме со откажувањето на тужбеното барање кон третотужениот“, рече Медарски.
Лазар Јанев, адвокат на ексспецијалната обвинителка Катица Јанева, рече дека Орце Камчев се обидува да повторува иста лага за да стане вистина.
„Во недостиг на правна основа на ова тужбено барање, тужителот се обидува во повеќе наврати да ни повтори една иста лага сѐ со цел таа да стане вистина и затоа бараме судот да има предвид дека полномошникот на тужителот и во тужбата и во одговорот на тужбата и во претходно доставените барања, со доставување на пресудата на Кривичниот суд, всушност сака само да го сврти вниманието во погрешна насока, а не во насока на одредбите во Законот за облигационите односи и Законот за спречување на корупцијата“, рече Јанев.
Адвокатот Александар Михајловски на рочиштето раскажуваше како според бизнисменот Орце Камчев биле земени парите од Бојан Јовановски и Катица Јанева.
„Тужената Катица Јанева во таканареченото СЈО на 13.10. 2018 година одржала прес-конференција 16 месеци по поминатиот законски рок за поведување истраги во согласност со посебниот закон, а на која објавува дека се почнати истраги по три предмети – ‘Империја’, ‘Базни станици’ и ‘Поштенска банка’. Прес-конференцијата е 16 месеци по изминување на рокот за поведување истраги. Сите предмети немале допирна точка со предметот на работа на СЈО од причина што предмет биле незаконски прислушувани материјали предадени од тогашниот лидер на опозицијата, а за кое било формирано СЈО. Но, во сите предмети осомничени биле познати македонски стопанственици. По објавата на оваа прес-конференција и највата за водење на тие истраги, на сцена стапил тужениот Бојан Јовановски, кој од пресудата што ја цитирав (‘Рекет’) бил во блиски релации со тужената Катица Јанева и со самата пресуда е утврдено влијание што го имал врз тужената Катица Јанева, и пристапил кон сите овие стопанственици со понуди за разни видови соработки. Пред сѐ, да платат реклами во тогашната телевизија ‘1ТВ’, како и да финансираат наводни проекти. Очигледна била спрегата помеѓу тужената Катица Јанева и тужениот Бојан Јовановски да се отворат предмети против стопанственици за да може да бидат изнудувани средства. Во пресудата ќе видите искази на сведоци на кој начин биле изнудувани средства. Така, од тужителот на повеќе средби биле изнудувани пари – прво да плати реклами во тогашната ‘1TВ’, да финансира изградба на шопинг-молови, да финансира изградба на старски домови. Кога тужителот ги одбил сите овие понуди, настапува второтужената Катица Јанева со јавно објавување на предметот и изрекување мерка притвор. По сите притисоци, се потврдува мерката за тоа кој ги држи конците, кој ја контролира ситуацијата и на кој начин да ја прифати изнудата“, рече Михајловски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Движењето ЗНАМ со панел-дискусии одбележа една година дел од Владата

Во полна сала, со силна енергија и инспиративни пораки, Движењето ЗНАМ –за наша Македонија, одржа панел дискусија под мотото „Посветеност –Отчетност – Резултати“. Во фокусот на настанот беше една година учество на Движењето ЗНАМ – за наша Македонија во Владата и што е направено досега.
Настанот беше поделен во два тематски панели, кои отворија прашања за реформите во јавната администрација, енергетиката, животната средина, правосудството, дигитализацијата, пензискиот систем, односите со верските заедници и здравството.
Во рамки на првиот панел „Јавната администрација и зелената иднина“,
каде панелисти беа министерот за јавна администрација Горан Минчев,
заменик-министерот за енергетика, рударство и минерална суровина
Мирослав Лабудовиќ, државниот секретар во министерството за
земјоделство, шумарство и водостопанство Борче Серафимовски,
директорите на Државниот инспекторат за животна средина Ивана Гиновска и Институтот за Акредитација Нико Берберу. Се говореше за реформските закони, енергетиката, земјоделието, животната средина и европската акредитација. Во него беше потенцирано дека реформите во државната служба се движат кон поефикасен, инклузивен и модерен јавен сектор кој е во служба на граѓаните. Истакнати беа стратешките вложувања во енергетиката и поддршката за земјоделците, особено младите, со фокус на дигитализација,
задругарство и климатска отпорност.
Дополнително, беа презентирани политики за заштита на животната средина засновани на превенција и одговорност на сите општествени чинители, како и значењето на европската акредитација за конкурентноста на македонската економија.
Низ вториот панел „Силни институции – стабилно општество“, министерот за правда Игор Филков, заменик министерот за дигитална трансформација Радослав Настасијевиќ Варџиски, директорот на Фондот за ПИОМ Никола Мемов, претседателката Комисијата за односи верските заедници и директорот на Клиниката за физикална медицина Злате Мехмедовиќ.
Во дискусиите панелистите истакнаа дека реформата започнува со
транспарентна комуникација, дигитална достапност, правна сигурност и
социјална инклузивност.
Вториот панел ја нагласи клучната улога на транспарентноста и реформите во правосудството, при што беа презентирани системски закони насочени кон зајакнување на интегритетот, професионалноста и независноста на судството, како и целосно нов Закон за Судски совет.
Панелистите дискутираа и за стабилизацијата на пензискиот систем,
дигиталната трансформација на институциите, унапредувањето на
здравството и важноста од градење на општество засновано на меѓусебна почит и верски дијалог.
Движењето ЗНАМ уште еднаш покажа дека со интегритет, стручност и
посветеност, Македонија може да чекори напред – обединета, сигурна и достојна, со најава дека настани од ваков тип ќе следат низ целата
држава.
Македонија
Директорот на БЈБ на планинарски марш од пет километри во тетовско: Службата не е само униформа – таа е братство

Директорот на Бирото за јавна безбедност во Министесрвтвото за внатрешни работи (МВР), Александар Јанев, денеска учествуваше на планинарски марш со полициски службеници од СВР Тетово, извести МВР. Досега вакви маршови се пдржаа во Велес, Струмица и Битола.
„Во духот на соработката, заедништвото и искрената комуникација, заедно го градиме оној полициски идентитет кој значи блискост со граѓаните, одговорност кон задачата и сила која извира од заедничките вредности. Надвор од канцелариите и рутините, утрово низ заедничка активност со пешачење од околу 5 км низ тетовскиот регион имавме можност да го јакнеме тимскиот дух, но и – што е најважно – подлабоко да се дозапознаеме, да зборуваме отворено за предизвиците на теренот, за реалните проблеми со кои се соочуваме, и за начинот како уште повеќе да се доближиме до граѓаните од Тетовскиот регион. Полицијата не се мери само со акции и бројки. Таа се мери со довербата што ја има кај народот. А таа доверба се гради со постојано присуство, искрен дијалог и подготвеност да се биде со граѓаните – и кога е тешко, и кога е мирно.“, кажа на маршот директорот Јанев.
Директорот Јанев потенцираше дека градиме полиција која не се плаши да ги погледне проблемите во очи и што чекори напред со дигната глава – за стабилноста на државата, за безбедноста на граѓаните, и за достоинството на полициската професија.
„Македонија има полиција што се движи напред – тим по тим, регион по регион – со срце за народот и со сила за предизвиците. Градиме тимови што се потпираат еден на друг – мотивирани, дисциплинирани и посветени на заштита на секој граѓанин. Затоа што секоја лична победа е колективна сила, а секој ден е нова можност да станеме подобри – за себе, за колегите, и за Македонија.“, истакна на крај Јанев.
Македонија
Средба Филипче-Клингбајл во Берлин: Македонија мора да продолжи по европскиот пат

Претседателот на Социјалдемократскиот сојуз на Македонија, Венко Филипче, денеска во Берлин, Сојузна Република Германија, во рамки на Конгресот на германската Социјалдемократска партија (СПД), се сретна со актуелниот вицеканцелар на Германија и сојузен министер за финансии, Ларс Клингбајл, кој воедно е и ко-претседател на СПД.
Од СДСМ известија дека на средбата, претседателот Филипче изразил благодарност до вицеканцеларот Клингбајл, за континуираната и силна поддршката на СПД за евроинтеграцискиот процес на Македонија, посочувајќи дека како сестрински партии, ја споделуваат истата визија за праведна, обединета и солидарна Европа.
„Филипче и Клингбајл разговараа за забрзувањето на евроинтеграцискиот процес на Македонија, како и на земјите од регионот и Западен Балкан, оценувајќи го како клучен процес за стабилизација, развој и напредок на државите-кандидатки за членство во Европската Унија. Беше посочено дека само со вистинска интеграција во ЕУ може да се обезбеди одржлив напредок – и економски и институционален, особено во однос на владеењето на правото и борбата против корупцијата.
Заеднички беше ставот дека Македонија мора да продолжи по европскиот пат, како единствена алтернатива за напредок и подобра иднина на државата“, извести СДСМ за средбата на лидерот во Берлин.
Филипче го потсетил Клингбајл дека во периодот на Владата предводена од СДСМ беа реализирани клучните стратешки цели – Македонија стана членка на НАТО и ги отпочна преговорите за членство во ЕУ.
Обајцата на средбата ја нагласиле потребата од натамошно унапредување на меѓупартиската соработка и размена на искуства меѓу СДСМ и СПД, како сестрински партии кои делат заеднички социјалдемократски вредности, базирани на солидарност, еднаквост, владеење на правото и социјална сигурност.