Македонија
Kамчев ја повлече тужбата против Зоран Милески-Кичеец

Орце Камчев ја повлече тужбата против Зоран Милески-Кичеец, третоосуден во случајот „Рекет“. Ова го констатира судијата Андреј Димовски на денешното рочиште во Граѓанскиот суд, каде што Орце Камчев бараше еден милион да му исплатат Бојан Јовановски-Боки 13, Катица Јанева и Кичеец, како и државата. Судијата Димовски констатира дека тужбата против Кичеец е повлечена за надоместок на над 92 милиона.
„Ценејќи дека во текот на постапката поднесе поднесок за повлекување на тужбата против Зоран Милески од Скопје, судот донесе решение: се констатира повлекување на тужбата на тужителот Јордан Камчев против третотужениот“, посочи судијата.
Адвокатот Медарски се согласи со повлекувањето на тужбата. Ова следува кога на првото рочиште Камчев преку адвокат рече дека нема да бара враќање на дел од милионот.
„Согласни сме со откажувањето на тужбеното барање кон третотужениот“, рече Медарски.
Лазар Јанев, адвокат на ексспецијалната обвинителка Катица Јанева, рече дека Орце Камчев се обидува да повторува иста лага за да стане вистина.
„Во недостиг на правна основа на ова тужбено барање, тужителот се обидува во повеќе наврати да ни повтори една иста лага сѐ со цел таа да стане вистина и затоа бараме судот да има предвид дека полномошникот на тужителот и во тужбата и во одговорот на тужбата и во претходно доставените барања, со доставување на пресудата на Кривичниот суд, всушност сака само да го сврти вниманието во погрешна насока, а не во насока на одредбите во Законот за облигационите односи и Законот за спречување на корупцијата“, рече Јанев.
Адвокатот Александар Михајловски на рочиштето раскажуваше како според бизнисменот Орце Камчев биле земени парите од Бојан Јовановски и Катица Јанева.
„Тужената Катица Јанева во таканареченото СЈО на 13.10. 2018 година одржала прес-конференција 16 месеци по поминатиот законски рок за поведување истраги во согласност со посебниот закон, а на која објавува дека се почнати истраги по три предмети – ‘Империја’, ‘Базни станици’ и ‘Поштенска банка’. Прес-конференцијата е 16 месеци по изминување на рокот за поведување истраги. Сите предмети немале допирна точка со предметот на работа на СЈО од причина што предмет биле незаконски прислушувани материјали предадени од тогашниот лидер на опозицијата, а за кое било формирано СЈО. Но, во сите предмети осомничени биле познати македонски стопанственици. По објавата на оваа прес-конференција и највата за водење на тие истраги, на сцена стапил тужениот Бојан Јовановски, кој од пресудата што ја цитирав (‘Рекет’) бил во блиски релации со тужената Катица Јанева и со самата пресуда е утврдено влијание што го имал врз тужената Катица Јанева, и пристапил кон сите овие стопанственици со понуди за разни видови соработки. Пред сѐ, да платат реклами во тогашната телевизија ‘1ТВ’, како и да финансираат наводни проекти. Очигледна била спрегата помеѓу тужената Катица Јанева и тужениот Бојан Јовановски да се отворат предмети против стопанственици за да може да бидат изнудувани средства. Во пресудата ќе видите искази на сведоци на кој начин биле изнудувани средства. Така, од тужителот на повеќе средби биле изнудувани пари – прво да плати реклами во тогашната ‘1TВ’, да финансира изградба на шопинг-молови, да финансира изградба на старски домови. Кога тужителот ги одбил сите овие понуди, настапува второтужената Катица Јанева со јавно објавување на предметот и изрекување мерка притвор. По сите притисоци, се потврдува мерката за тоа кој ги држи конците, кој ја контролира ситуацијата и на кој начин да ја прифати изнудата“, рече Михајловски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ламата во скопската Зоолошка пцовисала од туберкулоза: „Направивме сѐ во лекувањето“

Ламата во скопската Зоолошка градина пцовисала од туберкулоза.
Се огласија од ЗОО Скопје велејќи дека заедно со Факултетот за ветеринарна медицина ја лекувале и третирале и било направено сѐ од медицински аспект и грижа.
„Обдукцијата и резултатите (со ПЦР-метода) кај оваа лама покажаа туберкулоза во процес постар од пет години. За оваа болест кај животните нема лек, ниту постои вакцина, а често и со години заболените единки не покажуваат никакви симптоми“, велат од ЗОО Скопје.
Се додава дека во соработка и советување со АХВ (Агенцијата за храна и ветерина) направени се туберкулински тестови на сите лами и секојдневно се следи нивната ситуација и се под медицински надзор.
Ламите се домашни животни од фамилијата камили, кои потекнуваат од Јужна Америка.
Македонија
Хаотични изјави на власта за царините од САД, доста беа експерименти, вели Костова од СДСМ

Хаотични и несериозни изјави на власта за царините од САД. Наместо владини експерименти со економијата, потребна е сериозност и одговорност. Ваква е оценката на СДСМ за односот на власта по царината за увоз на македонски производи од 33 отсто што ја воведе САД.
Потпретседателката на опозициската партија, Кристина Костова, изјави дека најпрвин власта тврдеше дека царините се очекувани и немало да имаат ефект, за вчера да настапи со изјава воведувањето на царините било грешка.
Ова не е само несериозност, вели Костова, туку крајна неодговорност со директни последици, врз економијата, врз државата.
„Одлуката на САД за воведување на царини до 33 отсто за Македонија – меѓу највисоките во Европа – е уште еден пораз за Владата и нејзината надворешна политика. Спектакуларните изјави дека сме влегле во периметарот и оптиката на новата американска администрација потонаа целосно. Она што загрижува најмногу е фактот дека Владата нема никаков план, нема проценка, нема насока. Не знаат што прават, каде тераат“, рече Костова.
СДСМ смета дека владата мора веднаш да седне на маса со претставници од американската администрација и да започне сериозни преговори. Секое друго сценарио, секоја избрзана мерка, како што велат од опозициската партија, може дополнително да ги влоши состојбите.
Македонија
И јас и Таравари вчера избегавме од ДУИ, сега преговори со нив значат испорачување фактури од ДУИ, вели Меџити

Сите коалиционери во „Вреди“, освен министерот за здравство и лидер на Алијансата за Албанците, Арбен Таравари, сметат дека единствена опција им е коалицијата да прерасне во политичка партија. Министерот за животна средина и лидер на партијата Демократско движење, која е дел од „Вреди“, Изет Меџити, денес, јавно, од говорницата во Владата го повика Таравари да ги прекине преговорите со ДУИ и да остане во „Вреди“ за Албанците да имаат два табора, како што има во Косово и во Албанија.
„Јавно го поканувам Таравари да рефлектира. Тој е дел од ‘Вреди’, го сакаме внатре во ‘Вреди’. Граѓанинот, гласачот, сака ‘Вреди’ да се фузира во една партија за да има два табора во албанскиот блок, да има конкуренција меѓу Албанците. Да не биде еден наспроти десет и да се распредели албанскиот глас, туку да има два табора. Најсилниот табор е ‘Вреди’, каде што е Алијансата на Таравари, каде што го посакуваме, но крајно време е да се повлече од преговорите со ДУИ. Не може да биде и дел од ‘Вреди’ и да разговара со ДУИ“, рече Меџити.
Тој побара Таравари да се одлучи и да пресече оти не е во интерес ниту на коалицијата ниту на граѓаните да преговара со ДУИ.
„И јас и тој вчера избегавме од ДУИ, која не беше на ова дереџе. Сега една ДУИ, која е на црните листи, со половина претседателство барани за корупција, соработката со нив ќе значи дека треба да се испорачаат и фактури од таму оти тие ќе имаат некои барања. Преговорите со ДУИ значат дека може да испорачаат и фактури од ДУИ. Тогаш ќе се коси со политиките на Владата“, рече Меџити.
Тој и денес, исто како и претходните денови, објаснуваше дека коалицијата „Вреди“ е формирана како антипод на ДУИ и дека идејата да прерасне во една политичка партија е од формирањето на коалицијата. Се чекал погоден момент, а наводните преговори на Таравари со ДУИ биле аларм дека тоа мора да се направи сега.
„Ова не е нова идеја, туку е идеја од самиот почеток. Тогаш не сакавме ниту да избрзуваме со овој процес ниту да го оставиме на заборав. Затоа оценивме дека е време, особено со овие превирања, каде што господинот Таравари јавно искажува дека има две опции, се поставува како партнер, не дел од ‘Вреди’, значи може да преговара и со ‘Вреди’ и со ДУИ. Во оваа ситуација оценивме, другиот дел од ‘Вреди’, дека е време да ги затвориме темите на мали политички партии и да ја формираме ‘Вреди’ како алтернатива на Албанците, која ги донесе промените, победи на изборите и ќе ги предводи промените за граѓаните да ги чувствуваат разликите“, рече Меџити.
Преминот на „Вреди“ од коалиција во еден политички субјект, според Меџити, реално е почнат од минатата година оти веќе имаат заеднички тела, како што се центарот за информирање, кадровската комисија и други тела во кои свои членови имаат сите коалиционери во „Вреди“.
Како коалиција, Меџити рече дека „Вреди“ освоила историски рекорден број гласови како албанска опозиција, но гласовите не се само на една партија, која е дел од коалицијата, туку на сите заедно и затоа смета дека обврска им е така и да продолжат.
„Од деведесеттите досега имало коалиции и коалиции. Десетици и стотици коалиции во Република Северна Македонија, но никогаш не се случило во влада да се заедно, а на локални да одат на посебни листи и да се поделат“, рече Меџити и потврди дека Таравари бил надгласан од другите коалиционери оти предложил сите да одат со посебни листи.
Како втор политички аргумент против предлогот на Таравари, Меџити наведе дека за листите за советници основата е Донтовиот систем, кој ги фаворизира големите.
„И ние како ‘Вреди’ сме во големите и место да користиме гласови, кои ќе изгорат кај малите политички субјекти, ние бараме од големите да преминеме кај малите. Тоа веќе не е во интерес и во функција на ‘Вреди’, туку оди во прилог на друга политичка партија“, рече Меџити.
Министерот за здравство и лидер на Алијансата за Албанците, Арбен Таравари, пак, вчера рече дека ако другите коалиционери во „Вреди“ веќе се договориле да се спојат во една политичка партија, тој е подготвен да им го отстапи името „Вреди“, а на локалните избори да излезат сами како Алијанса за Албанците. Отсечно негира дека преговара со ДУИ за локалните избори и рече дека му се допаѓа концептот „Вреди“ да прерасне во политичка партија.