„Ќе ги вратиме и парите украдени од граѓаните, а ќе ги вратиме и младите. За поддршка и вработување на млади и стручни кадри ќе формираме фонд за млади во износ од 2 отсто од Буџетот“ вети во сабота пред граѓаните на Крива Паланка, Весна Стоименовска, носител на листата на изборна единица број 3 од Коалицијата за промени и правда.

Стоименовска им порача на жителите од Крива Паланка дека сликата е секаде иста, луѓето тешко живеат, а младите се иселуваат. Овој режим не само што ги изнесе парите, туку ги исели и младите, рече таа.

Нема вработувања, граѓаните не можат да си ги платат сметките, за младите нема перспектива и тие си заминуваат.

„Но, порачуваме ќе ги вратиме и парите украдени од граѓаните, а ќе ги вратиме и младите. За поддршка и вработување на млади и стручни кадри ќе формираме фонд за млади во износ од 2 отсто од Буџетот. Така, прво ќе се задржат оние млади што веќе се тука бидејќи ќе им се обезбеди директна перспектива, но тоа ќе значи и можност оние што заминале да имаат причина да се вратат. Имајте на ум дека на Запад нашите паметни млади не ги земаат за експерти, туку за работници. Тука ако останеа, ќе беа интелектуалци без пари со уништен живот. Со овој фонд ќе им се даде шанса за нов почеток, тука кај нивните семејства”, изјави Стоименовска пред насобраните жители.

Како одговор на невработеноста, ќе се фокусираат на реална и максимална поддршка на отворање на мали и средни претпријатија со 3-5 вработени и ќе ги изедначиме условите за инвестирање како за странските, така и за домашните компании./крај/со/бб