Македонија
Куновски: Им се заблагодаруваме на ДПМНЕ бидејќи ни направија голем маркетинг

Ѝ се заблагодаруваме на партијата во стечај ДПМНЕ, бидејќи ни направија голем маркетинг и ни помогнаа да стигнеме до каде што сме сега, изјави членот на партијата „Левица“, Владимир Куновски кој заедно со неговиот колега Здравко Савевски во петокот добија укинување на куќниот притвор.
„Се заблагодарувам и на Обвинителството кое даде школски пример што се тоа двојни стандарди и ги разби митовите, односно понуди докази во коишто се гледа напад на служебните лица, поточно на старешини на Единицата за брзо распоредување, но нема покренато ниту една кривична постапка за напад на службено лице“, рече Куновски.Според него, во државата има безбедносна криза, бидејќи државните органи се користат само за лични интереси, а не за државни. Судот претходно во петокот им го укина притворот на Куновски и на Савевски, и им одреди мерки за претпазливост, односно одземање на патната исправа и да се јавуваат во определен рок во Судот. Притворот беше укинат на барање на одбраната на обвинетите, но и со согласност на Јавната обвинителка. Адвокатот Сашо Дуковски рече дека не постои опасност од повторување на делото бидејќи веќе не се организираат секојдневно протести и дека нема опасност од бегство, бидејќи обвинетите не направиле никаков престап додека беа во притвор, 45 дена.И обвинителката Снежана Бундалевска се согласи дека притворот е беспредметен, но побара од Судот, сепак, да им го огранични движењето на обвинетите, онаму каде што ќе се одржуваат протести, но судијката не го прифати ова барање. Судењето повторно се одложи за на 6-ти јули, бидејќи судијката побара од одбраната да достави договор за закуп од Народната канцеларија на Претседателот, Ѓорге Иванов бидејќи одбраната тврди дека поседува имотни листови во кои не е наведено дека канцеларијата е во сопственост на државата.На судењето одбраната го оспори вештачењето што го изготви Државното правобранителство, бидејќи според неа не било изработено по наредба на Јавниот обвинител, како што предвидува Законот за кривична постпака, туку било изработено по наредба на „наводно оштетениот“. Адвокатот побара судијата да го издвои вештачењето од списите на доказите бидејќи, според него, направено е на незаконски начин и не може врз база на него да биде донесена пресуда. Тој достави имотни листови до Судот, според кои Народната канцеларија на Претседателот не била во сопственост на државата, туку како сопственици се јавувале правни и физички лица. Следствено на тоа, Дуковски тврди дека државата не може да биде оштетена, бидејќи не е сопственик. Судијата побара и договор за закуп на Народната канцеларија на Претседателот за да може да одлучи дали ќе го прифати предлогот на одбраната. Обвинителството ги товари Савевски и Куновски дека на 13-ти април учествувале на протестите против одлуката за аболицијата и учествувале во демолирањето на Канцеларијата на Претседателот.Тие се товарат за учество во толпа што ќе стори кривично дело. Бирото за судски вештачења процени дека при демолирањето демонстрантите направиле штета од 522.000 денари. Толпата ги искршила прозорците и влезната врата на канцеларијата, го искршиле инвентарот внатре во канцеларијата, дел го изнесле надвор и го запалиле, а дел бил одземен./крај/мф/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.