По инцидентот во кој пациент рани лекар, лекарите од Универзитетската клиника се револтирани и бараат заштита, но не се собраа како што најавија, во паркчето, во кругот на клиниките.

Првично лекарите од скопската Универзитетстка клиника најавија протестен собир, но откако неколку лекари излегоа, се премислија и влегоа во амфитеатарот на Хируршката клиника. Еден од лекарите таму ги повика и новинарите, но сепак не беа примени, а докторите најавија изјава за подоцна.По неколкуминутен собир во  амфитеатарот од каде што можеше да се чуе ракоплескањe, лекарите излегоа и го осудија инцидентот и побараа поголема заштита.Д-р Викторија Вујовиќ, од Клиниката за психијатрија, рече дека пукањето кон „белиот мантил е пукање кон целиот свет“. Таа рече дека со ништо не може да се оправда однесувањето на пациентот кој пукал, дури тоа и да било во афектна состојба.

„Непочитување на белиот мантил, непочитување на човекот кој дава се од себе, пукање со пиштол во него. Тука треба, ако мене некој ме праша, за сторителот на делото  висока казна. Не знам, но тука нема оправдување дека нешто се случило по наплив на афект, дека нешто се случило по наплив на вознемирувачка емоција. Сите ние за жал губиме во животот, членови на нашето семејство, драги лица, но тоа не значи дека на тој што помагал, треба во него да пукаме“, изјави Вујовиќ.

Д-р Викторија Чаловска од Клиниката за гастроентерохепатологија, исто така, рече дека пукањето кон „белиот мантил“ е недозволиво, но сепак не го лоцира виновникот за ваквиот еплог.

„Денес беше пукано во нашата професија. Мислам дека е крајно време да се преземе нешто за заштита на нашата безбедност, на нашето достоинство и воопшто за нашиот статус. Загрозено е нашето физичко опстојување. Мислам дека јавноста треба да биде информирана дека ова што се случува е крајно сериозно и не може да води до никакво подобрување на состојбите ако докторите не се заштитени. Во здравството се случуваат пресериозни и преопасни работи, тоа што се случува не е здраво, не е нормално. Постојано сме напаѓани, имаме тензија, имаме закани од пациенти. Ова е епилог на нешто што тлее во здравството“, изјави Чаловска.На клиниката за хирургија дојде и министерот за здравство Никола Тодоров, но ги одбегна новинарите и не даде изјава.Според  неофицијални информации, лекарот, Љубомир Огненовиќ се здобил со три прострелни рани во ногата, но во момeнтов се наоѓа надвор од животна опасност. Од полицијата сé уште не излегуваат со информации што точно се случило, освен дека за инцидентот се приведени три лица.Пациентот бил револтиран, бидејќи по операцијата неговата мајка починала и поради тоа пукал кон лекарот, а во исто време им наредил да легнат на сите што во моментот биле таму и им се заканувал.Денеска на хирургија не се извршуваат операции, освен за итни случаи, а другите пациенти се препраќаат низ други клиники./крај/мф/ффс 

Извор: Макфакс