Министерството за здравство со патен налог ќе упатува доктор специјалист од една во друга јавна здравствена установа низ земјава кој ќе престојува од три до пет дена во текот на месецот, со цел надминување на проблемите во здравствениот систем како резултат на недостиг на определени специјалисти во определени подрачја на државата.

Министерот за здравство, Никола Тодоров го најави новиот проект на министерството „Наш специјалист“ кој ќе стартува од сабота во Берово и Валандово поради недостатокот на специјалисти низ земјава.„Поаѓајќи од проблемот кој го имаме детектирано, а тоа дека во определени подрачја на државата нема доволен број или воопшто нема специјалисти од некоја област и како резултат на тоа граѓаните од тој град или регион се принудени за конкретната здравствена услуга да патуваат до најблиската клиничка или општа болница во регионот со што се изложуваат на трошоци, а се прави и оптоварување на докторите кои работат во тие клинички и општи болници каде ја има таа специјалност одлучивме да предложиме вакви законски измени Министерството преку детална анализа да може да носи одлука за надминување на овој проблем“, посочи Тодоров.Според него, трајно решение на овој проблем е создавање кадар во таа област. За жал, појасни, кадар во областа на медицината не може да се создаде преку ноќ, за тоа се потребни пет, шест и повеќе години и за да се надмине проблемот го претставуваме проектот „Наш специјалист“. Според анализата што ја направиле од системот „Мој термин“ утврдиле во кои градови пациентите најчесто се упатувани во други градови или болници и колкав е тој број на упати во текот на еден месец и како резултат на тоа одлучиле да отпочнат во определени специјалности во определени градови.„Во Берово констатиравме дека има голем број упатувања во две специјалности-ортопедија и неврологија. Затоа одлучивме во Берово од 4 април секоја сабота да упатуваме ортопед од 8 до 15:30 часот, кој ќе ги прегледува пациентите кои имаат потреба од ваков вид здравствени услуги. Во Берово изминатиот период имало 2.262 упати кон специјалист ортопед кои не можеле да се реализираат во градот од причина што нема специјалистичко консултативна амбуланта од областа на ортопедијата па пациентите се препраќале во Клиничката болница во Штип“, рече Тодоров.Во Здравствениот дом во Берово секоја сабота од 8 до 15:30 часот ќе биде упатен и доктор невролог, имајќи предвид дека изминатиот период имало 1.161 упат на оваа специјалност на пациенти од тој град до друга здравствена установа главно во Клиничката болница во Штип.„Во Валандово проектот стартува исто така на 4 април и секоја сабота од 8 до 15:30 часот ќе има специјалист од областа на неврологијата. Во тој град за невролошки прегледи имало 1.111 упати во изминатиот период со што се исполнети условите за испраќање доктор специјалист од оваа област. Проектот го спроведуваме наменски таму каде се забележани најголем број упатувања кон одредена специјалност со цел да се растоварат упатувањата и да се намали времето на чекање во болниците и клиниките“, истакна Тодоров./крај/мф

Извор: МИА