Македонија
Лидерска до вторник, но само со конкретни предлози
Лидерска средба, како прв чекор за излез од политичката криза, може да се очекува најдоцна до вторник, следната недела, но само ако има конкретни предлози.
Во вторник попладне завршија билатералните средби на претставниците на партиите потпишнички на Договорот од Пржино, со евроамбасадорот Аиво Орав и со американскиот амбасадор Џес Бејли, во резиденцијата на Европската унија, во Скопје.По средбите, претставниците на ВМРО-ДПМНЕ, ДУИ и ДПА, Никола Тодоров, Артан Груби и Имер Алиу не сакаа да коментираат за средбата, додека Радмила Шекеринска од СДСМ вели дека има ситуација во којашто секое од прашањата коишто се дадени во Договорот од Пржино виси и „не смееме да дозволиме Македонија од една криза да навлезе во уште подлабока политичка криза“. „Според, нас, според опозицијата, ни треба час поскоро да се исполнат сите услови за одржување фер и демократски избори и тие избори да знаеме дека нема да бидат повторување на претходните криминални избори и да им дадеме шанса на граѓните на Македонија, а не на власта да одлучува кој ќе ја носи одговорноста за Република Македонија во следниот период“, рече Шекеринска по средбата.Бејли и Орав се оптимисти дека ќе дојдат до договор со партиите, по неколкунеделните средби и дека наскоро ќе се одржи и лидерска средба на која би се искристализирале работите. „Со партиите имаме средби последните неколку недели и се надеваме дека во следните денови ќе имаме некаков напредок“, рече на заминување Бејли. „Со партиите сме во близок контакт. Преговорите продолжуваат. Се надеваме дека што поскоро е можно да имаме договор“, рече Орав.Премиерот Емил Димитриев, пак, од своја страна вели дека во принцип, сретнувањето и разговарањето е добра работа, меѓутоа треба да им суштина, треба да има конкретни работи за кои треба да се разговара. „Во моментов имаме само нафрлање на одредени теми од различни адреси, меѓутоа треба прво да се договориме принципиелно дека треба да разговараме за датум за избори, за другите работи коишто се отворени и да се одржи таа лидерска средба. Ова е прашање до партиите, јас верувам дека во ситуации кога ќе имаме нешто поконкретно дека ќе имаме таква лидерска криза и конечно да најдеме решение за излез од политичкава криза“, рече Димитриев, по посетата на Општина Ѓорче Петров.
Инаку, партиите остануваат на своите ставови за лидерска средба, при што СДСМ смета дека се исполнети условите, а ВМРО-ДПМНЕ би присуствувал на таква средба, доколку претходно се знае темата и планот за средбата. ДУИ смета дека лидерска средба треба да има зашто тоа е во интерес на граѓаните, а за ДПА таква средба би била несериозна, бидејќи нема да понуди ништо за излез од кризата. Од свја страна, Европската комисија, во понеделник вечерта, соопшти дека лидерска средба ќе има до крајот на неделава./крај/мф/бб
Извор: Архива Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Облачно со дожд и засилен јужен ветер, заладување кон крајот на неделата
Времето денес ќе биде облачно со повремени локални врнежи од дожд. Ќе дува умерен, а наместа засилен ветер од јужен правец. Минималните температури ќе се движат од 3 до 9 степени, додека максималните дневни ќе достигнат од 6 до 14 степени.
Во Скопје се очекува променливо облачно време со услови за повремен дожд. Ќе дува умерен, повремено засилен јужен ветер. Минималната температура ќе се спушти до 3 степени, а максималната ќе достигне до 10 степени.
Под влијание на нестабилна воздушна маса, до крајот на неделата времето ќе биде променливо облачно со повремени локални врнежи од дожд, кои наместа ќе надминат 20 литри на метар квадратен. До среда ќе дува умерен, а долж Повардарието повремено засилен ветер од јужен правец.
Во четврток и петок ветерот ќе го промени правецот во северен, што ќе услови пад на температурите.
Македонија
Денес ќе биде погребан Зоки Панкер
Последното збогување со Зоран Тодоровски – Панкер, сопственик на клубот „Балет“ ќе се одржи денес, 5 јануари, на Градските гробишта Бутел.
Капелата ќе биде отворена од 13:00 до 14:30 часот, а погребот ќе се одржи по завршувањето на обредот во капелата.
„Скопје се простува со човек кој остави трага, дух и став. Нека почива во мир“, наведуваат неговите пријатели на социјалните мрежи.
Македонија
Мицкоски за Венецуела: Апсолутно стоиме до потезите на САД
Ние како Влада апсолутно стоиме до аргументите и потезите на нашиот стратешки партнер – Соединетите Американски Држави. Мене најмногу ме зaгрижува громогласната тишина на истите тие европски и светски земји во минатото кога меѓународното право се кршеше на грбот на Македонија и македонскиот народ.
Ова го изјави премиерот Христијан Мицкоски денеска прашан за позицијата на нашата држава во однос на приведувањето на венецуелскиот претседател Николас Мадуро од страна на САД, кое министерот за надворешни работи Тимчо Муцунски вчера го поздрави, наспроти воздржаноста на земјите во Европа кон оваа акција и нивниот став дека со неа се поткопува меѓународното право.
Во изјава за медиумите при посетата на Сопиште денеска Мицкоски кажа дека „таквиот коментар би им го оставил на експертите по меѓународно право“.
– И како тогаш сите тие се оглувеа и никој од нив не го коментираше сето тоа. И како сега наеднаш, сите тие коментираат дали било тоа меѓународно право или не било меѓународно право итн., имајќи предвид дека познавам голем дел од тие што коментираат, а не се меѓународноправни експерти. Јас тоа би им го оставил на експертите по меѓународно право. Но, еднаш кога во животот ќе направите исклучок, тој потоа станува пракса и е прашање на време кога ќе се удри од вашиот грб, рече Мицкоски.
На прашање дали е тоа преседан што отсега може да се случи каде било, Мицкоски повторно укажа на случајот со нашата земја и одговори дека „преседанот е направен уште кога се менуваше знамето на оваа држава за да биде земја членка на ОН“.
– Кога се менуваше Уставот, кога се менуваше уставното име и се лажеа луѓето дека за рок од три-четири години ќе станеме членка на Европската Унија, членка на НАТО итн. Тоа се вистински преседани… Имаше и Хашка пресуда дека не треба да се блокира Македонија, па се блокираше и тогаш имаше громогласна тишина од сите тие што денеска коментираат… А дали ова е преседан или не е, ние како Влада апсолутно стоиме до аргументите и потезите на нашиот стратешки партнер – Соединетите Американски Држави, изјави Мицкоски.

