Пратеникот и член на ИК на ВМРО-ДПМНЕ, Антонијо Милошоски, денеска, при остварената посета на граѓани во Охрид одговараше на новинарски прашања.

Едно од прашањата на медиумите беше за аферата со рекетот од 250.000 евра.

„Во државата имаме тројца премиери, еден премиер е Заев, другиот е првиот вицепремиер Артан Груби, а третиот неформален премиер, кој најчесто се занимава со тендери на неформален начин, е Вице Заев. И во случајот на РЕК очигледно е дека тогаш формален директор на РЕК бил Васко Ковачевски, а неформален оној што се занимавал со тендерите и кој колку треба да плати за да изврши некоја набавка, бил Вице Заев. И во државата е јасно која е неговата улога“, истакна Милошоски.

Милошоски додаде дека Вице може да демантира колку што сака, но колку повеќе демантира, толку повеќе станува јасно дека РЕК, како што рече, станала фирма која заедно со ЕСМ во 2016 година била во добивка од 13 милиони евра, за денес да биде во загуба од 16 милиони евра.

„За, жал државата ја плаќа цената со хибриден режим и 111. место на ‘Транспаренси интернешнл’ за корупција бидејќи тие што се занимаваат со следење на корупцијата знаат која е улогата на братот на премиерот“, нагласи Милошоски.