Првите луѓе во Mинистерството за животна средина и просторно планирање во среда се сретнаа со невладините организации кои делуваат во животната средина со цел да разменат информации околу заштитата на животната средина во Македонија.

„Предизвиците со кои се соочуваме во заштитата на животната средина се навистина големи и комплексни, а активностите што ги спроведуваме и што допрва треба да ги спроведеме бараат сериозен пристап, голем ангажман, но и развиен дијалог и добра координација помеѓу централната и локалната власт и граѓанскиот сектор“, рече министерот Нурхан Изаири.

На средбата, најширока дискусија се разви за состојбите и мерките што се преземаат за намалување на загадувањето на амбиенталниот воздух, за најновите информации за активностите на Југохром, за можностите од намалување на загадувањето на воздухот предизвикано од застарениот возен парк и прекумерната употреба на возила.

Беа покренати прашања и за заштита на националните паркови Маврово и Галичица, како и за прогласувањето на Шар Планина за национален парк. Исто така се разговараше и за најавените градби во Лазарополе.

Од страна на невладините организации се покрена и прашањето околу новиот тарифник за води, за што министерот Изаири информираше дека за таа тема ќе бидат организирани дополнителни средби. /крај/со/ст