Македонија
Министерството за правда подготвено изборниот процес да помине без пречки

Министерот за правда Валдет Џафери во среда оствари средба со Тамара Отиашвили, претставник на ОДИХР, Пиере Гароне раководител на Секторот за избори и политички партии во Секретаријатот на Венецијанската комисија и Пере Виланова професор во Универзитетот на Барселона.
На средбата се разговараше за последниот извештај на Венецијанската комисија, како и за препораките за Изборите од 2013. Горенаведените експерти со Министерот за правда ги разменија ставовите во однос на ова прашање. Исто така се разговараше и за последните измени на Изборниот законик, за легислативата за медиумската аудио и визуелна служба, за Законот за собранието, како и предизборното институционално функционирање согласно овие закони.Министерството за правда на ова средба изрази спремност да ги понуди сите институционални капацитети со цел изборниот процес и актуелните закони кои се во сила, кои се директно поврзани со изборите, да се спроведат без никакви пречки. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Признанието на Црвен Крст е потврда за хуманитарните активности спроведени во Општина Центар

По повод 80 години од основањето на Црвениот крст, на градоначалникот на општина Центар Горан Герасимовски му беше врачено јубилејно признание за клучниот придонес на општината во хуманитарните активности на локално ниво. Признанието му беше доделено на свечена церемонија, која ја организираше Црвениот крст на Општинската организација Центар.
„Ова е потврда за нашето цврсто партнерство со Црвениот крст и заедничката посветеност кон подобрување на животот на нашите сограѓани“, истакна Герасимовски, заблагодарувајќи се за добиеното признание.
Градоначалникот ги истакна клучните проекти реализирани во соработка со Црвениот крст на Општинската организација Центар: „Заедно имплементиравме услуги и проекти како што се ‘Итно копче’ за пензионерите, воведовме бесплатен транспорт за лица со попреченост над 18 години, организираме едукации за прва помош во училиштата и градинките, работилници, крводарителски акции, активности за поддршка на граѓаните за време на високите температури, како и Дневен центар за лица со интелектуална попреченост над 18 години. Нашата цел е да создадеме општина во која секој граѓанин ќе има поддршка и сигурност.“
Директорот на Црвениот крст на Општинска организација Центар, Ивица Бошков, ги поздрави заложбите на Општина Центар, истакнувајќи дека само преку соработката со локалните самоуправи Црвениот крст може да ја исполни својата мисија кон граѓаните. На настанот присуствуваа директори на училишта, наставници, претставници на здруженија и на пензионерите од Центар, како и долгогодишни соработници.
Македонија
СДС е против инвестирање во капитални проекти, не сака државата и економијата да се развиваат и за ова го злоупотребува ССМ, велат од ВМРО-ДПМНЕ

СДС и ССМ делуваат заеднички, еден со друг си ги повторуваат тезите, манипулираат со јавноста и работниците и вештачки наметнуваат тези. Колку и да негираат, тоа е повеќе од очигледно и народот ги прочита, велат од ВМРО-ДПМНЕ.
Планот на делување, кој се реализира преку ССМ, како што оценуваат,осмислен им е, најверојатно, во кујната на СДС, надополнета со неформалните коалициони партнери ДУИ и Левица.
„Слободан Трендафилов на чело на ССМ, одработувајќи за својата позиција, е само алатка за реализација на планот на СДС, чија крајна е застој во развојот на државата.
СДС не сака Македонија да напредува и економијата да се развива, затоа преку ССМ сака десетици милиони евра да се трошат за придонеси, наместо да се инвестираат во развој кој ќе го подобри животот и ќе донеси бенефит за сите. На СДС му смета развојот и инфраструктурниот бум низ државата, не сака да се градат градинки, училишта, болници, улици, патишта. И тоа е многу очигледно“.
Државата, додаваат од партијата на Мицкоски, се стабилизираше, почнаа да растат платите и пензиите, а економскиот раст последните два квартали од минатата година е над 3%, ова се факти со кои СДС не може да се помири.
Според нив, и на СДС му е јасно дека со вакво темпо на развој на државата, тие полека но сигурно ќе потонат во заборав. Па, затоа преку вештачки креирани теми се обидуваат да бидат актуелни и за актуелизирање на тие теми, преку Трендафилов, го користат ССМ.
„Злоупотребувајќи ја својата позиција во ССМ, Слободан Трендафилов синдикатот го внесува во непринципиелни сојузи со политичките партии СДС и Левица. Трендафилов одработува за СДС, за незаконски добиеното претседателско место и со тоа ја ставаат на коцка иднината на државата“.
Но, народот и работниците, истакнуваат од владејачката партија, ги прочитаа и добро знаат дека не се грижат за работниците, туку манипулираат во јавноста за свои лични интереси.
Македонија
Утрово најстудено во Берово, денеска максималната температура до 23 степени

Утрово најстудено било во Берово каде што биле измерени -5 степени, -4 било во Битола, -3 во Струмица, -2 во Скопје-Петровец, Велес, Демир Капија и Маврови Анови, -1 во Тетово, Прилеп, Штип и Гевгелија, 0 во Охрид, Куманово и Кавадарци, 1 во Скопје-Зајчев Рид, Претор и Крива Паланка, 3 во Попова Шапка, 4 во Виница, 6 во Крушево.
Висината на снежната покривка утрово во 7 часот изнесувала 19 сантиметри на Попова Шапка.
Времето денеска
Сончево и топло со мала локална облачност. Ќе дува слаб до умерен ветер од јужен правец. Максималната температура ќе биде во интервал од 18 до 23 степени.
Во Скопје, сончево и топло со слаб променлив ветер. Максималната температура ќе достигне до 23 степени.