Според Викторија Андоновска од ВМРО-ДПМНЕ, Македонија со оваа партија, започна инфраструктурно да се развива, модернизира и трансформира.

Како што нагласи, инвестициите во патната инфраструктура се врвен приоритет на ВМРО-ДПМНЕ, затоа и се грададат нови автопати, експресни патишта, модерни коридори.

„Со ВМРО-ДПМНЕ проектите не се веќе само хартија, тие се градат и реализираат на терен. Разликата меѓу нас и нашите политички противници е очигледна, а доказ за тоа е и пуштањето во употреба на експресниот пат Страцин-Крива Паланка со должина од 25,5 километри, со вредност од околку 100 милиони евра.

Во месец јуни со пуштањето во употреба на делницата Фариш-Дреново се комплетира делницата Градско-Фариш и се доби целина од 26 километри експресен пат во Коридорот 10д, потсети Андоновска.

„По речиси една деценија застој, Владата предводена од ВМРО-ДПМНЕ пушти во употреба и две делници од автопатот Кичево-Охрид и тоа: Делницата Врбјани-Ботун во должина од околу 20 километри како и делницата од Климештани до Охрид во должина од 17 километри. Така што во рок од 2 месеци пуштивме за сообрајќај во активна употреба нешто повеќе од половина од целиот автопат, а до крајот на наредната година останува да се заврши целиот автопат.

Владата предводена од ВМРО-ДПМНЕ паралелно работи и на изградба на делницата Тетово–Гостивар-Букојчани во должина од околку 48 километри, како дел од паневропскиот Коридор 8, чијашто цел е патно поврзување на Деве Баир со Ќафасан. Како и на автопатот Прилеп-Битола во должина од 39,3 километри, кој е дел од Коридорот 10д. Изградбата на овие автопати е суштинска бидејќи истите се од витално значење за трговијата, безбедноста, а нивниот брз развој е од огромно значење за иднината на Македонија“.

За реализација на вакви капитални проекти, како што додаде, не е доволна само желба, потребна е истакна таа, визија, ангажираност, професионалност и истрајност.

„Македонија се гради чекор по чекор, делница по делница, проект по проект. Македонија предводена од ВМРО-ДПМНЕ ќе стане лидер во инфраструктура во регионот“.

Портпаролката на СДСМ, Богданка Кузеска, денеска на прес-конференција изјави дека околу 400 пожарникари ангажирани преку општините, не добиле плата.

Таа истакна дека овие лица, кои во август беа примени со ветување за месечен надоместок од 24.000 денари, обуки и можност за трајно вработување, до денес, заклучно со 17 септември, сè уште немаат добиено ниту една плата.

Според информациите, исплатата е блокирана поради изборниот процес бидејќи станува збор за вонредно плаќање, што ги остава младите пожарникари без заработка, а граѓаните без целосна заштита во време на пожари и еколошки катастрофи.

Кузеска нагласи дека овој случај ја покажува потребата од системски решенија кои ќе обезбедат сигурност и навремено надоместување за сите ангажирани во противпожарниот систем. Таа порача дека е неопходно институциите и општините веднаш да најдат начин за одблокирање на исплатите и за воспоставување стабилен механизам што нема да дозволи вакви ситуации да се повторуваат. Според неа, граѓаните очекуваат јасни и ефикасни решенија, бидејќи засилен и стабилен противпожарен систем значи поголема безбедност за сите.

Министерството за јавна администрација и Амбасадата на Република Франција денес потпишаа меморандум за соработка, со што почнува нов стратешки проект насочен кон модернизација на институциите и градење професионална, ефикасна и доверлива јавна администрација. Проектот „Јакнење на капацитетите и професионализација на администрацијата“ се реализира во партнерство со Националниот институт за јавна администрација на Франција (INSP), Генералната дирекција за администрација и јавна служба (DGAFP), како и со Центарот за управување со промени (ЦУП) – организација која со своето искуство и експертиза дава значаен придонес во креирањето на реформите.

Главните цели на проектот се насочени кон воспоставување академија за обука и стручно усовршување на административните службеници во рамките на Министерството за јавна администрација и зголемување на професионализацијата на административните службеници преку размена на искуства и развој на современи пилот-програми за обуки.

„Ова партнерство ја потврдува нашата одлучност да изградиме модерна администрација – двигател на развојот, сигурен партнер на граѓаните и столб на нашите европски амбиции. Ова е инвестиција во иднината на државата и во институции што ќе ја враќаат довербата на граѓаните“, рече министерот за јавна администрација, Горан Минчев.

Клучен резултат од оваа соработка од Министерството велат дека ќе биде воспоставувањето на академијата за обука и стручно усовршување на административните службеници – институција што ќе обезбеди континуирано знаење, практични вештини и професионален развој за сите вработени во администрацијата.

Меморандумот го потпишаа амбасадорот на Франција, Кристоф Ле Риголер, и министерот за јавна администрација, Горан Минчев.