Македонија
Mozzart со поддршка за „Инфинити лајф-КС“

Изминатиот месец се одбележа Светскиот ден за борба против ракот, а во фокусот се најде приказната на Сашка Кузманова, 33-годишната девојка од Кавадарци која изработува перики од природно влакно и им ги донира на онколошките пациенти. Оваа хуманитарна акција ја спои Кузманова, која е основач на „Инфинити Лајф КС“, со компанијата Mozzart, која како општествено одговорна компанија реши да ја поддржи акцијата со финансиска поддршка, со цел изработка на перики.
Најлошата болест на денешницата – канцерот – била главната причина за Кузманова да почне да се бави со изработката на периките. Нејзината желба да им се помогне на овие пациенти во текот на тешкиот период била пресудна. Инаку, пред да почне да ги изработува периките, девојката учествуваше и во повеќе други хуманитарни акции. Mozzart редовно ги поддржува хуманитарните акции ширум Македонија, па така застана и зад оваа приказна на младата кавадарчанка.
„Долги години се занимавам со хуманитарна работа, секојдневното запознавање со личности кои што боледуваат од најлошата болест, тоа е канцерот, ми даде причина да размислувам како можам да им помогнам. Сакам да испратам јавна благодарност до компанијата Mozzart затоа што застана зад целата оваа акција преку која целта е да се изнудат што е можно повеќе насмевки. Нема ништо подобро од исполнето срце и насмевка. Тоа го полни срцето и го исполнува денот. Ме радува што заедно сме сплотени и подаваме рака на некому на кого таа му е потребна и уште еднаш, голем поздрав и благодарност до компанијата Mozzart за поддршката.“, изјави Кузманова.
Од менаџментот на Mozzart истакнаа дека како општествено одговорна компанија секогаш ќе ги поддржуваат овие акции.
„Mozzart како општествено одговорна компанија секогаш ги поддржува акциите ширум Македонија и секогаш подава рака онаму каде што е најпотребно. Како регионален лидер во приредувањето на игри на среќа, застанавме зад оваа акција на Сашка Кузманова, за која веруваме дека им го олеснува процесот на борбата со ракот. Навистина ни се допадна нејзината идеја која несебично ја поддржавме и се надеваме дека ќе изнуди што е можно повеќе насмевки во иднина“, велат од менаџментот на Mozzart.
Од почетокот па до денес, Кузманова изработи над 45 перики. За изработка на една перика потребен е 21 до 31 ден. Периките се од природна коса, а сите оние кои сакаат да донираат коса за нивна изработка, може да ја контрактираат Сашка Кузманова на нејзиниот Фејсбук профил.
ПР текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Ромите не се „малцинство“, туку народ со богата традиција

Овој ден има силна симболика. Тоа е ден на сеќавање – на историја, на прогонот, на исклученоста, но и ден на достоинство, отпор и надеж, истакна премиерот Христијан Мицкоски по повод 8 Април – Меѓународниот ден на Ромите.
Според него, тоа е ден кога не само што ја славиме ромската култура, туку и гласно зборуваме за неправдите со кои оваа заедница се соочувала и за заложбите кои ги преземаме како држава за да ги надминеме тие неправди.
Ромите, рече Мицкмоски, се составен дел од нашата држава.
„Тие не се „малцинство“, туку народ со богата традиција, со музика, со јазик, со историја, традиција, обичаи. Тие се наши сограѓани, соседи, пријатели, соработници, и најважно од сè – граѓани со иста вредност и достоинство како секој друг. Но вистината е дека ромската заедница предолго живее на маргините. Да бидеме искрени, нееднаквоста е реална. Има системски бариери и преземаме одговорност да ги рушиме тие бариери, чекор по чекор, политика по политика, проект по проект“.
Владата, додаде тој, вложува во образовни политики кои ќе обезбедат еднаков почеток за секое дете, без разлика на етничка или социјална припадност.
Како што оцени, за ромските деца, образованието не е само опција, тоа е надеж, одговор на генерации неправда, на исклученост и заборав.
„Вработување од интеграција до еднаква економска шанса.
Работиме интензивно на вклучување на Ромите во пазарот на трудот преку:
Активни мерки за вработување во соработка со Агенцијата за вработување, специјално насочени кон младите Роми и жените. Обуки за занаетчиство и дигитални вештини, како и можности за самовработување преку грантови и менторство.
Во периодот од 2023 година заклучно со денес, повеќе од 1.000 Роми добиле работен ангажман или почнале сопствен бизнис.
Поддржуваме реновирање на кровови, канализациска мрежа, пристап до вода и струја во Шуто Оризари, Битола, Кочани, Делчево и други општини.
Се градат нови социјални станови. Секое семејство заслужува дом, не импровизација, туку вистински, безбеден, достоинствен дом“.
Мицкоски нагласи дека НИВНАТА визија не е Ромите да бидат „толерирани“ или „вклучени“, туку Ромите да бидат рамноправни граѓани, со иста моќ да одлучуваат, создаваат, сонуваат и живеат достоинствено.
Македонија
Aктивна забраната за тешки товарни возила на патот Тетово – Попова Шапка

Сообраќајот на државните патишта се одвива по наместа влажни коловози.
На патниот правец Тетово – Попова Шапка се уште е активна забраната за тешки товарни возила, а за останатите видови на возила задолжителна е употреба на зимска опрема (ланци).
Патниот правец Крушево – с.Долно Дивјаци – с.Кочиша е небезбеден за сообраќај и претсавува опасност за нормално одвивање на сообраќајот. Од 04.4.2025 година е затворен за секаков вид на сообраќај. Може да се користат регионален пат с.Пуста Река -Крушево.
Според известување од Виадукт Треј Дооел – Гостивар од 09.04.2025 година(среда), ќе се врши реконструкција на дилатациони спојки на дел од автопатот Неготино-Велес (клучка Неготино), каде сообраќајот ќе се одвива во една сообраќајна лента во правец од Неготино кон Велес во времетраење од 15 дена.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Меџити-Сецуко: во фокусот подобрување на еколошките услови за сите граѓани на Македонија

Првиот вицепремиер и министер за животна средина и просторно планирање Изет Меџити денеска на работна средба ја прими амбасадорката на Јапонија во Скопје, Кавахара Сецуко.
Меџити и Сецуко ја истакнаа важноста од блиско и долгорочно партнерство меѓу двете земји, особено во областа на заштитата на животната средина.
Меџити рече дека оваа средба е доказ за посветеноста на новата Влада за интензивирање на соработката со Јапонија и заедничко реализирање на одржливи еколошки иницијативи и зелен развој во Северна Македонија.
Амбасадорката Сецуко ја изрази подготвеноста на Јапонија да продолжи со поддршка на проекти поврзани со заштита на природата, подобрување на квалитетот на воздухот, управување со водите и зачувување на биолошката разновидност во Северна Македонија.
Меџити ѝ се заблагодари на Јапонија за досегашната поддршка и за експертизата што ја понуди во спроведувањето на еколошките проекти во земјата, но и во регионот, нагласувајќи ја важноста на меѓународната соработка во справувањето со глобалните прашања како што се климатските промени и зачувувањето на биолошката разновидност, ценејќи ги можностите што ги нуди ова партнерство.
Амбасадорката Сецуко и министерот Меџити ја изразија посветеноста на двете страни да продолжат со тековното партнерство, обезбедувајќи блиската соработка да води кон подобрување на еколошките услови за сите граѓани на Северна Македонија