Немало договор за нов Закон за виско образование, но има позитивни сигнали и студентите се надеваат на попозитивен исход на следната средба меѓу претставниците на Министерството за образование и наука, универзитетскиот сенат и Студентскиот и Професорскиот пленум.

Четирите преговарачки страни се договориле да имаат следна средба со заклучоци, но студентите остануваат на своето барање, а тоа е интегрално нов закон за високо образование.„Средбата не беше од одлучувачки карактер. Ние го изнесовме нашето клучно барање, а тоа е интегрално нов текст на Законот за високо образование. За тоа беа изнесени аргументи и средбата заврши со договор да имаме следна средба, односно на средбата не беше ништо одлучено. Секоја од четирите преговарачки страни требаше да се исконсултира со својата база за да се дојде на следна средба со заклучоци. Средбата и на почетокот беше планирана за да ја одреди формата во која би се пишувал тој нов закон за високо образование, но најпрвин треба да победат аргументите за нов закон за високо образование“, изјави Ивана Туфегџиќ од Студентскиот пленум.Според неа, со тоа што се постигнала согласност во рок од 30 дена да се направи анализа и да се анализира зошто е проблематичен актуелниот Закон, има простор за кооперативност меѓу Владата и студентите. На следната средба се надева дека ќе се констатира дека веднаш е потребен нов Закон за високо образование.„Окупацијата“ на факултетите од страна на студентите ќе продолжи сé додека не добијат потврда дека ќе почне да се пишува текст за нов закон за високо образование.„Нашето барање за новиот закон е да нема никаква форма на надворешно тестирање од страна на државата, тоа е поткрепено со аргументот дека прво треба да ги разработиме механизмите кои веќе постојат како Одборот за акредитација и евалуација којшто очигледно не си ја работел својата работа. За тоа добивме потврда и од самиот министер во неколку наврати. Кога ќе почне одборот за евалуација навистина да евалуира и да дава препораки што точно треба да се подобри за да се зајакне квалитетот на високото образование не можеме до тогаш да зборуваме за надворешно тестирање на студентите. Тие не можат да бидат тестирани заради дисфункционалност на одредена институција или тело при МОН“, рече Туфегџиќ.„Досега се направени 14 измени на законот за високо образование и според неа, самите предлагачи на Законот и оние кои го носат се свесни дека овој закон не може да се применува“, додаде Туфегџиќ.Во четвртокот попладне во ректоратот на УКИМ се одржа средба меѓу четирите преговарачки страни, на којашто присуствуваа двајца претставници на Студентскиот пленум, двајца претставници на Професорскиот пленум, вицепремиерот Зоран Ставрески, министерот за образование, Абдулаким Адеми и неговиот заменик Спиро Ристовски./крај/мф/ффс