Македонија
Непотребно пропишан антибиотик во 56 отсто од случаите со респираторни проблеми

Непрописно пропишување на антибиотици без претходни дополнителни анализи во 56 отсто од сите случаи со респираторни проблеми, покажува истражувањето на Здружението на специјалисти по семејна медицина – респираторна група и Центарот за семејна медицина при Медицинскиот факултет во Скопје.
Истражувањето беше спроведено минатата година во месец ноември и опфаќа 107 доктори од примарната заштита. На Симпозиумот одржан 1 и 2 мај во Охрид, беа презентирани дел од резултатите за 37 доктори со обработка на 4569 пациенти со епизоди на акутна респираторна инфекција кои побарале консултација со својот избран доктор.
„Ова истражување ни покажува дека треба да се направи уште многу во поглед на едукација на населението и докторите, но одредени активности да се преземат и од клучните институции како што е Фондот за здравствено осигурување и Министерството за здравство. Кај 15% од случаите се направени дополнителни испитувања, но за жал анализите кои би можеле да помогнат во донесувањето на одлуката не се на листата на услуги што ги нуди Фондот, што значи дека пациентите ги сносат трошоците. Пациентите бараат рано помош бидејќи се плашат од компликации, a само во 5.1% од случаите од докторите пропишале антибиотик на инсистирање на пациентите”, смета Радмила Ристовска претседател на Здружението на специјалисти по семејна медицина – респираторна група.
Респираторните инфекции се една од најчестите причини за посета на докторот. Речиси 90 отсто од сите случаи се предизвикани од вирус каде не е потребна антибиотска терапија. Истражувањето покажува дека најчести симптоми за кои пациентите сакаат да се консултираат со својот доктор се, кашлица, покачена температура, проблеми со носот и грлото. Просечното траење на симптомите е речиси 4 дена. Потребна е едукација на пациентите за овие најчести симптоми и како да се справат сами со нив. Најмногу антибиотици се пропишани за болка при голтање и покачена температура.
Во светот има зголемен тренд на намалено пропишување на антибиотици. Со организирани кампањи намален е процентот за користење на антибиотици во Данска 32 отсто, Шведска 37 отсто, Холандија 34 отсто, Норвешка 27 отсто, Шпанија 20 отсто. Трендот во овие земји продолжува со наметнување на построги критериуми за пропишување на антибиотици што налагаат и извршување на дополнителни анализи. Земјите со висок степен на употреба на антибиотици, како што е Македонија, имаат повисок степен на резистенција. Тоа пак доведува до зголемена смртност предизвикана од резистентни соеви, продолжено болничко лекување, потенцирање на штетноста на лековите кое се должи на несакани ефекти, како и пораст на трошоците за лекување.
Препораките од истражувањето се дека треба да се прошири листата на услуги за Фондот за изведување на дополнителни анализи кои во моментов се на трошок на пациентот. Во исто време да се продолжи со едукација на населението и на медицинските лица за рационално користење на антибиотици. Да се зголеми комуникацијата на оваа тема и меѓу стручната јавност, но и кај населението./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Наградени ќе бидат полицајците кои вчера ја спасија жената во Вардар

Министерот Панче Тошковски, се сретна со полициските службеници Кристијан Стефановски и Жико Ѓорѓиевски – хероите кои вчера ја спасија жена во водите на реката Вардар.
Министерот на средбата со нив уште еднаш потенцираше дека важноста на полицијата и нејзината вистинска сила и влијание врз животот и благосостојбата на граѓаните се гледа во најтешките човечки моменти.
„Херојските дела како вашето, кога директно се спасува човечки живот е повеќе од службено постапување, тоа е вистинска пожртвуваност и посветеност кон мисијата да се чува безбедноста и сигурноста на секој граѓанин и целото општество.“, потенцираше министерот Тошковски при честитките до двајцата полициски службеници за нивната херојска постапка.
Тој нагласи дека во рамките на законските можности тие ќе бидат наградени за нивната херојска постапка која е инспирација за сите нас унапредувањето на хуманиот аспект на нашите дела и постапки како обични луѓе и професионалци.
Македонија
Повозрасните да не наседнуваат на измами со лажни сообраќајки, порача Тошковки

Министерот за внатрешни работи Панче Тошковски заедно со полициски службеници од Одделението за превенција при СВР Скопје денеска реализираа превентивна акција „Внимавај телефонски измами“ насочена кон едукација на нашите повозрасни граѓани кои се најчеста жртва на таквите измами.
Преку непосреден разговор и делење на едукативен материјал граѓаните беа едуцирани дека најчест вид на измама е измамата со лажна сообраќајна незгода во која измамниците претставувајќи се на телефон како полициски службеник, адвокат, обвинител или доктор ги лажат жртвите дека нивното дете повредило некого во сообраќајна незгода и се обидуваат да извлечат пари од жртвата така што за одредена сума би му помогнале на детето кое е во неволја.
„Измамниците на тој начин се обидуваат да ги злоупотребат повозрасните лица. Денес во градскиот паркот во Скопје успеавме да разговараме со голем број повозрасни лица и да ги информираме за таквите измами и модус операнди или начинот на работа на измамниците. Апелираме доколку некој добие таков повик е потенцијална жртва на таква измама, никако да не дава пари, да го прекине разговорот веднаш да ја повика полицијата на 112 или 192 и да ги извести и своите најблиски“, апелираше министерот Тошковски.
Во првата половина на оваа година досега се пријавени вакви 16 настани а за период од пет години досега се расветлени 40 настани, при што се поднесени кривични пријави против 16 лица, за сторени 40 кривични дела „измама“, додека за останатите настани се преземаат мерки за нивно расчистување и поднесување на соодветни кривични пријави.
Македонија
(Видео) Избегната катастрофа кај Брезница, пожарот се движи кон Козјак

Денес се регистрирани десет пожари на отворен простор, информира директорот на Дирекцијата за заштита и спасување (ДЗС), Стојанче Ангелов, предупредувајќи дека бројката може да се зголеми до крајот на денот.
Ангелов упати нов апел до граѓаните, особено до земјоделците и сточарите, да бидат исклучително внимателни додека ги извршуваат своите активности во овој критичен период.
Најтежок за гаснење и натаму е пожарот што со денови гори во „Јасен“. Според Ангелов, едниот крак бил ставен под контрола во ноќна битка со огнот, при што била спречена негова експанзија кон селото Брезница.
„Не дозволивме пожарот да премине преку шумски пат, со што понатаму ќе беше загрозено селото. Исчистени беа дрвјата долж патот и линијата беше гаснета целосно. Благодарение на Единицата за брзо распоредување (ЕБР), пожарникарите од Македонски Брод и вработените во ‘Јасен’, овој крак е стопиран“, изјави Ангелов.
Тој додаде дека состојбата на другата страна на гребенот, кон езерото Козјак, е многу потешка поради непристапниот терен. Таму пожарот се движи, а очекувањата се дека ќе биде стопиран кај карпестиот предел, а за таа цел таму поставени се надлежните служби.
Покрај „Јасен“, активни пожари се регистрирани и во Лозово, каде што гори шумска површина, во Долнени – со пожар на ниска вегетација, како и во Куманово, во атарот на селото Липково, каде што активни се два пожари, од кои едниот е реактивиран.