Македонија
Нови 165 војници стапија во доброволна служба во АРМ

Нови 165 војници, меѓу кои 12 жени на доброволно служење во АРМ, во петок положија заклетва во велешката касарна „Алексо Демниевски – Бауман“.
Тие во наредните три месеци ќе бидат обучувани од инструктори од Центарот за индивидуална обука во Велес, кои ќе се запознаат со основната воена обука и воедно тие ќе претставуваат база за понатамошниот избор на професионални војници.
„За сите нас, исполнувањето на уставната обврска за чување и бранење на територијалниот интегритет и суверенитет на татковината, претставува чест, гордост и највисок чин на патриотска должност. Со свечената заклетва вие се обврзавте на тоа, да ја браните татковината и највисоките уставни и човекови вредности“, порача министерот за одбрана Зоран Јолевски.
Имајќи предвид дека оваа година ќе се распише уште еден конкурс за прием на нови 125 професионални војници, при што услов е граѓаните да имаат завршено доброволно воен рок, министерот Јолевски дополнително порача: „Вашиот избор Ви ја отвора можноста да продолжите со надградбата на воената професија во професионалниот состав на служба во Армијата на Република Македонија. Со ова ќе Ви се отвори можност да станете столб на одбрана на нашата татковина“, рече Јолевски.
Во рамки на свеченост се обрати и командантот на Командата за обука и доктрини, полковник Љупчо Костовски кој најнапред истакна дека денес присуствуваме на давањето заклетва на 25-та јубиларна генерација на војници.
„Со овој свечен чин овие млади луѓе се приклучија на големото семејство на Армијата на Република Македонија“, рече полковникот Костовски.
На денешната свеченост покрај министерот Јолевски, присуствуваа и заменик началникот на ГШ на АРМ, генерал потполковник Насер Сејдини, останати високи претставници и офицери од Министерството за одбрана и Армијата на Република Македонија, претставници на локалната самоуправа, граѓани и родители на новите доброволци. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Првиот ден од септември ќе биде сончев со мала облачност

Првиот ден од септември, како и неделата, ќе биде сончев со мала до умерена облачност и слаб до умерен ветер од северозападен правец, соопшти Управата за хидрометеоролошки работи (УХРМ).
Минималните утрински температури ќе се движат од 8°C во Маврово до 18°C во Гевгелија, додека максималните дневни ќе достигнат од 24°C до дури 34°C во Скопје.
Во главниот град утре се очекува сончево време со мала до умерена облачност. Температурата ќе се движи од 18°C во утринските часови до максимални 34°C во текот на денот.
Од вторник, метеоролозите најавуваат уште потопло време – сончево со мала до умерена локална облачност и температури кои ќе се движат од 30°C до 37°C.
Во среда пак ќе настапи промена – времето ќе биде променливо облачно, со слаб до умерен западен ветер. Попладне на повеќе места ќе има појава на пороен дожд и грмежи. Температурите ќе се движат меѓу 29°C и 36°C.
Македонија
Се врати во функција бројот 192 на МВР

Отстранети се техничките проблеми и повторно е во функција телефонскиот број 192, кој граѓаните на Скопје можат да го користат за било каква пријава или информација, информира Секторот за внатрешни работи Скопје.
За истата намена, како што велат, редовно функционира и телефонскиот број 112, како и телефонските броеви на полициските станици во населбите каде граѓаните живеат.
Македонија
Пожарот во Вардариште е под контрола, дел по дел Скопје добива струја

Пожарот во депонијата Вардариште е ставен под целосна контрола, информираат од Дирекцијата за заштита и спасување.
Поради големиот пожар повеќе населби во Скопје беа без електрична енергија, а од ДЗС информираат дека набргу дел по дел, ќе биде пуштена електричната енергија.