Потребно е враќање на довербата меѓу двете влади, со цел засилување на добрососедските односи и политичкиот дијалог за почувствителните прашања. Ова го истакна претседателот Стево Пендаровски на средбата со бугарскиот премиер Кирил Петков, кој престојува во официјална посета на земјава.

Пендаровски на средбата изрази поддршка за започнатиот дијалог меѓу двете влади, конкретните предлози, како и намерите за интензивирање на разговорите во наредниот период.

„Надминувањето на меѓусебните недоразбирања е важно за напречено одвивање на македонските евроинтеграциски процеси, како и за неутрализирање на растечкиот евроскептицизам и негативните тенденции во регионот“, порача Пендаровски.

Тој потврди дека Северна Македонија има силна политичка волја да го продолжи дијалогот, со цел изнаоѓање компромисно решение за отворените прашања. Според него, отпочнувањето на пристапните преговори со Европската Унија ќе претставува придобивка за просперитетот и стабилноста на целиот регион. Тоа дополнително ќе влијае на унапредување на соработката во економијата, трговската размена, инфраструктурното поврзување како и соработката во областите на образованието, здравството и културата.

Министерот за образование и наука Јетон Шаќири денеска на прес-конференција информираше дека на негово барање, врз основа на препорака од Главниот координативен штаб, Владата  вчера донесе одлука започнувањето на првото полугодие да се одложи до 1 февруари годинава. Согласно оваа одлука донесена врз основа на проценките од здравствените власти дека земјата се наоѓа во епидемиолошки пик со Ковид-19, учениците со физичко присуство во училиштата ќе се вратат на првиот ден од идниот месец.

„Со цел да го сочуваме јавното здравје и здравјето на нашите најблиски, повикувам на свесност и одговорност за да го спречиме ширењето на заразата. Апелираме до родителите, наставниците и учениците и за време на продолжениот распуст максимално да се придржуваат до мерките и препораките за заштита од Ковид-19, во домашни услови и на отворено”, рече Шаќири.

Министерот истакна дека одлука нема да влијае на крајот на учебната година и таа ќе заврши на 10 јуни како што е предвидено во календарот за наставната програма за основно и средно образование, со соодветна адаптација на наставните планови.

„За прилагодувањето на наставните планови согласно најновата владина одлука веќе сме во координација со директорот на Бирото за образование и наука”, изјави Шаќири.

Министерот информирмираше дека следниот период ќе се искористи за евалуација на системот за учење од далечина како и ефектите и постигнувањата од истиот.

Претседателот на ЛДП, Горан Милевски, самиот, без согласност и партиска одлука, се предложил за министер во Владата, што покрена иницијатива внатре во партијата за негова одговорност.

„Со вчерашниот избор на Владата и изборот на Горан Милевски за член на Владата е прекршен Статутот на ЛДП. На последната седница на ЦО се зазема став водење преговори и барање до мандатарот Ковачевски за учество на ЛДП во Владата. Одлуката за учество и обезбедување на уште еден министерски мандат на Милевски се случи без претходно одржување седница на ЦО и носење одлука за учество во Владата. Согласно член 38 став 17 од Статутот на ЛДП: ‘ЦО утврдува листа на кандидати за членови на Владата на Република Македонија од редовите на ЛДП’“,  стои во дописот на Филип Аврмачев, член на Централниот одбор испратен со органите на ЛДП.

Тој им порачува на членовите на Надзорниот одбор да поведат соодветна постапка против претседателот Милевски за прекршување на статутот на партијата.

„Како што наша идеолошка заложба е дека никој не смее да биде над законите на државата, така и во партијата никој не смее да биде на статутот, ниту претседателот на партијата, а најмалку во момент кога е тој лично засегнат“, пишува Аврмачев во писмото до партиските органи.

Прашан дали е тоа негов допис со кој бара постапка против Милевски, Аврамчев не сакаше да ги коментира внатрешните случувања во ЛДП.

„ЛДП е демократска партија и сите партиски проблеми ги решаваме внатре во партијата и би сакал тоа така и да продолжи“, одговори Аврамчев.