Македонија
Oсмани од Јордан најави продлабочување на економската и културната соработка

Во рамки на првата работна посета на Хашемитското Кралство Јордан, министерот за надворешни работи, Бујар Османи оствари средба со заменик премиерот и министер за надворешни работи и иселеништво, Ајман Сафади.
Во фокусот на разговорите беа темите поврзани со односите меѓу Северна Македонија и Јордан, на билатерално и мултилатерално ниво, како и начините за нивно понатамошно унапредување, во периодот што следи. Особено значаен аспект беше потпишувањето на Протоколот за соработка меѓу двете министерства за надворешни работи, со кој се олеснува и поттикнува соработка и непосредна комуникација на политичко, економско, научно, културно и други полиња на интерес.
„Денешната посета претставува потврда на заемните заложби за интензивирање на односите, особено во делот на економијата, бизнис релациите и културните врски. Искрено, очекувам одличното ниво на соработка, да се интензивира со зголемена динамика, затоа што ја делиме истата посветеност на мир и стабилност, и во регионот и ширум светот“, истакна Османи.
На средбата стана збор и за интересот на Северна Македонија за членство во Унијата за Медитеранот, при што Османи изрази благодарност за јорданската недвосмислена поддршка за реализирање на оваа цел.
„Идното членство на Северна Македонија во Унијата за Медитеранот ќе обезбеди поблиско вмрежување и интеграција во европските структури што работат со регионот на Средоземното Море и подобра интеракција со јужното соседство на Европската Унија. Тоа дополнително ќе придонесе за потесна соработка нашите земји за зајакнување на медитеранскиот регион и создавање можности за нови проекти во насока на креирање посилен и инклузивен регион”, заклучи Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.