Скопското обвинителство, постапувајќи по пријава од Министерството за внатрешни работи поведе постапка против Божидар Јанковски, управител на компанијата „Дајнерс клуб Македонија“ и сопруг на заменик претседателот на СДСМ, Радмила Шекеринска за злоупотреба на службена положба и овластување.

Обвинителството до Основниот суд Скопје 1 поднело и предлог за определување на мерки на претпазливост и тоа: привремено одземање на патна исправа, односно забрана за нејзино издавање и обврска за повремено јавување во суд.Во соопштението на Обвинителството нема наведено ниту иницијали на лицето за кого е поднесена пријавата но со оглед дека е осомничен за закуп на станови може да се заклучи дека станува збор за Јанковски.„Лицето се сомничи дека злоупотребувајќи ја службената положба и овластување, како службено лице вршел закуп на станови на кој се јавува како приватен сопственик. При тоа, по вршење на закупот, просториите не биле користени од страна на друштвото што го управувал“, се вели во соопштението.Обвинителството во текот на 2014 година примило Иницијатива од Државната комисија за спречување на корупција за наводите од кривичната пријава, но тогаш не нашле доволно докази. „Во тој временски период , а по наводите на Иницијативата, обвинителството не најде доволно докази за поведување постапка, по што беше донесена Резолуција со која постапката беше запрена. Потенцираме дека донесување на резолуција не претставува ограничување, односно елиминирање на натамошно водење кривична постапка доколку се откријат нови моменти, односно докази во предметот.Во временскиот период од 2014 година до сега, од страна на повеќе институции пристигнати се поголем број други известувања, податоци  и писмена документација. Со поднесената кривична пријава доставени се и нови докази што го подигаат степенот на основаноста на сомнението дека кривичното дело е сторено, согласно што обвинителството и постапува“, додаваат од Обвинителството./крај/мф