Градоначалникот и лидерот на најголемата партија во опозицијата, Зоран Заев, не ги примил парите за коишто се товари за поткуп, постапките за откуп на градежното земјиште биле законски завршени и не може Обвинителството да го товари Заев за поткуп и за обид за поткуп.

Ова се основите на коишто се темелеше одбраната на адвокатите на лидерот на СДСМ, Зоран Заев за кривичното дело поткуп, на седницата за оценка на обвинителниот акт покренат од страна на Основното јавно обвинителство за организиран криминал и корупција, на којашто не присуствуваше осомничениот Заев.„За да стане збор за обвинение за поткуп треба да биде примен подарок. Одземањето на корисничкото право на користењето на градежното изградено земјиште не е дејствие кое е во рамките на службените овластувања на Заев како градоначалник, туку е во надлежност на Министерството за финансии, односно на Управата за имотно правни работи. Очигледно е дека при поднесувањето на обвинението имало тенденција осомничениот да се товари за што потешка правна квалификација“, рече адвокатот на Заев, Филип Медарски, кој додаде дека не може да осомничениот да се товари и за поткуп и за обид за поткуп.Објавувањето на снимката во јавноста на којашто се гледа како Заев и струмичкиот бизнисмен Иво Николов договараат легализација на земјиште, според одбраната, ја нарушува приватноста на Заев и судот не треба да ја земе предвид како доказ, смета Медарски.Застапаникот на обвинението, Владимир Милошевски, пак, рече дека постојат доволно докази за судот да донесе осудителна пресуда за Заев.Заев се товари за барање поткуп од 200 илјади евра за приватизација на земјиште, од кои половината би биле за изградба на црква. Земјиштето поради кое е отворена истрагата се наоѓа во индустриска зона во Струмица. Бизнисменот тврдел дека Заев му барал 200 илјади евра за да се заврши легализацијата на земјиштето, 100 илјади евра за градоначалникот и 100 илјади евра за изградба на црква во Струмица.Заев тврди дека во овој случај немало примопредавање пари и дека пријавувачот никогаш не му дал поткуп. Тој тврдеше дека цело време бил свесен дека лицето се обидува да го „намести“ и поднесе кривична пријава против бизнисменот.Во вторникот судот го прифати обвинителниот акт за случајот „Пуч, во којшто Заев е четвртообвинет за насилство спрема највисоки државни органи. /крај/мф/ффс