Се одложи распитот на четворицата осомничени во случајот „ТНТ“ по барање на одбраната за да го заврши увидот во предметот и доказите, соопштуваат од Основниот суд Скопје 1.

Следниот распит е закажан за во понеделник, на 23 мај 2016 година.  „Во однос на случајот во јавноста познат како „ТНТ“, денеска во просториите на Основен суд Скопје 1  – Скопје по барање на одбраната се одложи предвидениот распит на четворица осомничени за кои Обвинителство за гонење кривични дела поврзани и кои произлегуваат од незаконското следење на комуникации (СЈО) предложи определување мерки за обезбедување нивно присуство“, соопштуваат од Основниот суд Скопје 1.Одбраната од судијата на претходна постапка побара дополнително време за да го заврши увидот во предметот и доказите со што следниот распит е закажан за 23 мај 2016 година. Според Специјалното јавно обвинителство во случајот „ТНТ“, нарачатели на рушењето на станбено-деловниот објект „Космос“ на Фијат Цаноски се поранешниот премиер, Никола Груевски и поранешниот министер за транспорт и врски, Миле Јанакиески.Мотивот за уривањето на објектот бил „одмазднички“, односно причина било тоа што Цаноски, лидер на ПЕИ, ја напуштил владината коалиција и преминал во коалиција со опозициската СДСМ.Првоосомничена во овој случај е градежниот инспектор на Општина Гази Баба која почнала постапка за уривање. Направила мерење на височина на објектот, кое покажало дека градбата била повисока за 1,43 метри, но без да биде направен заштитен тротоар на градбата. Во случајот осомничени се и тројцата членови на Комисијата за спроведување на јавни набавки, а Специјалното јавно обвинителство предложи мерки за обезбедување до Кривичниот суд за сите осомничени./крај/мф/ффс