Македонија
Операцијата во Куманово завршена, последната група најверојатно неутрализирана

Според последните информации, откако имаше информации за предавање на група од триесетина лица, дел од поголемата вооружен група против којашто македонската полиција во саботата утрото презема акција во кумановската Дива населба, ноќта сé уште можеле да се слушнат рафални истрели и детонации од правец на населбата Тоде Мендол, но има и информации дека деветчлена група којашто давала отпор веќе е неутрализирана.
Претходно во Куманово се проширија информации дека тресетина лица припадници на групата што Министерството за внатрешни работи ја идентификува како „терористичка“ се предала истакнувајќи бели чаршафи, меѓутоа МВР официјално не излезе со потврда на оваа информација.
Во саботата вечерта преку роднини на семејствата кои се информирани, се дозна идентитетот на тројцата загинати македонски полицајци кои учествуваа во акцијата во Куманово. Станува збор за 32-годишниот Жарко Кузмановски, од тетовското село Брвеница , 32-годишниот Сашо Самоиловски од Тетово, и 28-годишниот Ненад Серафимовски на 28 години од гостиварското село Зубовце. Локални жители од Полошкиот регион велат дека има и други ранети од истите места, но не знаат во каква состојба се наоѓаат.
Медиумите на албански јазик пренесуваат дека полицијата ја презела контролата на критичната точка во населбата, како и дека меѓу жртвите има уште еден полицаец и четворица од вооружената група. Според овие информации, 22 лица се предале, а од групата којашто давала отпор четворица се убиени а еден од нив се самоубил. Претходно беше јавено дека во борбите загинал и командантот на УЧК-ОНА, Фадил Фејзулахи./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево време со изолирана појава на нестабилност попладне

Времето денес ќе биде сончево со мала до умерена локална облачност. Попладне во југоисточните делови ќе има услови за изолирана појава на нестабилност со краткотраен пороен дожд и ретки грмежи. Ќе дува слаб до умерен ветер претежно од западен правец. Минималната температура ќе биде во интервал од 10 до 18, а максималната ќе достигне од 28 до 35 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 16, а максималната ќе достигне до 34 степени.
Во четврток ќе дува умерен до засилен, а во петок повремено силен јужен ветер. Во сабота ќе има услови за повремен локален дожд и појава на ретки грмежи. Ќе дува умерен, долж Повардарието повремено засилен северен ветер, кој ќе продолжи и во недела, а дневната температура ќе биде во опаѓање.
Македонија
Битиќи: Ја добивме битката, концесијата дадена од ВМРО-ДПМНЕ, падна на арбитража

Концесијата дадена од ВМРО-ДПМНЕ, симбол на криминал и коруптивни зделки, падна на арбитража. Државата ја доби битката, нема да плати штета од 115 милиони евра, реагира пратеникот на СДСМ, Фатмир Битиќи и поранешен вицепремиер.
„Да се потсетиме: Случајот односно судските рочишта се затворени во 2023 година. Арбитражниот суд носи конечна пресуда во рок од две (2) години по завршните зборови. Тимот што ги застапуваше правата на нашата држава во целиот тој процес се водеше со јасни определби и насоки од страна на мојот кабинет во претходната Влада“, наведува Битиќи.
И затоа, додаде тој, искрена благодарност до White & Case, нашите главни застапници во арбитражата, државните службеници и експерти кои вложија знаење и енергија, како и до локалните адвокатски друштва за нивната посветеност и професионалност.
„Благодарност до сите што ги застапуваa интересите на државата. Вака се почитува татковината, со искрен настап и без калкулации – а за оние кои имаа други интереси, иднината ќе покаже“, стои во објавата на Битиќи.
Македонија
Поради пожарот кај Јасен, затворен за сообраќај патот Македонски Брод – Скопје

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила, информира АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќајот на патиштата надвор од градските средини е зголемен. Поради летните одмори, се бележи зголемена фреквенција на возила, на ГП Табановце времето на чекање за излез е околу 30 минути, додека на останатите гранични премини од македонска страна нема подолги задржувања при влез или излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.