Околу осум илјади тони отпадно масло годишно се собираат од автомобилската индустрија, транспортниот сектор, како и од останатите индустриски гранки во Македонија.

Поради тоа Министерството за животна средина и просторно планирање со финансиска помош обезбедена од сојузното Министерство за економска соработка и развој на Германија, а во соработка со компанијата Karo As од Германија иницираа проект за воспоставување на систем за управување со отпадното масло во Македонија, а агенција за имплементација на проектот е Германската агенција за соработка (GIZ).

Отпадни масла се масла генерирани при сервисирање на моторни возила (моторни, хидраулични) и масла од трансформатори. Во текот на имплементацијата на проектот беше забележано дека кај јавноста недостига свесност за животната средина од аспект на нарушувања што може да се случат како последица на несоодветно управување со отпадните масла. Во Македонија капацитетите за собирање и соодветно рециклирање на отпадното масло не ги задоволуваат реалните потреби на земјата.

Компанијата Karo As обезбедува поддршка во воспоставувањето на системот за управување со отпадни масла и активно работи на спроведување на техничките процедури за соодветен економски и еколошки третман на отпадното масло. Исто така, GIZ, претставуван од Проектот за хемиска безбедност, ја раководи и следи имплементацијата на проектот. Канцеларијата за перзистентни органски загадувачи (POPs) при Министерството за животна средина и просторно планирање е врската меѓу чинителите во Македонија од една страна, и компанијата Karo As и GIZ од друга страна.

Целта на проектот е воспоставување на еколошки и економски прифатлив систем за управување со отпадни масла во Македонија кој ги запазува стандардите и препораките на европското законодавство. Меѓу другото, проектот вклучува и утврдување на тековната состојба во управувањето со отпадното масло (главно создавачи на отпадни масла, количини на создадено отпадно масло на годишно ниво, постоечки собирачи на отпадно масло и компании кои регенерираат отпадно масло во Македонија и регионот).

Во имплементацијата на пилот-шемата се вклучени голем број на создавачи и собирачи на отпадно масло, како и рафинерија на отпадно масло од Грција. Како дел од проектот компанијата Karo As обезбеди осум челични буриња за отпадно масло и опрема за лична заштита од Германија. Исто така, во тек е анализа на постоечката легислатива во Македонија на полето на управувањето со отпадни масла заради нејзино целосно хармонизирање со европската директива. Канцеларијата за POPs креираше специјален софтвер/база на податоци заради евиденција на собраните податоци. Во тек е национална кампања за подигање на јавната свест. За таа цел, изработени се и дистрибуирани тематски летоци и постери.

Во почетокот на јуни 2012 беше организирано студиско патување, како и посета и размена на искуства со лица кои се занимаваат со оваа дејност во Германија. На крајот од проектот планирана е работилница каде стекнатите искуства ќе бидат разменети со претставници од Регионалниот центар за Базелска конвенција од Братислава и земјите од соседството.

Проектот за управување со отпадно масло во Македонија е јавно приватно партнерство во чија имплементација учествуваат германската фирма Karo As специјализирана за ракување со отпадно масло и негово рециклирање, Германската агенција за соработка (GIZ) и Министерството за животна средина и просторно планирање. Проектот започна во 2010 година и се очекува да заврши во декември 2012 година./крај/со/мф