Општество
Децата ќе учат почит кон различностите во градинките
Резултатите од иницијативата “Воведување на почит кон различностите и мултикултурализам во раниот детски развој”, беа презентирани во средаа во Скопје пред претставниците од сите градинки во државата.
Резултатите од иницијативата “Воведување на почит кон различностите и мултикултурализам во раниот детски развој”, беа презентирани во средаа во Скопје пред претставниците од сите градинки во државата.
Со оваа иницијатива, отпочната во вид на пилот-активности во десет градинки во десет општини, се обезбедува поддршка за децата да учат почит кон различностите во однос на етничка припадност, култура, религија, род и попреченост.
Посочувајќи ги позитивните промени во заедниците во кои беа спроведени овие пилот-активности, партнерите упатија повик до сите градинки во земјава да ги воведат новите активности за почит кон различностите, кои се вградени во државните програми за ран детски развој.
„Богатството на мојата земја, Република Македонија е во тоа што во неа живеат народи од различна етничка припадност и конфесија”, изјави министерот за труд и социјална политика Диме Спасов.
„Вметнување на почит кон различностите и мултикултурализам во Националната програма за рано учење и развој е еден показател, колку сериозно ѝ пристапуваме на оваа суштинска тема во развојот на децата”, додаде
„Преку вложување во децата од најрана возраст всушност вложуваме на долг рок, бидејќи така ги ги воспитуваме нашите деца без товарот на предрасуди и стигма”, изјави британскиот амбасадор Чарлс Едмунд Гарет. “Вложувањето во раниот детски развој е можност со која максимално го развиваме потенцијалот кај децата, го олеснуваме преминот кон училиште и придонесуваме кон успех во учењето, обезбедуваме повисоки резултати при вработувањето и учеството во општествениот живот, и се справуваме со предрасудите и стереотипите”.
Оваа пригода претставуваше и можност да се промовираат новите материјали за предучилишно образование – прирачник за воспитувачите со работни активности, 19 детски сликовници и постери со четири детски ликови познати како “Дружината МЕЛА”.
Материјалите, наменети за деца на 4 до 6-годишна возраст, се средства со кои градинките ќе развиваат самопочит и самодовербата кај децата; ќе ги учат да прифаќаат сличности и разлики помеѓу различните луѓе; да препознаваат кои постапки ги повредуваат другите и да ги разберат последиците од таквите постапки; и ќе ги учат како да реагираат кога се изложени на стереотипи, предрасуди и дискриминација.
„Истражувањата во меѓународни рамки покажуваат дека дури и деца на двегодишна возраст почнуваат да формираат сопствен идентитет и претстава за другите,” изјави Ража Мсефер Берада, заменик-шеф на канцеларијата на УНИЦЕФ.
„Сега имаме и домашни примери што покажуваат позитивни промени во ставовите и однесувањата на воспитувачите, родителите и децата кон различностите”, дополни Берада.
Анкетите спроведени пред и по изведувањето на иницијативата покажуваат подобрувања на ставовите и однесувањата кај децата, родителите и воспитувачите во градинките кои учествуваа во пилот програмата.
Иницијативата беше спроведена со поддршка од домашните НВО-партнери Центар за човекови права и разрешување на конфликти и Консалтинг и истражувања за ран детски развој, во соработка со десет детски градинки од општините Кисела Вода, Гази Баба, Чаир, Куманово, Тетово, Гостивар, Кочани, Кичево, Битола и Охрид. /крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.