Десет претставки од граѓани кои се пожалиле на малтретирање, психичка и физичка тортура од страна на полицијата пристигнале на адресата на Хелсиншкиот комитет во изминатите 12 месеци, соопштија од Комитетот во четврток на Меѓународниот ден за поддршка на жртвите од мачење и друго сурово, нечовечно или понижувачко постапување и казнување.
 

Десет претставки од граѓани кои се пожалиле на малтретирање, психичка и физичка тортура од страна на полицијата пристигнале на адресата на Хелсиншкиот комитет во изминатите 12 месеци, соопштија од Комитетот во четврток на Меѓународниот ден за поддршка на жртвите од мачење и друго сурово, нечовечно или понижувачко постапување и казнување.

Од таму велат дека последниот пример со глувото дете незаконски сместено во Заводот „Бања Банско“ за кое јавноста дозна по неколку месеци од неговото измачување е показател не само за негрижата на државата кон оваа ранлива група, туку и дека тортурата во затворените институции сé уште претставува реалност.

„Во изминатите 12 месеци до Комитетот беа поднесени десет претставки од граѓани кои се пожалиле на малтретирање, психичка и физичка тортура од страна на полицијата. Иако надлежните институции беа известени за сите кривично-правни настани, само еден случај заврши со судска разрешница. Случајот на Зухер Ибраимов, осудено лице кое по напад од полицаец во КПУ ’Идризово’ ја изгуби слезинката и еден бубрег, беше карактеризиран како ’тешка телесна повреда’, наместо како ’тортура’. Обвинетиот полицаец по поминати три месеца во домашен притвор беше вратен на работа до моментот кога неговата шест месечна затворска казна беше зголемена на една и пол година од страна на второстепениот суд. Во меѓувреме господин Ибраимов беше вратен на отслужување на затворската казна во услови за живот кои претставуваат опасност за дополнително влошување на неговата здравствена состојба“, велат од Хелсиншки.

Останатите инциденти, додаваат, завршиле без разрешница, со контра кривична пријава од страна на полицијата или со повлекување под притисок на жртвите во постапката.

„Меѓу овие инциденти се и полициското малтретирање на Роми во населбата Топанско поле кога неколку граѓани беа нападнати и приведени и покрај тоа што не сториле кривично дело. Припадници на специјалната единица ’Алфа’ оваа година без причина нападна помладо момче, а во друг инцидент без причина тепан и омаловажуван беше малолетник, припадник на ромската заедница. И покрај тоа што се работи за тортура над малолетник, ниту Јавното обвинителство, ниту МВР не поведе службена постапка. Овие примери укажуваат на опстојување на феноменот на неказнивост и солидаризирање на јавното обвинителство и судството со полицијата“, истакнуваат од Комитетот за заштита на човековите права.

Од таму упатија апел до властите „конечно да го препознаат постоењето на тортурата и да развијат политики за заштита од овој варварски чин“.

На денешен ден, 26-ти јуни, освен Меѓународниот ден за поддршка на жртвите од тортура  се одбележуваат и 30 години од усвојувањето на Конвенцијата против тортура на Обединетите нации, како и 20 години од нејзиното спроведување во Република Македонија. Конвенцијата ги обврзува државите да спроведат нулта толеранција кон актите на тортура, да го сузбијат феноменот на неказнување на државните службеници и да обезбедат поддршка за жртвите од тортура. Правото на заштита од тортура е апсолутно и не може да биде одземено или ограничено под ниту една околност./крај/мф/сд