Клучните наодите од истражувањето спроведено од невладината „Реактор – Истражување во акција“ укажуваат на загрижувачката состојба во која се наоѓа академската професија во Македонија, беше објавено на прес-конференцијата во петокот.

„Ова е прво истражување од ваков вид во Македонија. Имајќи предвид дека се наоѓаме во критично време за високото образование, се надеваме дека резултатите ќе бидат земени предвид при креирањето на новата политика и новиот Закон за високото образование“, рече Неда Коруновска, претседателка на „Реактор – Истражување во акција“.

Притоа беа презентирани резултатите од истражувањето коешто ги испитува состојбите во академската професија и ставовите на академскиот кадар во Македонија. Истражувањето, на примерок од 487 испитаници, вработени како наставен, научен, или соработнички кадар во високообразованите институции во Македонија опфаќа широк спектар од прашања поврзани со општите услови за академска работа, задоволството од работата, мобилност на академскиот кадар, автономијата на високообразовните институции и самиот процес на донесување одлуки, како и ставовите во однос на дел од актуелните реформи во високото образование.

„Резултатите од истражувањето укажуваат дека високото образование се движи во погрешен правец, при што најголем дел од академскиот кадар е незадоволен од повеќето реформски политики. Ако се земе предвид дека 71 отсто од испитаниците сметаат дека владиниот интервенционизам во високото образование е висок, може да зборуваме само за привидна или процедурална институционална и финансиска автономија на високообразовните институции во Македонија. За да се обезбеди функционална автономија, мора да се овозможи поширок простор за делување на високообразованите институции, што секако ќе значи и потреба од зголемена транспарентност и одговорност од нивна страна“, рече Мартин Галевски, автор на истражувањето.

Дополнително, истражувањето идентификувало генерациски јаз на низа прашања што е загрижувачки за иднината на академската професија.

„Бројот на академски кадар кој себеси се гледа надвор од Македонија е повеќе од алармантен и укажува на потенцијален интелектуален егзодус со тешко надоместливи последици. Резултатите од истражувањето укажуваат и на сериозниот недостатокот на можности за напредок во кариерата на помладиот академски кадар, што може дополнително да го поттикне одливот на мозоци. За да се намали одливот на научен кадар, потребно е драстично да се подобрат условите за работа, да се зголеми бројот на редовни вработени кадри и да се обезбедат можности за континуиран кариерен напредок. Доколку не се преземат соодветни чекори за подобрување на состојбите во високото образование, ризикуваме да го изгубиме еден од најзначајните сегменти од општеството“, рпедупреди Галевски.

Од „Реактор – Истражување во акција“, исто така, укажаа и на неопходноста од транспарентен процес за креирање на новиот Закон за високо образование, кој ќе обезбеди целосна вклученост и соработка на универзитетот, студентите, професорите, граѓанското општество и стручната јавност. Државните институции на тоа се обврзани со постојната законска регулатива и стратешки документи. До денес, таков процес не беше обезбеден, и оттаму апелираат новите реформи да бидат креирани низ инклузивен процес./крај/мф/сн

Извор: Макфакс