Ако во минатото државата ги креирала образовните профили за нејзините потреби, денес, сè повеќе пазарот и бизнисот ја преземаат оваа улога, креирајќи профили според своите потреби, а оттука, повеќе од јасно е дека нè очекуваат неопходни реформи, истакна претседателот на Република Македонија, Ѓорге Иванов, во годишното обраќање во Собранието на Република Македонија, прво во неговиот втор мандат. 

Според претседателот Иванов, македонските универзитети не котираат високо на ранг листите, а македонските студенти, со ретки исклучоци, не добиваат конкурентно образование за глобалниот натревар. Успешните приказни во образованието, смета Иванов, најчесто се резултат на лична иницијатива, лични амбиции и ангажираност од самите студенти и професори.

„Невозможно е да се проектира иднината на Македонија без успешна трансформација на образованието, бидејќи иднината на државата зависи од квалитетот на високото образование, како што и тоа зависи од квалитетот на претходните степени на образование“, истакна македонскиот претседател.

Според Иванов, само со длабоки реформи во образованието на сите нивоа, македонските студенти и професори ќе станат партнери, а не само консументи на резултатите на глобалните научноистражувачки достигнувања.

„Со внимание ја следам широката стручна и јавна дебата за нови сеопфатни законски решенија за сите степени на образование. Неопходно е да се слушнат сите засегнати страни, и универзитетите и студентите, наставниците и учениците, родителите, бизнис-секторот, предлагачот… Заеднички и низ дијалог да го најдеме најдоброто решение. Студирањето е и израз на слобода, но и на одговорност. Автономијата на универзитетот е уставно загарантирана и мора да се почитува“, рече Иванов.

Како претседател, но и како универзитетски професор, додаде Иванов, континуирано се среќавал со студентите. Минатата година имал одделни средби и со најдобрите студенти од сите државни универзитети од Република Македонија, на кои отворено разговарале за сите проблеми и прашања со кои се соочуваат студентите. Заедничкиот заклучок од тие средби бил дека локалните стандарди создаваат локална вредност, а светските стандарди создаваат светска вредност.

„На Македонија ѝ се потребни студенти и професори според врвни стандарди, за да бидат препознатливи и конкурентни на глобалниот пазар на знаење“, нагласи Иванов.

Науката во минатото се сметала за трошок, а тој ментален став, како што рече претседателот Иванов, постои и денес и сè уште премалку се инвестира во науката и во научните истражувања.

„Затоа, повикувам буџетот и поддршката за науката да бидат зголемени, бидејќи економскиот успех на државата се темели на знаење, наука и образование. Вложувањето во наука и во истражување влијае врз намалувањето на невработеноста и зголемувањето на конкурентноста на македонската економија“, истакна шефот на македонската држава.

Како што рече Иванов, проектот за целосно стипендирање на студентите што се запишуваат на 100-те најдобри универзитети во светот, е достоен за почит, а  Македонија е една од ретките држави во светот што имаат ваков вид стипендии. Со ова, нагласи македонскиот претседател, инвестираме, за идните генерации да имаат подобри услови од претходните генерации. Останува овој процес на стипендирање успешно да се заокружи и да се спроведе до крај, онака како што е планиран, за студентите кога ќе се вратат во Македонија веднаш да најдат работа./крај/мф/бс