Изворот на бактеријата листерија што ја има во храната и од која во последниот месец во Македонија починаа три лица сé уште се утврдува. Во тек е акција на надлежните институции за земање мостри од големите производители на храна и пазарите и до крајот на неделата се очекува да се дознае изворот, информираше во вторник д-р Јованка Костовска од Министерството за здравство.

Во последните 30 дена во Македонија има седум заразени случаи од бактеријата листерија, од кои три завршија со смртен исход. Станува збор за лица на возраст од 72 и 59 години и едно новороденче. Од останатите заболени лица, уште едно е новороденче кое се наоѓа на Интензивна нега во Детската клиника во добра состојба, двајца возрасни се излекувани, а уште еден возрасен се наоѓа во критична состојба. Случаите се регистрирани поединечно во текот на јуни, но алармот кај надлежните го вклучиле трите случаи во јули.

Претседателот на Комисијата за заразни болести, д-р Звонко Миленковиќ, информираше дека заболените доаѓаат од пет различни градови на Македонија – Скопје, Македонски Брод, Охрид, Кочани и Гевгелија, и дека сите спаѓаат во таканаречена ризична категорија граѓани односно повозрасни лица со хронични заболувања и со намален имунитет. Додаде дека заразата не се пренесува од човек на човек, освен во случаите кога се пренесува од мајка на плод.

Миленковиќ рече дека ризична храна во која може да ја има бактеријата претставуваат месото и млекото, пастеризирано и непастеризирано, млечните и месните производи, морските плодови и рибата, како и готовите овошни и зеленчукови салати што се продаваат во големите супермаркети.

Изворот на заразата сé уште не е познат и во тек се повеќе активности и мерки на надлежни институции за откривање на изворот на бактеријата. Така, Агенцијата за храна врши вонредни контроли во сите поголеми производствени погони за храна, магацини за чување и дистрибуција на храна и на сите зелени пазари. Државниот санитарен и здравствен инспекторат врши контрола на безбедноста на млекото наменето за доенчиња на одделенијата за неонатологија и педијатриски одделенија. Акциите продолжуваат до крајот на неделата.

Миленковиќ рече дека нема други заразени случаи на Клиниката за инфективни болести со оваа бактерија, која, напомена ја има насекаде.

Последна голема епидемија на листерија се појави во 2011 во САД, а се рашири преку дињите кои доаѓаат во средба со бактеријата во почвата. Затоа пред консумација треба убаво да се измие и да се избрише. Но, дури и во овие случаи поради нерамната површина на дињата, листеријата навлегува во пулпата и се мултиплицира кога овошјето се става во фрижидер. Иако температурата во фрижидерите е во просек 4 степени, температура која обично не дозволува размножување на други бактерии, листеријата расте и на 4 степени Целзиусови.

Листериозата е бактериско заболување, кое најчесто настанува по внесување на храна контаминирана со бактеријата листерија, како што е месо, преработки од месо, непастеризирано млеко и млечни производи, недоволно измиено овошје и зеленчук, димена риба и друго.

Кај здрави лица со подобар имунитет, листериозното заболување поминува со полесна клиничка слика, со стомачни проблеми, дијареа или симптоми слични на грип. Листеријата се уништува со добра термичка обработка, со печена и варена храна (над 70 степени Целзиусови).

Најчесто се регистрира меѓу постари лица со намален имунитет, бремени жени и новородени деца. Кај нив може да предизвика сериозни компликации, како сепса, воспаление на мозочни обвивки (менинго енцефалит), воспаление на срцева обвивка (перикардит), воспаление на зглобови и сл.

За препораките за превенција од болеста прочитајте ТУКА. крај/мф/сд