Општество
Нови 4,7 милиони евра за стипендии во Еразмус плус програмата
Јакнење на знаењата и вештините, имплементирање нови образовни техники и методи, обуки за млади и можност за работно искуство во странство, се главните придобивки на караванот „Еразмус Плус“, што го организира Националната агенција за европски образовни програми и мобилност.
Во следните два месеци во рамките на караванот „Еразмус плус“ ќе се одржат низа активности во повеќе градови низ Македонија чија цел е презентирање и едукација на младите за можностите што ги нуди програмата. Од понеделник отворен е новиот конкурс за апцилирање за програмите што ги нуди Еразмус плус за чија реализација Европската комисија стави на располагање 4,7 милиони евра. Конкурсот е објавен на интернет страницата на Националната агенција за европски образовни програми и мобилност. „Креирање на нови можности за едукација и стекнување на нови знаења и вештини за младите, е наш врвен приоритет. Освен што преку нашите активности ќе ги доближиме и ќе ги направиме достапни во Македонија, овие програми ќе овозможат да се подигне нивото на едукација, искуство и вештини кај младите, што ќе резултира со поголема конкурентност на младите човечки ресурси. Тоа значи поголем потенцијал и добра основа за развој на земјата што е наша крајна цел“, рече Дарко Димитров, директор на Националната агенција за европски образовни политики и мобилност, на промоцијата на активностите што ќе следат во рамките на проектот во следните два месеци. Во рамките на караванот „Еразмус Плус“ ќе се одржат инфо–денови во повеќе градови низ Македонија, каде што сите што се заинтересирани за зајакнување на вештините и можностите за вработување, модернизација на образованието, обуката и младинската работа, ќе добијат основни информации за начинот на кој можат да се вклучат и да ги искористат поволностите што ги нуди програмата. Можностите што ги нуди „Еразмус Плус“ програмата се обезбедени со поддршка на Европската унија (ЕУ). „Обединување на различностите и создавање на еднакви вредности за сите е еден од основните постулати на Европската унија. Оттука оваа програма ќе овозможи подобра едукација и стекнување на нови вештини и искуства и создавање на нови вредности на една заеднички прифатлива основа и ќе придонесе за приближување на различните култури во Европа, преку обезбедување на можности за над 4 милиони Европјани да учат, да стекнат работно искуство и да волонтера во други држави. Не охрабрува големиот интерес за стипендии на младите луѓе“, рекоа од делегацијата на ЕУ во Македонија. Во насока на поголемо приближување на можностите што ги нуди „Еразмус плус“ програмата и реалниот бизнис сектор ќе бидат организирани и две работилници во соработка со Сојузот на стопански комори на Македонија кои ќе се одржат во Скопје и во Битола. Новите трендови и можности во едукативните системи е главна заложба на Министерството за образование и наука. „Образованието е жива материја која мора да ги следи потребите на реалниот пазар и на младите и да даде соодветен системски одговор. За нивно соодветно имплементирање пред се во формалното образование од особена важност е тесна соработка на сите инволвирани институции што работат на оваа проблематика. „Еразмус плус“ програмата овозможува едукативна надградба, но претставува исто така добра основа за воведување на новините и во системското образование“, истакна Абдулаќим Адеми, министер за образование и наука. Покрај другите активности во рамките на караванот „Еразмус плус“ ќе се организираат два ECVET семинари, конференции во Скопје, Валоризациона конференција во Скопје, АТОК семинар во Скопје, обуки за волонтери кои ќе се одржат во Скопје, е-Твиниг семинар во Охрид, ЕВРИДИКА конференција и ЕУРОПАС семинар./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Годишен извештај на Народниот правобранител: Помалку претставки од граѓаните за работата на јавните обвинителства
Во извештајната 2023 година, во областа која се однесува на работата и постапувањето на обвинителствата во Република Северна Македонија поднесени се 63 претставки што е за 24 помалку во однос на 2022 година, се констатира во Годишниот извештај за степенот на обезбедувањето почитување, унапредување и заштита на човековите слободи и права во 2023 година што го објавува Народниот правобранител на Република Северна Македонија.
Согласно објавените податоци, бројот на претставки на граѓаните на годишно ниво се намалил за повеќе од 38%, што претставува резултат на заложбите на Јавното обвинителство за зголемување на ефикасноста на постапките и континуираните напори за подобрување на довербата на граѓаните во работата на јавните обвинителства.
Во најголем број од претставките граѓаните бараа интервенција во врска со постапки пред основните јавни обвинителства (51), потоа пред Основното јавно обвинителството за организиран криминал и корупција (4), постапка пред Јавното обвинителство на РСМ (3), пред вишите јавни обвинителства (2), друго (2) и една претставка се однесуваше за постапка пред Совет на јавни обвинители. Ваквиот сооднос е очекуван со оглед на обемот на предметна работа и фактот што токму јавните обвинителства со основна надлежност го прават првиот директен контакт на граѓаните со институцијата.
Доколку се има предвид вкупниот обем на работа на јавните обвинителства кои активно постапуваат по поднесени кривични пријави за над 40.000 сторители на кривични дела во текот на годината, поднесените 63 претставки до Народниот правобранител претставуваат околу 0,1% од таа бројка. Притоа, граѓаните во посочените предмети изразувале незадоволство поради непостапување по поднесена пријава на кривично дело, одолжување на постапката или поради незадоволство од донесена одлука. Од тие причини Народниот правобранител, меѓу останатите препораки во извештајот, во делот на Јавното обвинителство препорачува основните јавни обвинителства да ги доставуваат јавнообвинителските одлуки до странките и да им се овозможи правото да ги обжалат до повисоките јавни обвинителства, да постапуваат поажурно и навремено да преземаат дејствија, да го почитуваат рокот од 3 месеци доколку не донесат јавнообвинителска одлука да го известуваат повисокиот јавен обвинител и пријавителот, за да нема сомневање и страв дека гонењето ќе застари.
Сите овие забелешки Јавното обвинителство ги зема предвид, детално ги анализира и ќе продолжи да презема активности за дополнително зголемување на ефикасноста, на транспарентноста и на отчетноста за постапките што ги води. Ваквите заложби на Јавното обвинителство се веќе воспоставен начин на работа при што уште во извештајот за 2022 година омбудсманот констатираше дека за разлика од претходните години, сега јавните обвинителства, особено издвојувајќи ги Основното јавно обвинителство Скопје и Основно јавно обвинителство за гонење на организиран криминал и корупција, постапуваат по барањата на Народниот правобранител, даваат суштински и целосни одговори за бараните информации од постапките, се вели во соопштението од Јавното обвинителство.
Македонија
Денеска со зајдисонце за муслиманите започнува месецот Рамазан
Денеска со зајдисонце за муслиманите започнува месецот Рамазан, при што се поттикнуваат добри дела, молитви и читање Куран чие објавување започна токму во месецот Рамазан пред повеќе од 1.400 години.
Рамазан е деветтиот месец од муслиманскиот лунарен календар, благословен и свет месец во кој верниците од исламска вероисповед ширум светот постат во текот на дневните часови.
Целта е да се излезе од Рамазан подобар, поздрав, со простени гревови.
Првиот ден на постот е во понеделник на 11 март, а последниот на 9 април.
Рамазан е месец на прочистување на духот, умот и телото во кој муслиманите се откажуваат од храна, пијалок и други телесни задоволства, не прават неморални дела и избегнуваат гнев.
Добротворноста е многу важен дел од исламот и уште поважно е за време на Рамазан кога муслиманите се потсетуваат на великодушноста и ги зголемуваат своите добротворни активности.
Секоја година, Рамазан започнува 10 до 12 дена порано бидејќи исламскиот календар е всушност лунарен хиџри календар каде месеците имаат 29 или 30 дена.
Бидејќи лунарната година е пократка од сончевата година за 11 дена, во 2030 година ќе има два Рамазани – првиот ќе започне на 5 јануари, а вториот на 26 декември.
Постот завршува со Бајрам.
Македонија
Народната банка со поддршка за борбата против семејното насилство
Вработените во Народната банка организираа хуманитарна акција, преку која изразија поддршка за борбата против семејното насилство. Донацијата на вработените за „Кризниот центар за згрижување на жени жртви на семејно насилство-Надеж“, кој 20 години нуди поддршка и помош на жените кои поминуваат низ тешки животни искуства, ја врачија гувернерката на Народната банка, Анита Ангеловска-Бежоска, вицегувернерката Ана Митреска и претставници на Синдикатот на вработените во Народната банка.
При посетата на Кризниот центар, тимот на Народната банка се запозна со предизвиците со кои се соочува здружението и активностите кои ги преземаат за помош и поддршка на жените жртви на насилство. На средбата беше истакната потребата од понатамошно јакнење на свеста на сите општествени чинители за предизвиците со кои се соочуваат овие жени и долгиот процес и улогата на општеството во нивната рехабилитација.
„Потребата од натамошно подобрување на состојбите треба да е и причина да размислиме што и каде може да се унапреди за да се направат промени. Треба да посветиме должно внимание и да упатиме гласни пораки дека со економско зајакнување, жените жртви на семејно насилство многу полесно ќе го прекинат кругот на насилство и помалку ќе бидат жртви. Потребна е многу поголема сензибилност во однос на пристапот до работа на оваа ранлива категорија на жени. Тоа подразбира креирање мерки за нивно вработување, врз основа на реалните потреби на жените, или нивна стручна преквалификација, доквалификација што ќе придонесе за нивно интегрирање и задржување на пазарот на трудот“, истакна гувернерката Ангеловска-Бежоска, при посетата на Здружението „Кризен центар за згрижување на жени жртви на семејно насилство-Надеж“.