Третата изложба на експонати на млади истражувачи се одржа во петок, 07-ми ноември, по повод Светскиот ден на науката за мир и развој.

Експонатите беа изложени во Народната канцеларија на претседателот на Република Македонија, Ѓорге Иванов, кој ги посети младите истражувачи и со нив разговараше за изработените дела. 

Проектите ги изработија основци и средношколци кои освоиле прво место на 50-тиот Државен натпревар на Сојузот на здруженијата на младите истражувачи на Македонија – Наука на младите и наградени проекти на МАКИНОВА и ЕКОНОВА 2014, а пет експонати се на студенти од Факултетот за електротехника и информациски технологии. 

Изложбата ја отвори претседателот Иванов со признание за наградените млади научници, но и апел до сите млади да инвестираат во себе и да го вложат времето во науката, учејќи ја практиката, а не само теоријата да нудат решенија за добробит на општеството. 

 „Настаните како денешниот се поттик за младите, времето да го посветат на науката. Ова е апел што повеќе млади луѓе да истражуваат, да бидат креативни и да наоѓаат начини и решенија за предизвиците што ги носи животот. Ги повикувам младите што повеќе да се посветат на науката, да вложуваат во себе и своето знаење“, рече претседателот Иванов.

„Обележувањето на Светскиот ден на науката за мир и развој со изложба на наградени проекти од млади истражувачи  овозможува нивно презентирање пред јавноста и оддавање признание за нивните достигнувања и секако поттикнување на креативниот и иновативниот  дух кај младите од најрана возраст. Изложбата по трет пат се организира во Народната канцеларија на Претседателот на Република Македонија и одгодина во година добива на квалитет и масовност во однос на проектите и бројот на посетители. Очекуваме дека следната  година оваа веќе традиционална манифестација ќе ја органзираме и во Народните канцеларии во Тетово и Битола“, вели Христина Спасевска, претседател на Народна техника. 

На третата изложба, основците и средношколците имаа можност да се дружат и разговараат со своите повозрасни колеги од Факултетот за електротехника и информациски технологии. 

„Факултетот за електротехника и информациски технологии ги негува овие млади научно- истражувачки кадри и преку оваа манифестација им дава признание за нивните постигнати успеси. Токму затоа, нашиот факултет им стои на располагање, уште сега, тие да бидат дел од нашите проекти. Како високо образовна институција ги негуваме и говориме за нив, но и државата треба повеќе да ги промовира, да ги поттикнуваме и на понатамошни резултати. Затоа што, со овие млади научници и истражувачи, како држава, напредуваме во светот на технолошките достигнувања. Заедно со Народна техника, а под покровителство на Претседателот на државата ќе ја продолжиме оваа традиција, која треба да се негува за да продолжи да живее“, вели професор Миле Станковски, декан на ФЕИТ. 

Презентерите на експонатите доаѓаат од Скопје, Битола, Прилеп, Кавадарци, Неготино, Струмица, Берово, Делчево, Велес и Гостивар. 

Изложбата „Наука на младите“ ја организираат Сојузот на младите истражувачи на Македонија – Наука на младите при Народна техника на Македонија во соработка со Факултетот за електротехника и информациски технологии при Универзитетот „Св. Кирил и Методиј“ и таа прераснува во традиционална манифестација при одбележување на Светскиот ден на науката со специјален акцент на младите научници и истражувачи. Покровител, секоја година е претседателот на Република Македонија. 

Покрај претседателот, изложбата ја посетија и претставници од Хрватскиот Универзитет, како и околу стотина основци и средношколци.крај/мф