Поранешните професионални војници како Роберт Јанев и Сашко Сарџоски, во понеделник, потпишаа решенија за вработување во други институции откако по навршување 45 години старост им престана ангажманот во АРМ, но едниот не знаеше каде е распределан на ново работно место, а другиот не знаеше уште колку долго ќе остане во Министерството за одбрана.

Јанев од село Паликура, кај Росоман, изрази голема благодарност до Министерството за одбрана и до Владата на Македонија, што смогнале сили да го решат долгогодишниот проблем. Тој шест години бил невработен, а е сопруг и татко на две деца. „Јас сѐ уште не сум во тек, сега ќе ги потпишиме договорите, но според образованието мислам, се надевам, да бидам или во судска полиција или во другите ресори“, вели Јанев.Поранешниот војник Сашко Сарџоски од Скопје, исто така, изрази благодарност до Владата и Министерството за одбрана што им е решен долгогодишниот проблем со вработуањето.Тој вели дека останува да работи во Министерството за одбрана и дека знае дека потоа можеби ќе биде прераспределен, според планот на Владата, но не знае колку долго ќе остане на новото работно место.Во понеделник, во Домот на АРМ во Скопје 112 поранешни професионални војници во АРМ во присуство на премиерот за спроведување на изборите Емил Димитриев и министерот за одбрана Зоран Јолевски, потпишаа договори за вработување со што трајно е решен нивниот статус.Премиерот за спроведување на изборите Димитриев честитајќи им на поранешните професионални војници за потпишаните договори за вработување во државните институции, нагласи дека „како и досега и во иднина во Владата ќе имаат искрен партнер и ќе се продолжи со посветена работа“, нови мерки и проекти, со практикување на политика на отворени врати и блискост со граѓаните на Република Македонија.„Познавајќи ги вашите одлични работни навики, вашето одлична подготвеност и посветеност докажана како во земјата, така и надвор во мировните мисии, убеден сум дека одлично ќе се снајдете на новите работни места на кои ќе бидете распоредени и оти институциите во кои ќе продолжите да работите добиваат исклучително професионален кадар“, рече Димитриев. Министерот Јолевски изрази надеж дека извонредно квалитетните вештини стекнати за време на служењето во АРМ како професионални војници, ќе бидат најдобро искористени од другите државни институции, а во иднина најверојатно и приватниот сектор.Инаку, Владата донесе одлука и акциски план согласно кои 112 поранешни припадници на професионалниот состав на АРМ, ќе бидат вработени во рамките на државните институции.Се работи за 112 поранешни професионални војници на кои им престанала службата во АРМ поради исполнување на старосната граница заради навршени 35, односно 38 години возраст, а со последното зголемување на границата 45 години возраст, коишто по исполнувањето на професионалниот договор останале невработени, а врз основа на законот поднеле барање за вработување и ги исполниле условите од законот за да бидат вработени.Според планот, 19 лица ќе бидат вработени во институциите на Министерството за здравство, 19 ќе бидат вработени во рамките на Управата за извршување на санкции, 45 поранешни професионални војници ќе бидат вработени во Министерството за правда и во судската полиција, а 29 во Министерството за одбрана, а потоа дел ќе останат таму, додека дел согласно потребите од останатите институции и взаемната согласност, ќе бидат прераспределени и во други државни институции./крај/мф/бб