Приоритет на Владата и на Министерството за труд и социјална политика е обезбедување на достоинствен живот на старите лица и пензионерите, истакна министерот за труд и социјална политика, Диме Спасов, во своето обраќање во сабота на 19-те Републички спортски пензионерски игри во организација на Сојузот на здруженија на пензионери на Македонија.

„Би сакал да истакнам дека пензионерите се значајна алка во социјалниот живот, бидејќи располагаат со искуства и знаење и се директно заслужни за развојот на нашата држава. За мене како ресорен министер, соработката на државните институции со невладиниот сектор е клучен фактор во развојот на една демократска држава како што е Република Македонија, а особено кога се работи за социјалните права и интереси”.

Toj потврди дека  приоритет на Владата и на министерството за труд и социјална политика е обезбедување на достоинствен живот на старите лица и пензионерите, притоа се осврна и на економската криза во Европа која имаше влијание и врз социјалното осигурување, особено врз пензиите и нивната исплата во огромен број на држави.

„Некои држави преземаа рестриктивни мерки во пензиското осигурување кое допринесе  со намалување на правата или „замрзнување“ на висината на пензијата за неколку години. За разлика од другите држави во Република Македонија пензиите се исплатуваат редовно и се врши усогласување и континуирано зголемување. Почнувајќи од  2006 година до сега  просечната пензија се зголеми  за  62%, а најниската пензија од 2006 година до сега се зголеми за 76%.Исплатата на пензиите, континуирано и постојано се врши во првата седмица од месецот, она што го ветивме го остваруваме постојано” рече Спасов

Тој потсети дека во 2014 година  се изврши  усогласување на пензиите за 5%, односно од март 2014 година со исплатата на февруарската пензија секој пензионер доби дополнително усогласување на пензијата од 600  денари.

Во своето излагање Спасов се осврна на проектот „Бањско климатска рекреација на корисници на пензија со кој годинава ќе бидат опфатени 5.500 пензионери и со тоа од почетокот на проектот во 2010 година, па заклучно со оваа година оваа бесплатна услуга ќе ја искористат над 27.600 пензионери.

Спасов најави дека од следната година ќе почне спроведувањето на новиот проект „Бесплатен туристички викенд на корисници на пензија“ со кој ќе бидат опфатени до 3.000 корисници на пензија.

Исто така, Спасов потсети дека во 2014 година се отворени три дневни центри, а МТСП планира и понатаму да продолжи со истиот интензитет.

Министерот истакна дека се воведени низа на поволности за отворање на приватни старски домови при што интересот за инвестирање е сè и дека заедно со министерството за здравство е започнат и проектот за домашна грижа на стари лица за оние кои што се во потешка здравствена положба.

Покрај другото, додаде, Владата во соработка со градот Скопје овозможи бесплатен превоз во градскиот јавен сообраќај во Скопје во вторник, петок, сабота и недела.

Исто така, годинава стартуваше проектот за  бесплатен викенд  еднаш во месецот за превоз на старите лица во железничкиот сообраќај во Република Македонија. Сите лица мажи над 64 години и жени над 62 години имаат право на бесплатен превоз во повратен правец во определен викенд во месецот.крај/мф/сд