Македонија
Александар Николоски избран во 40 највлијателни личности под 40 години во Европа

Бриселската „Пријатели на Европа“ („Friends of Europe“) го избра Александар Николоски како еден од 40 највлијателни личности под 40 години во Европа.
„Пријатели на Европа“ според неподелените мислења е највлијателна организација во Брисел и активно учествува во креирањето политики на ЕУ и создава општествени промени во Европа, а во нејзиниот управувачки комитет седат премиери, претседатели, претседатели на Европската комисија, евро комесари и други јавни личности од Европа. Секоја година ги номинира највлијателните личности од јавниот живот, политиката , науката, бизнис секторот да бидат дел од престижната програма Европски Млади Лидери кои се под 40 години.
Можност да бидат дел од оваа програма се веќе докажани личности кои имаат силно влијание во општествените случувања во Европа. Целта на овој проект е заедничко вмрежување на веќе докажаните 40 личности од Европа кои веќе имаат успешни кариери од областа со која се занимаваат и нивно заедничко дејствување во поглед на промени во политичкиот и социјален живот во Европа. Алумните од изминатите години и учесниците од оваа генерација заедно со водечките личности во Европа и ЕУ заеднички создаваат решенија за сите жители на континентот, ги зајакнуваат демократските капацитети и креираат нови политики во насока на подобрување на квалитетот на живот.
Еве што напишаа за избраните лидери оваа година: „Нивната страст, креативност и иновативно размислување создаваат совршена формула за генерирање на свежи идеи за изградба на Европа со понапредно размислување. Главни уредници на пионерски публикации и медиуми, лекари хуманитарци, политичари од сите нивоа на власт, актерка прикажана на Нетфликс, научници, како и иноватори што ја предводат зелената дигитална транзиција, го сочинуваат овогодинешниот избор EYL40 Class 2022 година. Од шампионите и уметници преку технолошките претприемачи, до водечките активисти и олимписките спортисти се годинешниот избор .“
А, еве што за изборот на Александар Николоски напишаа од „Пријатели на Европа “:
„Пратеникот во Собранието на Република Македонија, Александар е потпретседател на најголемата опозициска партија во земјата ВМРО-ДПМНЕ. Посветен на справување со корупцијата и настојување за членство на Македонија во ЕУ, тој е претседател на Националниот совет за европска интеграција, во која улога ги олеснува разговорите за пристапување на земјата во ЕУ. Александар е заменик-претседател на групата на Европската народна партија во Парламентарното собрание на Советот на Европа (ПССЕ), каде што е и член на Комитетот за правни прашања и човекови права. Тој претходно беше потпретседател на ПССЕ, како и прв потпретседател на Комитетот за политички прашања и демократија, како и на Комитетот за следење. Пред неговото влегување во политиката, Александар беше секретар на ФРЕСТА, програма предводена од данското Министерство за надворешни работи за промовирање на заедницата на невладините организации и меѓуетничкиот дијалог во југоисточна Европа“.
Покрај Николоски оваа година дел од 40 највлијателни личности под 40 години во Европа се и Михаел Шимечка потпретседател на Европскиот Парламент, Михаи Данила – потпретседател на најголемиот инвестициски фонд во светот Блек Рок, Катинка Хосу пливачка која има три олимписки златни медали и вкупно 96 медали во кариерата, Томс Јурјевс основач и директор на Сан Фајнанс груп која обезбедува преку 1,2 милијарди евра во кредити за мали корисници, Нектариос Каланти Претседател на градоначалниците на Европа, Софи Мусел позната актерка со улоги во филмови и серии на Нетфликс, Соиел Мирпур член на управниот одбор на Рокет Интернет најголема европска компанија за поддршка на високоразвиени технолошки компании, Бенјамина Кариќ градоначалник на Сараево, Марио Брандебург пратеник во германскиот Бундестаг, Кристина Хансен од Данска која е градоначалник на Холбаек, Тамара Срзентиќ која е министерка за јавна администрација на Црна Гора, Витолд Банка од Полска претседател на светската анти допинг организација и други успешни млади лидери од Европа.
Главен мотив на „Пријатели од Европа“ е алумните на нејзините програми да бидат носители на главните промени кои треба да се случат во Европа и заедничко решавање на предизвиците со кои се соочува Европа како што се дигитализацијата, зајакнувањето на демократијата и европските вредности. Во изминатите речиси две децении голем дел од највлијателните и најталентирани личности во Европа биле дел од оваа програма и нивната воспоставена комуникација има силно влијание во Европа.
Изборот на Александар Николоски е големо признание особено затоа што ова е најпрестижно признание за личности под 40 години во Европа, а посебно е значаен делот во кој се опишува неговата работа како цитираме „Посветен на справување со корупцијата и настојување за членство на Македонија во ЕУ. “
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски жестоко му одговори на Филипче: Доста беше со итроштини, народот веќе не заборава, вие продадовте сѐ

Премиерот Христијан Мицкоски денеска остро одговори на изјавата на лидерот на СДСМ, Венко Филипче, за нова декларација во Собранието за евроинтеграциите, нарекувајќи ја политика на „итроштини“ и обид за манипулација со граѓаните.
Премиерот потсети дека СДСМ и ДУИ веќе еднаш гласале декларација за неприфаќање на ултиматуми од Софија, но потоа, како што рече, прифатиле сè.
„СДСМ и ДУИ го потценуваат народот. Играт на картата на кратка меморија. Ама граѓаните добро знаат, прво донесоа декларација дека нема да се менува името, па го променија. Рекоа дека ќе го почитуваат референдумот, па не го почитуваа. Сè што ветија, изневерија“, истакна Мицкоски.
Тој порача дека Владата што ја предводи има јасна стратегија за иднината: „Нашата цел е развој, реформи и изградба. Ова не е игра за итроштини и ситни маневри. Тоа го видовме седум години и видовме каде стигнавме“.
Осврнувајќи се на поранешните функционери од СДСМ и ДУИ, премиерот рече дека граѓаните јасно гледаат „како со години се збогатуваа, а денес располагаат со милионски имот во земјата и странство“.
Лидерот на СДСМ, Венко Филипче, претходно изјави дека Собранието треба да донесе заедничка резолуција за евроинтеграциите и дека доколку Бугарија повторно стави вето, Македонија треба да ги прекине преговорите со ЕУ. Според него, Владата води „неискрена политика“ и свесно го пролонгира процесот.
Македонија
(Фото) Почина поранешниот директор на Здравствен дом – Скопје, д-р Виктор Исјановски

Тажна вест ја потресе македонската здравствена јавност попладнево. Почина д-р Виктор Исјановски, психијатар и поранешен директор на Здравствен дом – Скопје.
Неофицијално, Исјановски починал во Грција, каде што престојувал на летување. Вчера на социјалната мрежа Инстаграм Владимир Ристов – Камењар сподели фотографија од Таверна Фарос каде што е во друштво со д-р Исјановски и со кошаркарската легенда Перо Антиќ.

Фото: Инстаграм
Д-р Исјановски беше на чело на најголемата здравствена установа во државата од јуни 2019 до 2024 година. Јавноста најмногу го памети по неговиот ангажман за време на пандемијата на коронавирусот, кога Здравствен дом – Скопје со сите ресурси беше ставен во служба на граѓаните, особено во процесот на масовната вакцинација.
По професија специјалист психијатар, зад себе остави богата професионална кариера. Роден е на 21 јули 1978 година во Скопје, каде ги заврши основното и средното образование, а Медицинскиот факултет во Скопје го завршил во 2003 година.
Приватно, д-р Виктор Исјановски беше сопруг и татко на две деца.
Скопје
ДПМНЕ и Арсовска го држат Скопје во хаос, вели Шукова и ветува крај на блокадите

Кандидатката за градоначалник на Град Скопје од СДСМ, Каја Шукова, денеска упати жестоки критики кон ВМРО-ДПМНЕ и актуелната градоначалничка Данела Арсовска, обвинувајќи ги дека со години ги блокираат проектите од витално значење за градот.
„Секојдневно гледаме како капитални проекти кои се клучни за скопјани стојат заглавени поради политички игри, опструкции и незаинтересираност за реалните потреби на граѓаните“, изјави Шукова во посета на Карпош.
Таа како пример го посочи булеварот од мостот кај Љубљанска до улицата Скупи, кој според неа е од огромно значење за растоварување на метежот и подобро поврзување на Карпош со остатокот од градот.
„Сè е готово – проектна документација, експропријација, дури и обезбедени 190 милиони денари. Единствено се чека дозвола од Министерството за култура за теренски истражувања. Но веќе две години, блокада и застој!“, потенцираше Шукова.
Таа најави дека како идна градоначалничка ќе се заложи целосно да ја деблокира изградбата на овој булевар и мост, како и сите други стопирани проекти што им се потребни на граѓаните.
„Како ваша градоначалничка, ќе направам сè во моја надлежност оваа блокада да заврши. Ќе инсистирам истражувањата веднаш да завршат и да ја почнеме изградбата. Граѓаните одамна заслужуваат современа, функционална и европска инфраструктура и ќе ја добијат!“, порача Шукова.