Македонија
(Видео) Николовски од Кратово: ВМРО-ДПМНЕ 11 години газеше врз работниците и стечајците

ВМРО-ДПМНЕ 11 години газеше врз работниците и стечајците, со СДСМ се враќа достоинството, СДСМ се бори за ред, дисциплина и правда, изјави Љупчо Николовски, генерален секретар на СДСМ и носител во ИЕ 3.
Тој денеска беше во посета на Кратово. Кажа дека се санира мостот над Кратовска река, кој се наоѓа на самиот влез на градот, а се реконструира и пристапниот пат до Центарот за брза помош во Кратово. Николовски најави дека ќе се санира и свлечиштето на регионалниот пат Кратово – Пробиштип.
„Во изминатите две и пол години покажавме што значи вистинска грижа за сите граѓани. И инфраструктурно и за подобрување на економскиот стандард. Го цениме трудот, нема веќе работа за срамни 9.000 денари минимална плата. Ја зголемивме на 14.500 денари, а ќе оди до 20.000 денари во следниот мандат. 12.000 стечајци добиваат по 8.000 денари до нивно пензионирање. Тоа е почит. Тоа е разлика. Пари за граѓаните има и секогаш имало, само треба да се работи домаќински“, кажа Николовски.
Состојбата е тешка, додаде тој, се бориме против последиците од коронавирусот.
„Сите погодени од корона кризата добиваат институционална и солидарна помош. Еве само во Кратово, 521 лице ја искористи мерката субвенции за плати од 14.500 денари и 50 проценти придонеси, а 1856 лица добиле платежни картички. Во целиот Исток 24.431 лице добиле вакви субвенции, а 54.174 лица добиле платежни картички“, рече Николовски.
Има разлика, рече тој. „Од општество во кое ВМРО-ДПМНЕ 11 години газеше врз достоинството на луѓето, особено кон сиромашните и стечајците, денес станавме општество во кое се помага на сиромашните и ранливите, држава која се стреми сите да имаат и да уживаат еднакви права. Сега одиме понатаму. Нема веќе одложување. Правосудството мора да се прочисти од корумпираните судии и обвинители. Време е за ред и дисциплина во сите институции“, кажа Николовски.
Функционерите и институциите, додаде тој, мора да се отчетни, транспарентни и чесни.
„Законски ќе бидат обврзани да ги објавуваат сите службени трошоци во извршната, локалната и судската власт, а за оние кои нечесно ќе работат, ќе следат санкции. Администрацијата ќе биде департизирана, намалена за 20 проценти и целосно во функција на граѓаните. Нема веќе патни трошоци за пратениците во Собранието. Тоа водеше само кон страшна злоупотреба. Тоа е разликата меѓу СДСМ и ВМРО-ДПМНЕ. Ние се грижиме за граѓаните, тие се грижат само за себе. Затоа на 15 јули граѓаните без двоумење ќе се определат за СДСМ и Коалицијата „Можеме“. За нов мандат, за целосно враќање на редот и правдата“, рече Николовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.