Претсавници од партијата ВМРО-ДПМНЕ, во понеделник до основното јавно обвинителство доставија документација, од која според нив, се гледа дека тендери на јавното претпријатие „Струмица гас“се незаконски.

„Тендери на јавното претпријатие „Струмица гас“ кои Зоран Заев му ги даваше на неговиот сопартиец, претседател на партиската комисија за енергетика Митко Андреевски. Вака СДСМ подразбира транспарентна тендерска постапка. Секоја јавна набавка да завршува во нивните партиски џебови. Затоа Струмица нема гас и затоа струмичани плаќаат астрономски цени за гасот.Денес сме тука за да ги доставиме доказите за овој криминал до надлежното јавно обвинителство“, рече Васил Пишев од ВМРО-ДПМНЕ.

Обвини дека со криминалот поврзан со гасот во Струмица на јавното претпријатие само со последниот тендер од 2016-та година му е направена штета од 700.000 евра.

„Како што може да се види од целокупната документација која ја доставуваме до јавното обвинителство, фирмата СИ ЕН ЏИ СИСТЕМС од Скопје не ги исполнува условите за учество и за добивање на тендерот за гас на јавното претпријатие Струмица Гас. Единствениот услов што го исполнува фирмата СИ ЕН ЏИ СИСТЕМС е тоа што нејзиниот сопственик Митко Андреевски е претседател на партиската комисија за енергетика на СДСМ и близок пријател на Зоран Заев“, рече Пишев.

Појасни дека аргументите на Митко Андреевски дека неговата фирма соработувала со извесна фирма Галилео СА е уште еден доказ последниот тендер на Струмица гас е незаконски. Овој економски оператор не е регистриран во Електронскиот систем за јавни набавки./крај/со/бб