Пратеничките на ДОМ поднесоа три амандмани на буџетот за аерозагадувањето и колекторите во Охрид и Дојран како ургентни потреби за в година. Со амандманите е предвидена пренамена на средства од повеќе буџетски ставки во ставки стриктно наменети за подобрување на состојбите со животната средина во делот на воздухот и водите во вкупна вредност од 34,7 милиони евра.

„Амандманот за аерозагадувањето предвидува зголемување на предвидената програма од 1,6 милиони евра на 25 милиони евра, колку што беа и процените од Министерството за животна средина дека ќе бидат потребни, а кои планира да ги обезбеди од други министерства и донации. Средствата се наменети за: набавка на мерни инструменти за мониторинг на воздухот, набавка на опрема и акредитација на централна референтна лабораторија, промена на горивата, поставување сончеви панели и енергетска ефикасност за јавни објекти и домаќинствата, како и за изработка на регистар на возила. Се очекува со ова да се постигнат видливи ефекти во текот на една година“, велат од ДОМ.

Амандманот за Охридското Езеро обезбедува средства во висина од 11 милиони евра за доизградба на колекторскиот систем, со оглед на тоа што е потребно итно заокружување на основната мрежа во состојба кога туризмот е во подем и се очекува натамошен развој. „Досега е изработена комплетна проектна документација, а е најавено и како владин приоритет. Обезбедување ефикасно функционирање на колекторскиот систем е и еден од заклучоците од собраниската надзорна расправа за управување со заштитениот Охридски Регион од УНЕСКО“, велат од партијата.

За Дојранското Езеро се предложени 200.000 евра за дореализација на проектот за реконструкција на пречистителна станица во општината имајќи ги предвид состојбата со квалитетот на водата на езерото, зголемениот број туристи и слабиот капацитет на станицата.