Македонија
Поради изборите се одложува пријавата за социјална помош

Постапката за обнова на правата од социјална и детска заштита за 2016 година, наместо во вообичаениот термин – ноември, годинава заради изборните активности ќе започне во втората половина на декември поточно на 19.12.2016 година и ќе трае до 27.01.2017 година, информира министерката за труд и социјална политика Фросина Ташевска-Ременски.
„Заради фактот што во ноември оваа година се концентрирани најголемиот дел од активностите на политичките партии поврзани со претстојните парламентарни избори во декември, на 13 октомври до директорите на сите центри за социјални работи доставив задолжителна писмена инструкција со детални насоки за спроведување на постапката за обнова на правата за 2016 година, која оваа година ќе започне на 19.12.2016 година и ќе трае до 27.01.2017 година. И ние и јавноста знае дека, најголемиот број на злоупотреби и манипулации со лицата во социјален ризик и корисниците на социјална помош се прават токму пред и за време на изборниот период”, рече министерката за труд и социјална политика Фросина Ташевска-Ременски.
Таа потенцираше дека заради заштита на граѓаните и нивните права од секаков вид на лажни ветувања, заплашувања, уцени и партиски агитации се оценило дека обновата на правата најдобро е да се изврши по завршување на изборите во декември во предвидениот рок.
„За министерство и за мене како министер е најважно да знаат дека, секое доаѓање на службено лице од Центар за социјални работи во Вашиот дом кое задолжително мора да Ви се претстави со име и со презиме и кажување дека, доаѓа да Ве евидентира како корисници, заради обнова на правото на социјална парична помош, право на нега од друго лице, да Ви ветува еднократна парична помош или други права кои не се по Ваше барање дадено во центарот, е спротивно на правилата за постапување во овој период и е казниво со закон. За таа цел, сакам да го знаете телефонскиот број на Центарот за пријавување на корупција на Министерството за труд и социјална политика 15 133 на кој можете и треба да ги пријавите сите притисоци, закани и несоодветни постапувања на службени лица од министерството и од центрите за социјални работи”, рече Ташевска-Ременски.
При тоа таа ги повика корисниците да не дозволуваат никој да си поигрува со нивните права и вети дека тие никогаш повеќе нема да зависат од волјата на ниту една политичка партија или нејзин припадник.
Во контекст на ова министерката Ташевкса-Ременски информираше дека на 27 октомври до директорите на Центрите за социјална работа, како одговорни лица, и до сите вработени во Центрите доставила писмени наредби дека имаат законска должност и обврска за: почитување и задолжително евидентирање на работното време; забрана за користење на материјално-технички средства на јавната установа во приватни и други цели; забрана за учество на партиски и други манифестации во работно време; забрана за претставување како службено лица од јавната установа при вршење работи/активности кои не се службени работи, а се спроведуваат надвор од работното место и надвор од работното време; забрана за извршување на партиски активности за време на работа, под оправдание за службен пат, увид или друг вид на службена задача; забрана за злоупотреба на боледување; забрана за употреба/злоупотреба на личните податоци на корисници во неслужбени цели.
„Постапувајќи по оваа наредба, до денес доставивме 15 писмени опомени до директори на Центрите за социјална работа и повеќе усни укажувања кои се однесуваат на вработени во центри, затоа што веќе се евидентирани повеќе од горенаведените забранети активности во делот на: собирање на документација за право на нега од друго лице, ветувања за еднократна парична помош и други права, користење на лични податоци на корисници на социјална помош за партиски цели, партиски активности во работно време и злоупотреба на боледувања. За сите евидентира злоупотреби и поднесени пријави кон сите вклучени службени лица веќе се преземат соодветни мерки”, рече министерката за труд и социјална политика д-р Фросина Ташевска-Ременски./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.