И покрај отежнатите околности за евроинтеграцискиот процес на Македонија и промената на внатрешната политика на Европската Унија кон приемот на нови членки, македонската дипломатија мора и натаму да биде активна во давањето иницијативи, подобрувањето на билатералните односи и позицијата на Македонија во меѓународни рамки, беше еден од заклучоците кои произлегоа од вчерашната кафе-дебата, која во организација на Европското движење во Република Македонија (ЕДРМ) се одржа во кафето Тренд во Скопје.

На дебатата учествуваа поранешните амбасадори на земјава: професор Димитар Мирчев, Мухамед Халили, Ристо Никовски, како и директорот на МЦМС, Александар Кржаловски и претседателката на ЕДРМ, професорката  Милева Ѓуровска.

Дискутирајќи на темата Евроинтеграциските процеси на Република Македонија од гледиштето на дипломатијата, дипломатите се сложија дека има позитивен исчекор во развојот на македонската дипломатија. Според професор Мирчев, веќе имаме 107 дипломатски претставништва, што е нормално за помали земји, но дека е потребно и натаму да се работи на развивањето на нејзината мрежа, нејзината активност и транспарентност.

Во поглед на спорот со името со Република Грција, кој го блокира процесот на проближување на Македонија кон евроатланските структури,  Мирчев нагласи дека е важно Европската унија да не му пристапува на овој спор како на билатерален, помеѓу Македонија и Грција, туку да се нафати да го решава во рамките на заедничката надворешна и безбедноста политика на Европската унија, за што веќе има слични предлози.

Халили истакна дека е потребно да градиме подобри поединечни односи со земјите членки бидејќи „политиката се креира во престолнините, а се финализира во Брисел“. „Ние треба да работиме на тоа Македонија повеќе да биде присутна во ЕУ одошто ЕУ да биде присутна во Македонија, бидејќи обично ангажманот на ЕУ кај нас е првенствено во заживувањето на политичкиот дијалот во државата“, истакна Халили.

Професорката Ѓуровска нагласи дека Европската унија очекува најнапред да се реализира регионалната интеграција на овие простори, пред да се случи европска интеграција, но амбасадорот Никовски пак потсети дека расте евроскептицизмот и во и надвор од границите на ЕУ, вклучувајќи ја тука и Република Македонија, на што укажа и

Александар Кржаловски, кој потсети дека сегашниот процент на поддршка на македонските граѓани за влез во Европската унија е помал од порано и изнесува околу 66 проценти, што сеуштене е мала поддршка.

„Но, не требаме да имаме дилеми дека и Европската унија и еврото ќе преживеат, без оглед на потешкотиите со кои можеби унијата наскоро ќе се соочи, бидејќи се работи за универзална вредност, која ќе биде зачувана“, рече Никовски. Тој посочи и дека Европа стана поле на кое се одвива руско-американската конфронтација, во светлото на украинската криза и дека новата Студена војна веќе е започната и дека таа може да потрае и 10-15 години./крај/со