Македонија
Повеќе од 2,5 милиони садници ќе се засадат на Денот на дрвото

Вкупно 503,89 хектари со 2.611.143 милиони садници ќе бидат пошумени со, 17. акција „Ден на дрвото засади ја својата иднина“, што се организира за среда.
Како што информира Министерството за земјоделство, шумарство и водостопанство (МЗШВ), акцијата ќе се спроведува на 60 локации во 30 подружници, а за пошумување ќе се користат црн и бел, бор, багрем, јасен, јавор, чемпрес, аризонски чемпрес, смрча, дуглазија, даб, питом костен, дива круша, црн орев.
За потребите на ЗЕЛС и пооделно за единиците на локалната самоуправа се обезбедени 1.350.568 садници, од кои 1.000.568 за Скопје, урбаните делови на општините и на страничните делови на обиколницата на главниот град, 150.000 за Битола од кои 200 за урбаниот дел на градот, 100.000 за Тетово од кои 100 за урбаниот дел, како и 100.000 за Кичево од кои 100 за урбаниот дел на градот.
Дополнително, по 2.000 леандри (вкупно 4.000) ќе бидат засадени покрај автопатот Демир Капија Смоквица и во општина Дојран, а обезбедени се и 300 декоративни садници од кои 150 (четинари повисоки од 130 сантиметри) за Здружението на граѓани „Ден на дрвото засади ја својата иднина!“.
Во организација на акцијата, покрај Министерството, вклучени се и ЈП „Македонски шуми“ Скопје, ЗЕЛС, Јавното сообраќајно претпријатие „Скопје“ Скопје, ЈКП „Паркови и зеленило“ Скопје, ЗППС „ИстокТранс“ Скопје, Град Скопје, општините Битола, Кичево и Тетово, ЈП за стопанисување со пасишта, МЖСПП, Националните паркови, Управата за хидрометеоролошки работи, МОН, МВР, АМС, МНР, МО и ГШ, MТСП, УХМР, Кабинет на претседателот на Владата на Република Македонија, Генерален Секретаријат на Владата на Република Македонија, Граничната полиција, Царинската Управа на Република Македонија и Министерство за здравство.
По повод Денот на дрвото, утре, 30 ноември, е неработен ден, освен за здравствените институции. Градинките треба да се со вообичаеното работно време. Датумот за одработување на овој ден дополнително ќе биде определен.
Акцијата „Ден на дрвото засади ја својата иднина“ почна во 2008 година и во првите четири години, до 2011та, се спроведуваше во две сезони – пролет и есен. Во последните пет години, пак, пошумувањето се извршува само на есен.
Во досегашните 16 акции се пошумени речиси 13.000 хектари со над 35 милиони садници.
Најдобар беше ефектот во 2009 година кога во две акции на речиси 4.000 хектари беа засадени повеќе од 7.900.000 садници./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Собраниска делегација на 108. Рос-Рот семинар во Ереван

Делегацијата на Собранието на Република Северна Македонија во Парламентарното собрание на НАТО, во состав: Драган Ковачки, шеф на Делегацијата и Беким Сали, член, учествуваше на 108. Рос-Рот семинар, што се одржа во Ереван, Република Ерменија на 22 и 23 септември 2025 година, во заедничка организација на ПС НАТО и Ерменскиот парламент и со финансиска поддршка на Женевскиот центар за управување со безбедносниот сектор (DCAF) и Владата на Швајцарија.
На Семинарот учествуваа голем број парламентарци од земјите членки на ПС НАТО и придружните членки, како и од земјите партнери, високи функционери и претставници на меѓународни организации, невладиниот сектор, универзитетите, владите и претставниците на јавното мислење.
Семинарот го отворија Маркос Перестрело Де Васконселос, претседател на ПС на НАТО, Андраник Кочарјан, шеф на Ерменската делегација во ПС на НАТО, Сурен Папикјан, министер за одбрана на Република Ерменија и Андреа Бауман, амбасадор на Швајцарија во Република Ерменија. Како главни воведничари беа Рубен Рубинјан, потпретседател на Парламентот на Република Ерменија и Бурчу Сан, заменик на помошникот на генералниот секретар на НАТО за оперативни активности.
Своите излагања тие ги посветија на актуелните прашања за безбедноста и одбраната од страна на земјата домаќин, заедничките демократски вредности во областа на Јужен Кавказ, како и меѓународниот поредок во овој поглед. Се презентираа моменталните одбранбени капацитети на Ерменија во контекст на обезбедување на безбедноста на граѓаните и нивниот имот, како и преглед на потенцијалните ризици и закани во контекст на безбедносните предизвици кои се од интерес на НАТО.
Парламентарците имаа уникатна можност да разменат мислења и да имаат дискусија за прашања што се однесуваат на: ‘Мировниот договор меѓу Ерменија и Азербејџан: патот напред и преостанатите предизвици; Геополитичката конкуренција и внатрешните предизвици во областа на Јужен Кавказ”; „Ерменија и Јужен Кавказ во светот што се менува: Зајакнување на демократијата и регионалната безбедност“, „Геополитичка конкуренција и внатрешни предизвици во Јужен Кавказ“, „Партнерството на Ерменија со НАТО и Европската Унија“, „Зајакнување на демократската отпорност во Ерменија и пошироко“, „Безбедност и хибридни закани во Ерменија и регионот“, „Економски предизвици и соработка во областа на Јужен Кавказ“ и „Зајакнување на демократското управување со безбедносниот сектор во рамките на партнерските области: предизвици, пристапи и лекции“.
Беа разгледани и прашањата за споделените демократски вредности, меѓународниот поредок базиран на правила и мерките за зајакнување на парламентарните демократии, регионалниот развој и динамика, како и прашањето за политичката ситуација во Грузија и перспективите за решение на моменталната ситуација меѓу Ерменија и Азербејџан.
Македонија
Сѐ уште се активни пожарите на Кожуф, во Македонски Брод и во Студеничани

На ден 22/23.09.2025 година, до 07:00 часот, на територијата на Македонија имало вкупно 30 пожари на отворен простор, од кои три се активни, четири се под контрола и изгаснати се 23 пожари, информира Центарот за управување со кризи.
Сѐ уште се активни пожарите на Кожуф планина, кај село Пeтрово каде гори букова шума; потоа пожарот во Македонски Брод над село Бенче на планината Добра Вода каде гори дабова шума и папрат и во Општина Студеничани помеѓу селата Цветово и Драчевица, каде гори шума.
Под контрола се пожарите во село Трубарево (електричен отпад); во село Виниче, м.в.Муратица (нискостеблеста шума); во село Батинци (ниска вегетација и мешана шума); и во Општина Демир Хисар на Градската депонија каде гори отпад.
Македонија
Животот на Теодора згасна, а казната изгледа како подбив наместо вистинска правда, добивме минимизирање на трагедијата што нè скрши, вели семејството Ристовски

Семејството на починатата Теодора Ристовска преку писмено сооопштение извеси дека Апелациониот суд во Гостивар ја потврди пресудата на Основниот суд во Тетово за двегодишната затворска казна за Менсур Пајазити.
Обраќањето го пренесуваме во целост.
„Ние, семејството на Теодора Ристовска, со длабока болка и бес ја известуваме јавноста: Апелациониот суд во Гостивар ја потврди пресудата на Основниот суд во Тетово, со која обвинетиот Менсур Пајазити од с. Голема Речица е прогласен за виновен и осуден на само ДВЕ ГОДИНИ ЗАТВОР за кривичното дело што го одзеде животот на нашата ќерка и сестра.
Оваа пресуда е срам за правдата. Животот на Теодора згасна, а казната изгледа како подбив. Наместо вистинска правда, добивме минимализирање на трагедијата која нè скрши.
Обвинетиот во жалбата се повикува на интересот на јавноста и на владејачката партија како фактор за “превисоката” казна, но тој интерес е многу природен — затоа што кога млад живот е згаснат, секој е потресен. Ако судството не беше труло и корумпирано, никому немаше да му пречи овој интерес. Наместо правда што ќе донесе мир, добиваме систем кој со својата блага и селективна казна создава уште поголема недоверба и омраза.
Ние не бараме привилегии. Бараме човечност и фер однос — она што му припаѓа на секој граѓанин. Кога казната е непропорционална со загубата, виновен станува не само сторителот, туку и самиот систем.
Го гледаме осудениот како слободно се движи, дури повторно седнува зад воланот, без видливо чувство на вина. За нас, тоа е брутална навреда за сеќавањето на Теодора и за секој кој знае што значи да изгубиш дете, сестра или најблиска личност.
И покрај тоа што понатамошниот правен пат до Врховниот суд зависи од Јавното обвинителство, ние нема да молчиме. Ќе продолжиме да бараме одговорност и да сведочиме пред јавноста дека оваа неправда не смее да остане без последици.
Трагедијата на Теодора ќе остане наша вечна болка. Но срамот на оваа пресуда му припаѓа на правосудниот систем. Кога убиецот шета слободен, целата нација е жртва.
Правдата мора да биде видлива, опиплива и вистинска. Животот на Теодора не е бројка во досие — тоа е нашата вечна рана.
И нема да престанеме да бараме правда, за да покажеме дека жртвите не се оставени сами.
Со почит и болка, Семејството на Теодора Ристовска“.
Теодора Ристовска беше смртно прегазена во август 2022 година. На првото судење во ноември 2023 година, по признавањето вина, Пајазити беше осуден на три години и шест месеци затвор. По жалбата, Апелацискиот суд ја намали казната на две години затвор, па Врховниот суд ги укина двете пресуди на Основниот и на Апелацискиот суд и предметот го врати на повторно судење.
Последната пресуда за Пајазити е 2 години затвор, на што јавноста жестоко реагираше, а Судскиот совет побара увид во пресудата и ја оправда.