Уште еден земјотрес ги вознемири скопјани во понеделник попладне, со јачина од 3.7 степени според Рихтер јавува страницата EMCS-CSEM.

Овој земјотрес се почувствува посилно од тој околу пладне, кој имаше јачина од 2.3 степени според Рихтеровата скала, во понеделник, а се случи по серијата посилни земјотреси, кои го потресоа главниот град во неделата.

Земјотресот е на 5 километри длабочина на 9 километри северо-источно од Скопје, а се случи во 14.19 часот.

„Телеметриската сеизмолошка мрежа на Република Македонија, со станици во Скопје, Штип, Валандово, Битола, Охрид и Крушево, одржувана од Сеизмолошката опсерваторија при Природно-математичкиот факултет во Скопје, денес, на 12.09.2016 год., регистрира земјотрес од источниот дел на скопското епицентрално подрачје.

Овој земјотрес се случи во 14 часот и 19 минути, со Рихтерова локална магнитуда 3.7. Истиот беше почувствуван во Скопје и околината со интензитет од V степени според Европската макросеизмичка скала“, информираа од Сеизмолошката опсерваторија во Скопје.

Претходно од таму информираа дека, телеметриската сеизмолошка мрежа на Република Македонија, со станици во Скопје, Штип, Валандово, Битола, Охрид и Крушево, одржувана од Сеизмолошката опсерваторија при Природно-математичкиот факултет во Скопје, во понеделник, на 12.09.2016 год., регистрира слаб земјотрес од источниот дел на скопското епицентрално подрачје.

Овој земјотрес се случи во 11 часот и 50 минути, со Рихтерова локална магнитуда 2.3. Истиот беше почувствуван во Скопје и околината со интензитет од IV степени според Европската макросеизмичка скала, соопштија од Сеизмолошката опсерваторија во Скопје.

Утрово се почувствувани десетина послаби земјотреси, со јачина од 2 до 2.5 степени, по синоќешниот од 20.57 часот.

Според сеизмолозите, нема место за паника, а земјата се уште се тресе по вчерашните два посилни земјотреси, кои скопјани ги извадија надвор од дома.