Во Генералштабот (ГШ) на АРМ во четвртокот со високи воени почести беше пречекан претседавачот на Воениот комитет (ВК) на НАТО, генерал Кнуд Бартелс, кому домаќин е началникот на Генералштабот, генерал-потполковник Горанчо Котески.
 

Генералот Бартелс во изјавата за медиумите им се заблагодари на припадниците на АРМ, истакнувајќи го нивниот професионализам кој го покажуваат во мисијата ИСАФ во Авганистан, заради што се особено почитувани во НАТО Алијансата. Подвлекувајќи го придонесот и кооперативноста на АРМ и во мисијата КФОР, тој изрази задоволство од подготвеноста за натамошното учество на АРМ во мисијата „Одлучна поддршка“ која како мисија за обука на Авганистанските безбедносни сили започнува од идната година под водство на НАТО.

Претседавачот на Воениот комитет на НАТО нагласи дека одличната соработка на АРМ со НАТО ќе продолжи, а покрај учеството во мисиите и вежбите, таа ќе се прошири и со нови иницијативи, како што е иницијативата за градење на одбранбените и безбедносни капацитети.

Од своја страна, генерал Котески го истакна учеството на припадниците на АРМ во мисиите предводени од НАТО, како и огромниот придонес на АРМ во регионалниот и светскиот мир и стабилност, при што искажа очекување за зголемено учество на штабни офицери во наредниот период во командите и штабовите на НАТО, кои ќе учествуваат во донесувањето на одлуките во рамките на Алијансата. Нагласувајќи дека според подготвеноста на декларираните единици и примената на Концептот за оперативни способности на НАТО, АРМ е лидер во регионот, Котески истакна дека поддршката и соработката со НАТО ќе продолжи и понатаму, во прилог на заложбите за активно членство на Република Македонија во НАТО.

Покрај унапредувањето на атамошната соработка со НАТО, на средбата со делегацијата од НАТО се разговараше за реализацијата на акциониот план за членство во НАТО, имплементацијата на партнерските цели и за учеството на АРМ во мисите предводени од НАТО.

Генералот Бартелс во текот на својот престој во Скопје во четвртокот оствари средба и со министерот за одбрана Зоран Јолевски, а попладнето одржа предавање пред питомците на Воената академија „Михаило Апостолски“ во Скопје.

Во петок, Бартелс треба да се сретне со Претседателот Ѓорге Иванов и со министерот за надворешни работи Никола Попоски, а ќе положи и венец со свежо цвеќе пред споменикот на „Паднатите херои за Македонија“./крај/мф/сн

Извор: Макфакс