Академијата за судии и јавни обвинители „Павел Шатев“, со цел да го доближи меѓународното право, судската пракса на најголемите и најзначајните судови, меѓународните документи и договори, како и европската легислатива до националните судии продолжува континуирано да работи на нивно преведување, објавување на веб страницата на Академијата како и нивна систематизација и публикување.
 

Резултат на тие заложби е публикувањето на поголем број публикации меѓу кој и книгите со наслов „Меѓународни документи за независно и ефикасно судство“ том 1 и том 2, кои во ноември 2010 година беа публикувани од страна на Академијата за судии и јавни обвинители со финансиска поддршка на Мисијата на ОБСЕ, во кои беа содржани Мислењата на Советодавниот совет на европските судии (ССЕС) при Советот на Европа, селектирани референтни меѓународни документи кои ја гарантираат независноста и ефикасноста на судството, како и одбрана пракса на Европскиот суд за човекови права во Стразбур, сите преведени на македонски јазик.

Новините од областа на правото на меѓународната сцена претставуваше предизвик за нивна повторна систематизација во Третиот том од истоимената публикација во која се содржани Мислењата на ССЕС 13-16, референтни документи и селектирана судска пракса на Европскиот суд за човекови права, која ќе биде промовирана на 26 септември 2014 година во просториите на Академијата, со почеток во 10 часот, а во чиј фокус ќе се најде Мислењето 16 на ССЕС кое е посветено на односите меѓу судиите и адвокатите.

Третиот том на публикацијата повторно е издаден во соработка и со финансиска поддршка на Мисијата на ОБСЕ во Скопје.

Воведот на книгите, систематизацијата на Мислењата и другите референтни документи се изготвени од страна на директорот на Академијата за судии и јавни обвинители, судија Анета Арнаудовска, која воедно е и член на работната група на Советодавниот Совет на Европските Судии, работна група, која ги подготви овие Мислења.

На промоцијата поканети се да присуствуваат високи претставници на правосудните институции во Република Македонија, судии и јавни обвинители, претстaвници на странски партнери на Академијата, како и претставници на дипломатскиот кор во Република Македонија.

Настанот со поздравно обраќање до присутните ќе го отворат амбасадорот Ралф Брет, шеф на Мисијата на ОБСЕ во Скопје и директорот на Академијата, Анета Арнаудовска.

На промоцијата по повод Мислењето 16 на ССЕС излагање ќе има и претседателот на Советодавниот совет на европските судии, Барт Ван Лиероп, кој воедно е и судија на Апелациониот суд во Хаг, Кралството Холандија. За односите меѓу адвокатите и судиите на промоцијата ќе говори претседателот на Адвокатската комора на Република Македонија, Никола Додевски, додека директорот на Академијата, судија Анета Арнаудовска, како член на работната група на ССЕС ќе ги претстави активностите на Република Македонија во рамките на на Советодавниот совет на европски судии./крај/мф

Извор: Макфакс